ਲੰਡਨ, 17 ਜੁਲਾਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਹੈਨਰੀ ਨੋਵਾਕ ਕਤਲ ਮਾਮਲੇ ‘ਚ ਉਮਰ ਕੈਦ ਦੀ ਸਜ਼ਾ ਭੁਗਤ ਰਹੇ ਵਿਕਰਮ ਦਿਗਵਾ ਅਤੇ ਉਸ ਦੇ ਭਰਾ ਗੁਰਪ੍ਰੀਤ ਸਿੰਘ ਦਿਗਵਾ ਦੀ ਪੁਲਿਸ ਵੈਨ ਵਿਚ ਹੋਈ ਆਪਸੀ ਗੱਲਬਾਤ ਨੂੰ ਬੀ ਬੀ ਸੀ ਨੇ ਜਨਤਕ ਕੀਤਾ ਹੈ। ਰਿਪੋਰਟ ਮੁਤਾਬਿਕ ਦੋਵਾਂ ਭਰਾਵਾਂ ਨੇ ਪੁਲਿਸ ਵੈਨ ਵਿਚ ਪੰਜਾਬੀ ਵਿਚ ਗੱਲਬਾਤ ਕੀਤੀ ਜਿਸ ਨੂੰ ਬਾਅਦ ਵਿਚ ਅਦਾਲਤੀ ਕਾਰਵਾਈ ਦੌਰਾਨ ਵਰਤਿਆ ਗਿਆ ਸੀ। ਉਸ ਦਾ ਦੋਭਾਸ਼ੀਏ ਦੀ ਮਦਦ ਨਾਲ ਅੰਗਰੇਜ਼ੀ ਵਿਚ ਅਨੁਵਾਦ ਕੀਤਾ ਗਿਆ। ਇਹ ਗੱਲਬਾਤ ਦੋਵਾਂ ਭਰਾਵਾਂ ਨੇ 5 ਦਸੰਬਰ 2025 ਨੂੰ ਪੁਲਿਸ ਸ਼ਟੇਸ਼ਨ ਤੋਂ ਅਦਾਲਤ ਵੱਲ ਜਾਂਦਿਆਂ ਕੀਤੀ। ਗੱਲਬਾਤ ਵਿਚ ਗੁਰਪ੍ਰੀਤ ਨੇ ਪੁਛਿਆ ਕਿ ਤੂੰ ਕੀ ਕੀਤਾ? ਕੀ ਤੂੰ ਸੱਚਮੁੱਚ ਕੀਤਾ ਵੀ ਸੀ? ਗੁਰਪ੍ਰੀਤ ਨੇ ਕਿਹਾ ਕਿ ਤੈਨੂੰ ਨਹੀਂ ਕਰਨਾ ਚਾਹੀਦਾ ਸੀ ਤਾਂ ਵਿਕਰਮ ਨੇ ਕਿਹਾ ਕਿ ਉਸ ਦੀ ਗਲਤੀ ਸੀ। ਗੁਰਪ੍ਰੀਤ ਨੇ ਇਹ ਵੀ ਪੁਛਿਆ ਕਿ ਤੂੰ ਕਿਹੜਾ ਹਥਿਆਰ ਵਰਤਿਆ ਸੀ? ਵਿਕਰਮ ਛੁਰਾ, ਤਾਂ ਗੁਰਪ੍ਰੀਤ ਕ੍ਰਿਪਾਨ ਕਹਿਣ ਲਈ ਵੀ ਆਖਦਾ ਹੈ, ਗੱਲਬਾਤ ਵਿੱਚ ਵਿਕਰਮ ਕਹਿੰਦਾ ਹੈ ਕਿ ਮੈਂ ਪੁਲਿਸ ਨੂੰ ਕ੍ਰਿਪਾਨ ਹੀ ਕਿਹਾ ਹੈ। ਦੋਵੇਂ ਜਣੇ ਆਪਣੇ ਪਰਿਵਾਰ ਦੇ ਬਚਾਅ ਦੀ ਗੱਲ ਵੀ ਕਰਦੇ ਹਨ। ਸਮੁੱਚਾ ਸਿੱਖ ਭਾਈਚਾਰਾ ਉਕਤ ਘਟਨਾਕ੍ਰਮ ਤੋਂ ਨਿਰਾਸ਼ ਹੈ ਅਤੇ ਇਸ ਮਾਮਲੇ ‘ਚ ਕ੍ਰਿਪਾਨ ਦੇ ਨਾਂਅ ਦੀ ਵਰਤੋਂ ਕਰਨ ’ਤੇ ਵੀ ਨਾਰਾਜ਼ਗੀ ਪ੍ਰਗਟ ਕਰ ਚੁੱਕਾ ਹੈ।
