ਰਾਮਾਂ ਮੰਡੀ, 31 ਮਾਰਚ (ਤਰਸੇਮ ਸਿੰਗਲਾ)-ਇਲਾਕੇ ਦੇ ਰਾਮਸਰਾ ਰੇਲਵੇ ਫਾਟਕ 'ਤੇ ਅੱਜ ਸ਼ਾਮ ਉਸ ਵੇਲੇ ਵਾਹਨਾਂ ਦੇ ਭਾਰੀ ਜਾਮ ਦੀ ਸਥਿਤੀ ਬਣ ਗਈ, ਜਦੋਂ ਇੱਕ ਮਾਲਗੱਡੀ ਕਰੀਬ ਦੋ ਘੰਟੇ ਤੱਕ ਫਾਟਕ ਦੇ ਵਿਚਕਾਰ ਹੀ ਖੜੀ ਰਹੀ | ਇਸ ਕਾਰਨ ਫਾਟਕ ਲਗਾਤਾਰ ਬੰਦ ਰਿਹਾ ਅਤੇ ਦੋਹਾਂ ਪਾਸੇ ਸੈਂਕੜਿਆਂ ਦੀ ਗਿਣਤੀ ਵਿਚ ਵਾਹਨ ਲੰਬੀਆਂ ਕਤਾਰਾਂ ਵਿਚ ਫਸੇ ਰਹੇ | ਉੱਪਰੋਂ ਵਰ੍ਹਦੇ ਮੀਂਹ ਨੇ ਹਾਲਾਤ ਹੋਰ ਵੀ ਬਦਤਰ ਕਰ ਦਿੱਤੇ | ਮੀਂਹ ਵਿਚ ਫਸੇ ਵਾਹਨ ਚਾਲਕਾਂ ਅਤੇ ਪੈਦਲ ਲੰਘਣ ਵਾਲੇ ਲੋਕਾਂ ਨੂੰ ਕਾਫ਼ੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ | ਕਈ ਚਾਲਕ ਆਪਣੀਆਂ ਜ਼ਰੂਰੀ ਮੰਜ਼ਿਲਾਂ 'ਤੇ ਸਮੇਂ 'ਤੇ ਨਹੀਂ ਪਹੁੰਚ ਸਕੇ, ਜਿਸ ਕਾਰਨ ਚਾਲਕਾਂ ਵਿਚ ਭਾਰੀ ਨਾਰਾਜ਼ਗੀ ਵੀ ਦੇਖਣ ਨੂੰ ਮਿਲੀ | ਵਾਹਨ ਚਾਲਕਾਂ ਨੇ ਦੱਸਿਆ ਕਿ ਇਸ ਦੌਰਾਨ ਰੇਲਵੇ ਵਿਭਾਗ ਦਾ ਕੋਈ ਵੀ ਜ਼ਿੰਮੇਵਾਰ ਅਧਿਕਾਰੀ ਮੌਕੇ 'ਤੇ ਨਹੀਂ ਪਹੁੰਚਿਆ, ਜਿਸ ਕਾਰਨ ਲੋਕਾਂ ਨੂੰ ਬਿਨਾਂ ਕਿਸੇ ਜਾਣਕਾਰੀ ਦੇ ਲੰਮਾ ਸਮਾਂ ਇੰਤਜ਼ਾਰ ਕਰਨਾ ਪਿਆ |