ਰਾਸ਼ਟਰਪਤੀ ਬਾਈਡਨ ਵਲੋਂ ਭੇਜੇ ਫੌਜ ਦੇ ਜਹਾਜ਼ ਵਿਚ ਡੋਨਾਲਡ ਟਰੰਪ ਵਾਸ਼ਿੰਗਟਨ ਪੁੱਜੇ

ਸੈਕਰਾਮੈਂਟ, ਕੈਲੀਫੋਰਨੀਆ (ਹੁਸਨ ਲੜੋਆ ਬੰਗਾ) - ਰਾਸ਼ਟਰਪਤੀ ਚੁਣੇ ਗਏ ਡੋਨਾਲਡ ਟਰੰਪ ਰਾਸ਼ਟਰਪਤੀ ਜੋ ਬਾਈਡਨ ਵਲੋਂ ਭੇਜੇ ਅਮਰੀਕੀ ਫੌਜ ਦੇ ਜਹਾਜ਼ ਵਿਚ ਆਪਣੇ ਪਰਿਵਾਰ ਸਮੇਤ ਵਾਸ਼ਿੰਗਟਨ, ਡੀ. ਸੀ. ਪੁੱਜ ਗਏ ਹਨ। ਪਾਮ ਬੀਚ ਇੰਟਰਨੈਸ਼ਨਲ ਹਵਾਈ ਅੱਡੇ 'ਤੇ ਪੁੱਜੇ ਫੌਜ ਦੇ ਜਹਾਜ਼ ਵਿਚ ਡੋਨਾਲਡ ਟਰੱਪ, ਉਨਾਂ ਦੀ ਪਤਨੀ ਮੇਲਾਨੀਆ ਧੀ ਇਵਾਂਕਾ ਤੇ ਜਵਾਈ ਜੋਰਡ ਸਵਾਰ ਹੋਏ ਜਦ ਕਿ ਉਨਾਂ ਦਾ ਪੁੱਤਰ ਐਰਿਕ ਤੇ ਉਸ ਦੀ ਪਤਨੀ ਲਾਰਾ ਇਕ ਨਿੱਜੀ ਜਹਾਜ਼ ਵਿਚ ਸਵਾਰ ਹੋਏ। ਟਰੰਪ-ਵੈਸ ਟਰਾਂਜੀਸ਼ਨ ਟੀਮ ਦੇ ਬੁਲਾਰੇ ਕੈਰੋਲਾਈਨ ਲੀਵਿਟ ਨੇ ਐਕਸ ਉਪਰ ਪਾਈ ਇਕ ਪੋਸਟ ਵਿਚ ਕਿਹਾ ਹੈ ਕਿ " ਰਾਸ਼ਟਰਪਤੀ ਤੇ ਪ੍ਰਥਮ ਔਰਤ ਮਾਰ-ਏ-ਲਾਰੀ ਨਿਵਾਸ ਤੋਂ ਵਾਸ਼ਿੰਗਟਨ ਲਈ ਸਫਲਤਾ ਦੀ ਮਹਾਨ ਯਾਤਰਾ 'ਤੇ ਰਵਾਨਾ ਹੋ ਗਏ ਹਨ। ਕੋਈ 3 ਘੰਟੇ ਤੋਂ ਵੀ ਘੱਟ ਸਮੇ ਦੇ ਸਫਰ ਉਪਰੰਤ ਡੋਨਾਲਡ ਟਰੰਪ ਦਾ ਜਹਾਜ਼ ਵਾਸ਼ਿੰਗਟਨ ਇੰਟਰਨੈਸ਼ਨਲ ਹਵਾਈ ਅੱਡੇ 'ਤੇ ਉਤਰਿਆ। ਡੋਨਾਲਡ ਟਰੰਪ ਰਾਸ਼ਟਰਪਤੀ ਵਜੋਂ 20 ਜਨਵਰੀ ਨੂੰ ਸਹੁੰ ਚੁੱਕਣਗੇ। ਖਰਾਬ ਮੌਸਮ ਕਾਰਨ ਸਹੁੰ ਚੁੱਕ ਸਮਾਗਮ ਖੁਲ੍ਹੇ ਮੈਦਾਨ ਵਿਚ ਹੋਣ ਦੀ ਬਜਾਏ ਅੰਦਰ ਹੋਵੇਗਾ ਜਿਥੇ ਕੁਝ ਸੈਂਕੜਿਆਂ ਦੀ ਗਿਣਤੀ ਵਿਚ ਵਿਅਕਤੀ ਹੀ ਬੈਠ ਸਕਣਗੇ।