ਲਕਸ਼ਯ ਬੈਡਮਿੰਟਨ ਆਲ ਇੰਗਲੈਂਡ ਸੈਮੀਫਾਈਨਲ 'ਚ ਪੁੱਜਾ

ਬਰਮਿੰਘਮ, 7 ਮਾਰਚ (ਪੀ.ਟੀ.ਆਈ.)-ਭਾਰਤ ਦੇ ਲਕਸ਼ਯ ਸੇਨ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ, ਸਾਬਕਾ ਚੀਨੀ ਚੈਂਪੀਅਨ ਲੀ ਸ਼ਿਫੇਂਗ ਨੂੰ ਸਿੱਧੇ ਗੇਮਾਂ 'ਚ ਹਰਾ ਕੇ 1,450,000 ਡਾਲਰ ਦੇ ਆਲ ਇੰਗਲੈਂਡ ਓਪਨ ਬੈਡਮਿੰਟਨ ਟੂਰਨਾਮੈਂਟ ਦੇ ਸੈਮੀਫਾਈਨਲ 'ਚ ਪ੍ਰਵੇਸ਼ ਕੀਤਾ | ਵਿਸ਼ਵ ਦੇ 12ਵੇਂ ਨੰਬਰ ਦੇ ਸੇਨ ਨੇ ਚੀਨ ਦੇ ਵਿਸ਼ਵ ਦੇ 6ਵੇਂ ਨੰਬਰ ਦੇ ਸ਼ਿਫੇਂਗ ਨੂੰ ਸਿਰਫ਼ ਇਕ ਘੰਟੇ ਤੋਂ ਵੱਧ ਸਮੇਂ 'ਚ 21-13, 21-16 ਨਾਲ ਹਰਾਇਆ | ਉਸਦਾ ਸਾਹਮਣਾ ਕੈਨੇਡਾ ਦੇ ਵਿਕਟਰ ਲਾਈ ਨਾਲ ਹੋਵੇਗਾ, ਜਿਸਨੇ ਦੂਜੇ ਕੁਆਰਟਰ ਫਾਈਨਲ ਮੈਚ 'ਚ ਜਪਾਨ ਦੇ ਕੋਕੀ ਵਾਟਾਨਾਬੇ ਨੂੰ 18-21, 21-17, 21-15 ਨਾਲ ਹਰਾਇਆ | ਇਸ ਵੱਕਾਰੀ ਚੈਂਪੀਅਨਸ਼ਿਪ 'ਚ ਇਹ ਲਕਸ਼ਯ ਦਾ ਤੀਜਾ ਸੈਮੀਫਾਈਨਲ ਹੈ | ਉਹ 2022 'ਚ ਇੱਥੇ ਉਪ ਜੇਤੂ ਰਿਹਾ ਸੀ |