ਕਣਕਾਂ ਦਾ ਰੰਗ ਹੋਇਆ ਸੁਨਹਿਰੀ, ਚੜ੍ਹਿਆ ਮਾਂਹ ਵਿਸਾਖ।
ਖੇਤ ਝੂਮਦੀ ਫ਼ਸਲ ਵੇਖ, ਕਿਸਾਨ ਨੂੰ ਬੱਝੀ ਆਸ।
ਸੋਨੇ ਵਾਂਗੂ ਲਿਸ਼ਕਣ ਬੱਲੀਆਂ, ਦੂਰੋਂ ਪੈਣ ਚਮਕਾਰੇ।
ਖੇਤ ਦੀ ਵੱਟ 'ਤੇ ਖੜ੍ਹਕੇ ਕਿਰਤੀ, ਫ਼ਸਲਾਂ ਨੂੰ ਨਿਹਾਰੇ।
ਛੇ ਮਹੀਨਿਆਂ ਦੀ ਮਿਹਨਤ ਉਸਦੀ ਭਰ ਜੋਬਨ 'ਤੇ ਆਈ।
ਮੀਂਹ, ਨ੍ਹੇਰੀ, ਝੱਖੜਾਂ ਤੋਂ ਬਚ ਕੇ , ਫ਼ਸਲ ਖ਼ੂਬ ਲਹਿਰਾਈ।
ਖੁਸ਼ੀਆਂ, ਖੇੜੇ ਡੁੱਲ੍ਹ-ਡੁੱਲ੍ਹ ਪੈਂਦੇ, ਆਵੇ ਜਦੋਂ ਵਿਸਾਖੀ।
ਪੱਕੀਆਂ ਫ਼ਸਲਾਂ ਮਾਰਨ 'ਵਾਜ਼ਾਂ, ਮੁੱਕ ਜਾਂਦੀ ਫਿਰ ਰਾਖ਼ੀ।
ਲੋਕੀਂ ਸੋਹਣੇ ਕੱਪੜੇ ਪਾ ਕੇ, ਮੇਲੇ ਦੇ ਵਿਚ ਆਉਂਦੇ।
ਗੁਰੂ ਘਰਾਂ ਵਿਚ ਸ਼ਰਧਾ ਦੇ ਨਾਲ, ਝੁਕ ਕੇ ਸੀਸ ਨਿਵਾਉਂਦੇ।
ਢਾਡੀ ਅਤੇ ਕਵੀਸ਼ਰ ਗਾਉਂਦੇ, ਸੂਰਮਿਆਂ ਦੀਆਂ ਵਾਰਾਂ।
ਰਣ ਭੂਮੀ ਵਿਚ ਜਿਨ੍ਹਾਂ ਯੋਧਿਆਂ, ਮੰਨੀਆਂ ਕਦੇ ਨਾ ਹਾਰਾਂ।
ਮੇਲੇ ਦੇ ਵਿਚ ਭਾਂਤ-ਭਾਂਤ ਦੀਆਂ, ਸਜੀਆਂ ਖ਼ੂਬ ਦੁਕਾਨਾਂ।
ਤੱਤੀਆਂ ਜਲੇਬੀਆਂ, ਗਰਮ ਪਕੌੜੇ, ਨਾਲੇ ਪਿਆ ਬਦਾਨਾ।
ਅੰਬਰਾਂ ਦੇ ਨਾਲ ਖਹਿ-ਖਹਿ ਲੰਘਣ, ਝੂਲਣ ਜਦੋਂ ਚੰਡੋਲਾਂ।
ਲੋਕ ਬੈਠ ਕੇ ਲੈਂਦੇ ਝੂਟੇ, ਕਰਦੇ ਖ਼ੂਬ ਕਲੋਲਾਂ।
ਖੁਸ਼ੀਆਂ ਅਤੇ ਬਹਾਰਾਂ ਲੈ ਕੇ, ਇਹ ਤਿਉਹਾਰ ਹੈ ਆਉਂਦਾ।
ਢੋਲ-ਢਮੱਕੇ ਪੈਣ ਭੰਗੜੇ, ਹਰ ਵਿਹੜਾ ਰੁਸ਼ਨਾਉਂਦਾ।
-ਪਿੰਡ : ਘੜੈਲੀ (ਬਠਿੰਡਾ)
ਮੋਬਾਈਲ : 79860-63165
