ਨਿਊਯਾਰਕ, 19 ਜੁਲਾਈ (ਰਾਜੂ ਸਾਹਿਬਾਜ਼ਪੁਰਾ)-ਅਮਰੀਕਾ ਦੇ ਪੈਨਸਿਲਵੇਨੀਆ ਸੂਬੇ ’ਚ ਭਾਰਤੀ ਮੂਲ ਦੇ 18 ਸਾਲਾ ਵਿਦਿਆਰਥੀ ਰੋਹਨ ਕਪੂਰ ਨੇ ਆਪਣੇ ਹਮਉਮਰ ਦੋਸਤ ਜੈਕ ਰਾਈਕਰਟ ਨਾਲ ਮਿਲ ਕੇ ਵਾਹਨਾਂ ’ਚੋਂ ਨਿਕਲਣ ਵਾਲੇ ਹਾਨੀਕਾਰਕ ਧੂੰਏਂ ਨੂੰ ਘਟਾਉਣ ਲਈ ਇਕ ਘੱਟ ਲਾਗਤ ਵਾਲਾ ਐਗਜ਼ੌਸਟ ਫਿਲਟਰ ਤਿਆਰ ਕਰਨ ਦਾ ਦਾਅਵਾ ਕੀਤਾ ਹੈ। ‘ਗੋ ਗ੍ਰੀਨ ਫਿਲਟਰ’ ਨਾਮਕ ਇਹ ਛੋਟਾ ਉਪਕਰਨ ਕਾਰ ਦੀ ਐਗਜ਼ੌਸਟ ਪਾਈਪ ਨਾਲ ਆਸਾਨੀ ਨਾਲ ਜੋੜਿਆ ਜਾ ਸਕਦਾ ਹੈ। ਦੋਵਾਂ ਹਾਈ ਸਕੂਲ ਵਿਦਿਆਰਥੀਆਂ ਵੱਲੋਂ ਤਿਆਰ ਕੀਤੇ ਗਏ ਇਸ ਫਿਲਟਰ ਵਿਚ ਮਾਈਕ੍ਰੋਐਲਗੀ, ਪਾਣੀ, ਐੱਲ.ਈ.ਡੀ. ਲਾਈਟਾਂ ਤੇ ਕਈ ਪਰਤਾਂ ਵਾਲੀ ਵਿਸ਼ੇਸ਼ ਜਾਲੀ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਵਿਚ ਜੀਵਤ ਸੂਖਮ ਕਾਈ ਵਾਲੇ ਬਾਇਓ-ਕੈਪਸੂਲ ਲਗਾਏ ਗਏ ਹਨ, ਜਿਨ੍ਹਾਂ ਦਾ ਕੰਮ ਵਾਹਨ ਦੇ ਧੂੰਏਂ ’ਚ ਮੌਜੂਦ ਕਾਰਬਨ ਡਾਈਆਕਸਾਈਡ ਅਤੇ ਕੁਝ ਹੋਰ ਪ੍ਰਦੂਸ਼ਕਾਂ ਨੂੰ ਸੋਖਣਾ ਹੈ। ਵਿਦਿਆਰਥੀਆਂ ਮੁਤਾਬਕ ਉਨ੍ਹਾਂ ਦੇ ਮੁੱਢਲੇ ਟੈਸਟਾਂ ਦੌਰਾਨ ਵਾਹਨ ਦੇ ਕਾਰਬਨ ਨਿਕਾਸ ’ਚ 74 ਫ਼ੀਸਦੀ ਤੱਕ ਕਮੀ ਦਰਜ ਕੀਤੀ ਗਈ ਤੇ ਉਪਕਰਨ ਵਿਚੋਂ ਮਾਪਣਯੋਗ ਮਾਤਰਾ ਵਿਚ ਆਕਸੀਜਨ ਵੀ ਨਿਕਲੀ। ਵੱਖ-ਵੱਖ ਰਿਪੋਰਟਾਂ ਵਿੱਚ ਇਸ ਫਿਲਟਰ ਨੂੰ ਤਿਆਰ ਕਰਨ ਦੀ ਲਾਗਤ ਲਗਭਗ 30 ਤੋਂ 50 ਡਾਲਰ ਦਰਮਿਆਨ ਦੱਸੀ ਗਈ ਹੈ।
