ਕਟਾਰੀਆਂ, 20 ਜੁਲਾਈ (ਪ੍ਰੇਮੀ ਸੰਧਵਾਂ)- ਰਾਹਗੀਰਾਂ ਤੇ ਕਿਸਾਨਾਂ ਨੇ ਆਪਣਾ ਦੁੱਖੜਾ ਸੁਣਾਉਂਦਿਆ ਕਿਹਾ ਕਿ ਡਰੇਨੇਜ਼ ਵਿਭਾਗ ਦੀ ਲਾਪਰਵਾਹੀ ਕਾਰਨ ਕਿਸਾਨ ਤੇ ਰਾਹਗੀਰ ਡਾਢੇ ਪ੍ਰੇਸ਼ਾਨ ਹਨ | ਕਿਉਂਕਿ ਜਦੋਂ ਵੀ ਡਰੇਨਾਂ ਦੀ ਸਫ਼ਾਈ ਦਾ ਕੰਮ ਜੇ. ਸੀ. ਬੀ ਮਸ਼ੀਨ ਨਾਲ ਕੀਤਾ ਜਾਂਦਾ ਹੈ ਤੇ ਡਰੇਨਾਂ 'ਚ ਫੇਰ ਵੀ ਗੰਦਗੀ ਰਹਿ ਜਾਂਦੀ ਹੈ ਤੇ ਥੋੜੇ ਦਿਨਾਂ ਦੇ ਬਾਅਦ ਡਰੇਨਾਂ ਦੀ ਹਾਲਤ ਚੌੜੇ ਪੱਤੇ ਵਾਲੀ ਬੂਟੀ ਦੇ ਫੈਲਣ ਨਾਲ ਸਥਿਤੀ ਪਹਿਲਾਂ ਜਿਹੀ ਬਣ ਜਾਂਦੀ ਹੈ | ਕਿਉਂਕਿ ਡਰੇਨ ਵਿਭਾਗ ਵਲੋਂ ਸਫ਼ਾਈ ਦਾ ਕੰਮ ਅੱਧ ਵਿਚਾਲੇ ਛੱਡ ਦਿੱਤਾ ਜਾਂਦਾ ਹੈ | ਜਿਸ ਕਾਰਨ ਇਕ ਥਾਂ 'ਤੇ ਖੜ੍ਹੇ ਰਹਿਣ ਕਾਰਨ ਕਾਲੇ ਪਾਣੀ ਦੀ ਭੈੜੀ ਬਦਬੂ ਤੋਂ ਰਾਹਗੀਰਾਂ ਤੇ ਕਿਸਾਨਾਂ ਦਾ ਲੰਘਣਾ ਦੁੱਭਰ ਹੋ ਜਾਂਦਾ ਹੈ | ਰਾਹਗੀਰਾਂ ਤੇ ਕਿਸਾਨਾਂ ਨੇ ਕਿਹਾ ਕਿ ਪਿਛਲੇ ਸਾਲਾਂ ਦੌਰਾਨ ਵੀ ਡਰੇਨ ਦੀ ਸਫ਼ਾਈ ਵਿਚ ਵਰਤੀ ਗਈ ਅਣਗਹਿਲੀ ਕਾਰਨ ਕਿਸਾਨਾਂ ਦਾ ਸੈਂਕੜੇ ਏਕੜ ਝੋਨਾ ਡਰੇਨ 'ਚ ਬਰਸਾਤੀ ਮੌਸਮ ਕਾਰਨ ਬਣੇ ਹੜ੍ਹ ਵਰਗੇ ਹਾਲਾਤਾਂ ਨਾਲ ਬਰਬਾਦ ਹੋ ਗਿਆ ਸੀ | ਜਿਸ ਕਾਰਨ ਕਿਸਾਨਾਂ ਨੂੰ ਕਾਫੀ ਆਰਥਿਕ ਨੁਕਸਾਨ ਦੀ ਸੱਟ ਵੱਜੀ ਸੀ | ਹੁਣ ਵੀ ਉਨ੍ਹਾਂ ਕਿਹਾ ਕਿ ਡਰੇਨ ਦੀ ਸਫ਼ਾਈ 'ਚ ਵਰਤੀ ਗਈ ਅਣਗਹਿਲੀ ਬਰਸਾਤੀ ਮੌਸਮ 'ਚ ਕਿਸਾਨਾਂ 'ਤੇ ਭਾਰੂ ਪੈ ਸਕਦੀ ਹੈ | ਕਿਉਂਕਿ ਡਰੇਨ 'ਚ ਜੇਕਰ ਮੀਂਹ ਪੈਣ ਨਾਲ ਹੜ੍ਹ ਵਰਗੇ ਹਾਲਾਤ ਬਣ ਗਏ ਤਾਂ ਕਿਸਾਨਾਂ ਦੇ ਝੋਨੇ ਦੀ ਫ਼ਸਲ ਖਰਾਬ ਹੋਣ ਦਾ ਖਦਸ਼ਾ ਬਣ ਸਕਦਾ ਹੈ | ਕਿਸਾਨਾਂ ਤੇ ਰਾਹਗੀਰਾਂ ਨੇ ਡਰੇਨੇਜ਼ ਵਿਭਾਗ ਤੋਂ ਮੰਗ ਕੀਤੀ ਕਿ ਸੰੂਢ ਤੇ ਕਟਾਰੀਆਂ ਵਿਚਕਾਰੋਂ ਗੁਜ਼ਰਦੀ ਡਰੇਨ ਦੀ ਸਫ਼ਾਈ ਦਾ ਕੰਮ ਚੰਗੀ ਤਰ੍ਹਾਂ ਨਾਲ ਕਰਵਾਇਆ ਜਾਵੇ |