ਨਵੀਂ ਦਿੱਲੀ, 17 ਜੁਲਾਈ (ਪੀ.ਟੀ.ਆਈ.)-ਵਿਸ਼ਵ ਚੈਂਪੀਅਨ ਡੀ ਗੁਕੇਸ਼, ਆਰ ਪ੍ਰਗਿਆਨੰਧਾ, ਤੇ ਦਿਵਿਆ ਦੇਸ਼ਮੁਖ 46ਵੇਂ ਓਲੰਪੀਆਡ ਦੇ ਨਾਲ ਸਤੰਬਰ ’ਚ ਉਜ਼ਬੇਕਿਸਤਾਨ ਦੇ ਸਮਰਕੰਦ ਵਿਚ ਹੋਣ ਵਾਲੇ ਪਹਿਲੇ ‘ਫੀਡੇ’ ਐਕਸੀਲੈਂਸ ਅਵਾਰਡਾਂ ਵਿਚ ਸਰਬੋਤਮ ਸ਼ਤਰੰਜ ਖਿਡਾਰੀ ਦੇ ਸਨਮਾਨ ਲਈ ਮੁਕਾਬਲਾ ਕਰਨ ਵਾਲੇ ਭਾਰਤੀ ਖਿਡਾਰੀਆਂ ਵਿੱਚੋਂ ਹਨ। ਗੁਕੇਸ਼, ਪ੍ਰਗਿਆਨੰਧਾ, ਤੇ ਅਰਜੁਨ ਏਰੀਗੇਸੀ ਵਿਸ਼ਵ ਦੇ ਨੰਬਰ ਇਕ ਮੈਗਨਸ ਕਾਰਲਸਨ ਦੇ ਨਾਲ ਸਰਬੋਤਮ ਪੁਰਸ਼ ਖਿਡਾਰੀ ਦੇ ਪੁਰਸਕਾਰ ਲਈ ਨਾਮਜ਼ਦ 10 ਖਿਡਾਰੀਆਂ ਵਿੱਚੋਂ ਹਨ। ਵਿਸ਼ਵ ਕੱਪ ਜੇਤੂ ਦਿਵਿਆ, 2 ਵਾਰ ਦੀ ਵਿਸ਼ਵ ਰੈਪਿਡ ਚੈਂਪੀਅਨ ਕੋਨੇਰੂ ਹੰਪੀ ਤੇ ਮਹਿਲਾ ਕੈਂਡੀਡੇਟਸ ਟੂਰਨਾਮੈਂਟ ਜੇਤੂ ਆਰ. ਵੈਸ਼ਾਲੀ ਸਰਬੋਤਮ ਮਹਿਲਾ ਖਿਡਾਰੀ ਪੁਰਸਕਾਰ ਲਈ ਨਾਮਜ਼ਦ ਭਾਰਤੀ ਖਿਡਾਰੀਆਂ ਵਿਚੋਂ ਹਨ। ਗੁਕੇਸ਼ ਅਤੇ ਦਿਵਿਆ ਨੂੰ ਉਨ੍ਹਾਂ ਦੇ ਗਲੋਬਲ ਖਿਤਾਬਾਂ ਲਈ ‘ਸਰਬੋਤਮ ਸਫਲਤਾ ਪ੍ਰਦਰਸ਼ਨ’ ਸ਼੍ਰੇਣੀ ’ਚ ਵੀ ਨਾਮਜ਼ਦ ਕੀਤਾ ਗਿਆ ਹੈ।
