ਨਵੀਂ ਦਿੱਲੀ, 16 ਜੁਲਾਈ (ਡਾ. ਬਲਵਿੰਦਰ ਸਿੰਘ ਸੋਢੀ)- ਉੱਤਰ ਪੂਰਬੀ ਜ਼ਿਲ੍ਹੇ ਦੀ ਏ.ਏ.ਟੀ.ਐਸ. ਟੀਮ ਨੇ ਗੱਡੀਆਂ ਦੀ ਚੋਰੀ ਦੇ ਮਾਮਲੇ ਵਿਚ ਇਕ ਨਾਬਾਲਗ ਨੂੰ ਫੜਿਆ ਹੈ ਅਤੇ ਉਸ ਕੋਲੋਂ ਚੋਰੀ ਕੀਤੀਆਂ 4 ਦੋ ਪਹੀਆ ਗੱਡੀਆਂ ਬਰਾਮਦ ਕਰ ਲਈਆਂ ਹਨ। ਨਾਬਾਲਗ ਨੇ ਇਹ ਗੱਡੀਆਂ ਜੋਤੀ ਨਗਰ, ਨਿਊ ਉਸਮਾਨਪੁਰ ਅਤੇ ਜ਼ਾਫ਼ਰਾਬਾਦ ਦੇ ਖੇਤਰ ’ਚੋਂ ਚੁਰਾਈਆਂ ਸਨ। ਗੱਡੀਆਂ ਦੀ ਚੋਰੀਆਂ ਪ੍ਰਤੀ ਪੁਲਿਸ ਕੋਲ ਸ਼ਿਕਾਇਤਾਂ ਆਈਆਂ ਸਨ, ਜਿਸ ਕਰਕੇ ਪੁਲਿਸ ਨੇ ਹਰ ਥਾਂ ’ਤੇ ਨਿਗਰਾਨੀ ਰੱਖੀ ਹੋਈ ਸੀ। ਪੁਲਿਸ ਨੂੰ ਇਸ ਮਾਮਲੇ ਸੰਬੰਧੀ ਇਕ ਗੁਪਤ ਸੂਚਨਾ ਮਿਲੀ ਸੀ। ਪੁਲਿਸ ਨੇ ਸੂਚਨਾ ਦੇ ਆਧਾਰ ’ਤੇ ਉੱਤਰ ਪੂਰਬੀ ਜ਼ਿਲ੍ਹੇ ਦੇ ਗੁਰਦੁਆਰੇ ਕੋਲ ਆਪਣਾ ਜਾਲ ਵਿਛਾਇਆ। ਪੁਲਿਸ ਨੇ ਆ ਰਹੇ ਇਕ ਸ਼ੱਕੀ ਨਾਬਾਲਗ (ਵਿਅਕਤੀ) ਨੂੰ ਰੋਕਿਆ ਜੋ ਕਿ ਮੋਟਰਸਾਈਕਲ ’ਤੇ ਆ ਰਿਹਾ ਸੀ। ਪੁਲਿਸ ਨੇ ਉਸ ਕੋਲੋਂ ਜਦੋਂ ਗੱਡੀ ਦੇ ਦਸਤਾਵੇਜ਼ ਵਿਖਾਉਣ ਨੂੰ ਕਿਹਾ ਤਾਂ ਉਹ ਦਸਤਾਵੇਜ਼ ਨਾ ਵਿਖਾ ਸਕਿਆ। ਜਦੋਂ ਪੁਲਿਸ ਨੇ ਨਾਬਾਲਗ ਤੋਂ ਪੁੱਛ ਪੜਤਾਲ ਕੀਤੀ ਤਾਂ ਉਸ ਨੇ ਗੱਡੀਆਂ ਦੀ ਚੋਰੀ ਪ੍ਰਤੀ ਗੱਲ ਨੂੰ ਕਬੂਲ ਲਿਆ ਅਤੇ ਚੋਰੀ ਕੀਤੀਆਂ ਚਾਰ ਗੱਡੀਆਂ ਬਾਰੇ ਦੱਸ ਦਿੱਤਾ। ਪੁਲਿਸ ਨੇ ਮਾਮਲਾ ਦਰਜ ਕਰ ਕੇ ਹੋਰ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
