ਚੰਡੀਗੜ੍ਹ, 15 ਜੁਲਾਈ (ਸੰਦੀਪ ਕੁਮਾਰ ਮਾਹਨਾ)-ਸੜਕ ਸੁਰੱਖਿਆ, ਟ੍ਰੈਫ਼ਿਕ ਮੈਨੇਜਮੈਂਟ ਅਤੇ ਜਨਤਕ ਸੁਵਿਧਾ ਨਾਲ ਜੁੜੇ ਮੁੱਦਿਆਂ 'ਤੇ ਵਿਸਤਾਰ ਨਾਲ ਚਰਚਾ ਕਰਨ ਲਈ ਜ਼ਿਲ੍ਹਾ ਸੜਕ ਸੁਰੱਖਿਆ ਕਮੇਟੀ ਦੀ ਇਕ ਮੀਟਿੰਗ ਚੰਡੀਗੜ੍ਹ ਦੇ ਡਿਪਟੀ ਕਮਿਸ਼ਨਰ ਨਿਸ਼ਾਂਤ ਕੁਮਾਰ ਯਾਦਵ ਦੀ ਪ੍ਰਧਾਨਗੀ ਹੇਠ ਹੋਈ | ਮੀਟਿੰਗ 'ਚ ਐਸ.ਐਸ.ਪੀ (ਟ੍ਰੈਫ਼ਿਕ ਅਤੇ ਸੁਰੱਖਿਆ), ਐਸ.ਡੀ.ਐਮ, ਸਿਹਤ ਸੇਵਾਵਾਂ ਵਿਭਾਗ (ਡੀ.ਐਚ.ਐਸ), ਇੰਜੀਨੀਅਰਿੰਗ ਵਿਭਾਗ, ਮੁੱਖ ਆਰਕੀਟੈਕਟ ਦਫ਼ਤਰ, ਆਬਕਾਰੀ ਵਿਭਾਗ ਅਤੇ ਨਗਰ ਨਿਗਮ ਦੇ ਅਧਿਕਾਰੀ ਮੌਜੂਦ ਰਹੇ | ਮੀਟਿੰਗ ਦੌਰਾਨ ਲੈਪਟਨ ਸਾਫ਼ਟਵੇਅਰ ਕੰਪਨੀ ਵਲੋਂ ਗੂਗਲ ਮੈਪਸ ਨਾਲ ਸਾਂਝੀਦਾਰੀ ਵਿਚ ਸਪੀਡ ਲਿਮਟ ਮੈਪਿੰਗ ਪ੍ਰਾਜੈਕਟ ਦੇ ਸੰਬੰਧ 'ਚ ਸਮੀਖਿਆ ਕੀਤੀ ਗਈ ਸੀ, ਜਿਸ ਦਾ ਮਕਸਦ ਚੰਡੀਗੜ੍ਹ ਦੀਆਂ ਸੜਕਾਂ 'ਤੇ ਸਹੀ ਅਧਿਕਾਰਿਤ ਗਤੀ ਸੀਮਾ ਪ੍ਰਦਰਸ਼ਿਤ ਕਰਨਾ ਸੀ | ਸਰਵੇਖਣ ਤੋਂ ਬਾਅਦ ਪਤਾ ਲੱਗਿਆ ਹੈ ਕਿ 1131 ਸੜਕ ਲਿੰਕਾਂ 'ਚੋਂ, 637 ਸਥਾਨਾਂ 'ਤੇ ਜ਼ਮੀਨੀ ਸਾਇਨ ਬੋਰਡਾਂ ਅਤੇ ਅਧਿਕਾਰਿਤ ਗਤੀ ਡੇਟਾ ਵਿਸੰਗਤੀਆਂ ਹਨ | ਇਸ ਤੋਂ ਇਲਾਵਾ 178 ਸਥਾਨਾਂ 'ਤੇ ਕੋਈ ਵੀ ਸਪੀਡ ਸੰਕੇਤ ਨਹੀਂ ਹਨ ਅਤੇ 175 ਸਥਾਨਾਂ 'ਤੇ ਖ਼ਾਸ ਤੌਰ 'ਤੇ ਦੋ-ਪਹੀਆ ਵਾਹਨਾਂ ਲਈ ਸਪੀਡ ਬੋਰਡਾਂ ਦੀ ਘਾਟ ਸੀ | ਇਨ੍ਹਾਂ ਵਿਸੰਗਤੀਆਂ ਨੂੰ ਗੰਭੀਰਤਾ ਨਾਲ ਲੈਂਦੇ ਹੋਏ ਡਿਪਟੀ ਕਮਿਸ਼ਨਰ ਨੇ ਇੰਜੀਨੀਅਰਿੰਗ ਵਿਭਾਗ, ਪੁਲਿਸ (ਟ੍ਰੈਫ਼ਿਕ ਵਿੰਗ) ਅਤੇ ਹੋਰ ਸੰਬੰਧਿਤ ਨਾਗਰਿਕ ਏਜੰਸੀਆਂ ਸਹਿਤ ਸਾਰੇ ਸੰਬੰਧਿਤ ਵਿਭਾਗਾਂ ਨੂੰ ਗ਼ਲਤ ਢੰਗ ਨਾਲ ਪ੍ਰਦਰਸ਼ਿਤ ਸਪੀਡ ਸਾਇਨ ਬੋਰਡਾਂ ਨੂੰ ਸੁਧਾਰਨ ਲਈ ਤੁਰੰਤ ਕਾਰਵਾਈ ਸ਼ੁਰੂ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ | ਉਨ੍ਹਾਂ ਕਿਹਾ ਕਿ ਸਹੀ ਸਪੀਡ ਸੀਮਾ ਸਾਇਨ ਬੋਰਡ ਨਾ ਸਿਰਫ਼ ਯਾਤਰੀਆਂ ਦੀ ਸੁਰੱਖਿਆ ਲਈ ਬਲਕਿ ਲਾਗੂਕਰਨ ਏਜੰਸੀਆਂ ਵਲੋਂ ਸਪੀਡ ਨਿਯਮਾਂ ਨੂੰ ਪ੍ਰਭਾਵੀ ਢੰਗ ਨਾਲ ਲਾਗੂ ਕਰਨ ਲਈ ਵੀ ਮਹੱਤਵਪੂਰਨ ਹਨ | ਡਿਪਟੀ ਕਮਿਸ਼ਨਰ ਨੇ ਨਿਰਦੇਸ਼ ਦਿੱਤੇ ਕਿ ਜ਼ਰੂਰੀ ਸੁਧਾਰ ਸਮਾਂਬੱਧ ਢੰਗ ਨਾਲ ਕੀਤੇ ਜਾਣੇ ਚਾਹੀਦੇ ਹਨ ਤਾਂ ਕਿ ਇਹ ਸੁਨਿਸ਼ਚਿਤ ਕੀਤਾ ਜਾ ਸਕੇ ਕਿ ਜ਼ਮੀਨੀ ਸਾਇਨ ਬੋਰਡ ਅਧਿਕਾਰਤ ਤੌਰ 'ਤੇ ਸੂਚਿਤ ਸਪੀਡ ਸੀਮਾ ਦੇ ਪੂਰੀ ਤਰ੍ਹਾਂ ਅਨੁਰੂਪ ਹਨ | ਇਸ ਤੋਂ ਇਲਾਵਾ ਜਨਤਕ ਸੁਰੱਖਿਆ ਨੂੰ ਵਧਾਉਣ ਲਈ ਚੀਫ਼ ਇੰਜੀਨੀਅਰ ਯੂ.ਟੀ ਨੂੰ ਸੈਕਟਰ 9/10 ਜਨਵਰੀ ਮਾਰਗ 'ਤੇ ਉਚਿੱਤ ਗਤੀ ਨਿਯੰਤਰਨ ਉਪਾਅ ਲਾਗੂ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ | ਡਿਪਟੀ ਕਮਿਸ਼ਨਰ ਨੇ ਸੜਕ ਸੁਰੱਖਿਆ ਚੁਣੌਤੀਆਂ ਨੂੰ ਹੱਲ ਕਰਨ ਅਤੇ ਸੁਚਾਰੂ ਸ਼ਹਿਰੀ ਗਤੀਸ਼ੀਲਤਾ ਨੂੰ ਯਕੀਨੀ ਬਣਾਉਣ ਲਈ ਸਾਰੇ ਵਿਭਾਗਾਂ 'ਚ ਤਾਲਮੇਲ ਅਤੇ ਨਿਰੰਤਰ ਯਤਨਾਂ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ ਅਤੇ ਸਾਰੇ ਵਿਭਾਗਾਂ ਨੂੰ ਮੀਟਿੰਗ ਦੌਰਾਨ ਲਏ ਗਏ ਫ਼ੈਸਲਿਆਂ ਦੇ ਸਮੇਂ ਸਿਰ ਪਾਲਨ ਨੂੰ ਸੁਨਿਸ਼ਚਿਤ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ |