ਪ੍ਰਧਾਨ ਮੰਤਰੀ, ਮੁੱਖ ਮੰਤਰੀ ਅਤੇ ਮੰਤਰੀਆਂ ਦੀ ਗ੍ਰਿਫ਼ਤਾਰੀ ਤੋਂ ਬਾਅਦ ਅਹੁਦਾ ਛੱਡਣ ਨਾਲ ਜੁੜੇ ਬਿੱਲ ’ਤੇ ਸੰਸਦੀ ਕਮੇਟੀ ਨੇ ਹੋਰ ਹਿਤਧਾਰਕਾਂ ਨਾਲ ਸਲਾਹ-ਮਸ਼ਵਰੇ ਲਈ ਸਮਾਂ ਮੰਗਿਆ ਹੈ। ਸੰਸਦੀ ਕਮੇਟੀ ਦੀ ਮੁਖੀ ਅਪਰਾਜਿਤਾ ਸਾਰੰਗੀ ਨੇ ਸ਼ੁੱਕਰਵਾਰ ਨੂੰ ਕਮੇਟੀ ਮੀਟਿੰਗ ਤੋਂ ਬਾਅਦ ਕਿਹਾ ਕਿ ਮੈਂਬਰਾਂ ਨੇ ਇਸ ਬਿੱਲ ’ਤੇ ਹੋਰ ਵਿਚਾਰ-ਵਟਾਂਦਰਾ ਕਰਨ ਦੀ ਰਾਇ ਰੱਖੀ। ਸੰਸਦੀ ਕਮੇਟੀ ਨੇ ਸ਼ੁੱਕਰਵਾਰ ਨੂੰ ਹੋਈ ਮੀਟਿੰਗ ’ਚ ਖਰੜਾ ਰਿਪੋਰਟ ’ਤੇ 5 ਸਿਫ਼ਾਰਿਸ਼ਾਂ ’ਤੇ ਵਿਚਾਰ ਕੀਤਾ, ਜਿਹੜੀਆਂ ਹਾਲ ’ਚ ਮੈਂਬਰਾਂ ਨੂੰ ਵੰਡੀਆਂ ਗਈਆਂ ਸਨ। ਹਰ ਸਿਫ਼ਾਰਿਸ਼ ’ਤੇ ਵੱਖਰੀ ਵੋਟਿੰਗ ਦੌਰਾਨ ਇਹ ਫ਼ੈਸਲਾ ਕੀਤਾ ਗਿਆ ਕਿ ਮੈਂਬਰਾਂ ਨੂੰ ਹਿਤਧਾਰਕਾਂ ਨਾਲ ਹੋਰ ਵਿਚਾਰ-ਵਟਾਂਦਰਾ ਕਰਨ ਦੀ ਲੋੜ ਹੈ।
