ਨਵੀਂ ਦਿੱਲੀ, 19 ਨਵੰਬਰ (ਪੀ. ਟੀ. ਆਈ.)-ਸੰਯੁਕਤ ਰਾਸ਼ਟਰ ਦੀ ਇਕ ਏਜੰਸੀ ਦੀ ਰਿਪੋਰਟ ਵਿਚ ਦੱਸਿਆ ਗਿਆ ਕਿ ਭਾਰਤ ਵਿਚ ਦੁਨੀਆ ਦੀ ਸਭ ਤੋਂ ਵੱਡੀ ਨੌਜਵਾਨ ਆਬਾਦੀ ਵਿਚੋਂ ਇਕ ਰਹਿੰਦੀ ਹੈ, ਜਿਥੇ ਹਰ ਚਾਰ ਭਾਰਤੀਆਂ ਵਿਚੋਂ ਇਕ ਤੋਂ ਵੱਧ ਵਿਅਕਤੀ 10-24 ਸਾਲ ਦੀ ਉਮਰ ਵਰਗ ਦੇ ਹਨ।ਸੰਯੁਕਤ ਰਾਸ਼ਟਰ ਜਨਸੰਖਿਆ ਫੰਡ (ਯੂ.ਐਨ.ਐਫ.ਪੀ.ਏ.) ਦੀ ‘ਸਟੇਟ ਆਫ਼ ਦ ਵਰਲਡ ਪਾਪੂਲੇਸ਼ਨ’ (ਵਿਸ਼ਵ ਆਬਾਦੀ ਦੀ ਸਥਿਤੀ) ਰਿਪੋਰਟ ਵਿਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਭਾਰਤ ਵਿਚ ਮਾਤਾ-ਪਿਤਾ ਬਣਨਾ ਅਜੇ ਵੀ ਇਕ ਪ੍ਰਮੁੱਖ ਇੱਛਾ ਹੈ; 35-39 ਸਾਲ ਦੀ ਉਮਰ ਦੇ ਲਗਭਗ 85 ਫ਼ੀਸਦੀ ਬੱਚੇ ਰਹਿਤ ਉੱਤਰਦਾਤਾਵਾਂ ਨੇ ਮਾਤਾ-ਪਿਤਾ ਬਣਨ ਦੀ ਇੱਛਾ ਪ੍ਰਗਟਾਈ ਹੈ।
ਰਿਪੋਰਟ ਅਨੁਸਾਰ ਭਾਰਤ ਦੀ ਆਬਾਦੀ 147.66 ਕਰੋੜ ਹੈ, ਅਤੇ ਇਹ 81 ਸਾਲਾਂ ਵਿਚ ਦੁੱਗਣੀ ਹੋ ਰਹੀ ਹੈ।ਭਾਰਤ ਦੀ ਆਬਾਦੀ ਵਿਚ 0-14 ਸਾਲ ਦੀ ਉਮਰ ਵਰਗ ਦੇ 24 ਫ਼ੀਸਦੀ, 10-19 ਸਾਲ ਦੇ 17 ਫ਼ੀਸਦੀ ਅਤੇ 10-24 ਸਾਲ ਦੀ ਉਮਰ ਵਰਗ ਦੇ 26 ਫ਼ੀਸਦੀ ਲੋਕ ਸ਼ਾਮਿਲ ਹਨ।ਇਸ ਤੋਂ ਇਲਾਵਾ, 15-64 ਸਾਲ ਦੀ ਉਮਰ ਵਰਗ ਦੇ ਲੋਕਾਂ ਦੀ ਹਿੱਸੇਦਾਰੀ 69 ਫ਼ੀਸਦੀ ਹੈ, ਜਦਕਿ 65 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ ਲੋਕਾਂ ਦੀ ਗਿਣਤੀ 8 ਫ਼ੀਸਦੀ ਹੈ।
ਰਿਪੋਰਟ ਵਿਚ ਭਾਰਤ ਵਿਚ ਪ੍ਰਤੀ ਔਰਤ ਪ੍ਰਜਨਨ ਦਰ 1.9 ਦੱਸੀ ਗਈ ਹੈ, ਅਤੇ ਜੀਵਨ ਸੰਭਾਵਨਾ ਪੁਰਸ਼ਾਂ ਲਈ 82 ਸਾਲ ਅਤੇ ਔਰਤਾਂ ਲਈ 85 ਸਾਲ ਦਰਜ ਕੀਤੀ ਗਈ ਹੈ।ਰਿਪੋਰਟ ਮੁਤਾਬਕ ਭਾਰਤ ਦੁਨੀਆ ਦੀ ਸਭ ਤੋਂ ਵੱਡੀ ਆਬਾਦੀ ਵਾਲਾ ਦੇਸ਼ ਹੈ, ਜਦਕਿ ਚੀਨ 141.29 ਕਰੋੜ ਦੀ ਆਬਾਦੀ ਨਾਲ ਦੂਜੇ ਸਥਾਨ ‘ਤੇ ਹੈ।