ਗਲਾਸਗੋ ’ਚ ਨਿਰਾਸ਼ਾਜਨਕ ਪ੍ਰਦਰਸ਼ਨ ਤੋਂ ਬਾਅਦ ਨਦੀਮ ਦੀ ਹੋ ਰਹੀ ਹੈ ਆਲੋਚਨਾ

ਲਾਹੌਰ, 2 ਅਗਸਤ (ਏਜੰਸੀ)-ਪਾਕਿਸਤਾਨ ਦੇ ਓਲੰਪਿਕ ਸੋਨ ਤਗਮਾ ਜੇਤੂ ਨੇਜੇਬਾਜ਼ ਅਰਸ਼ਦ ਨਦੀਮ ਨੂੰ ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ਵਿਚ ਨਿਰਾਸ਼ਾਜਨਕ ਪ੍ਰਦਰਸ਼ਨ ਤੋਂ ਬਾਅਦ ਆਲੋਚਨਾ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਨਦੀਮ ਗਲਾਸਗੋ ’ਚ 80 ਮੀਟਰ ਤੋਂ ਘੱਟ ਦੇ ਸਭ ਤੋਂ ਵਧੀਆ ਯਤਨ ਨਾਲ 9ਵੇਂ ਸਥਾਨ ’ਤੇ ਰਿਹਾ। ਸ੍ਰੀਲੰਕਾ ਦੇ ਰੋਮੇਸ਼ ਪਥੀਰਾਗੇ ਨੇ ਸੋਨ ਤਗਮਾ ਜਿੱਤਿਆ, ਜਦੋਂ ਕਿ ਭਾਰਤ ਦੇ ਨੀਰਜ ਚੋਪੜਾ ਅਤੇ ਯਸ਼ਵੀਰ ਸਿੰਘ ਨੇ ਕ੍ਰਮਵਾਰ ਚਾਂਦੀ ਅਤੇ ਕਾਂਸੀ ਦੇ ਤਗਮੇ ਜਿੱਤੇ। ਇਸ ਨਤੀਜੇ ਨੂੰ ਅਚਾਨਕ ਨਹੀਂ ਮੰਨਿਆ ਜਾ ਸਕਦਾ, ਕਿਉਂਕਿ ਅਰਸ਼ਦ ਨੇ 2026 ਰਾਸ਼ਟਰਮੰਡਲ ਖੇਡਾਂ ਦੀ ਤਿਆਰੀ ਦੇ ਹਿੱਸੇ ਵਜੋਂ ਸਵਿਟਜ਼ਰਲੈਂਡ ’ਚ ਸਿਰਫ ਇਕ ਮੁਕਾਬਲੇ ’ਚ ਹਿੱਸਾ ਲਿਆ ਸੀ। ਇਸ ਤੋਂ ਇਲਾਵਾ, ਉਸਨੇ ਆਪਣਾ ਜ਼ਿਆਦਾਤਰ ਸਮਾਂ ਲਾਹੌਰ ਦੇ ਗਰਮ ਮਾਹੌਲ ’ਚ ਕਿਸੇ ਵਿਦੇਸ਼ੀ ਕੋਚ ਜਾਂ ਟ੍ਰੇਨਰ ਦੀ ਸਿੱਧੀ ਨਿਗਰਾਨੀ ਤੋਂ ਬਿਨਾਂ ਸਿਖਲਾਈ ਵਿੱਚ ਬਿਤਾਇਆ। ਪਹਿਲਾਂ ਦੱਖਣੀ ਅਫ਼ਰੀਕੀ ਕੋਚ ਟੇਰਸੀਅਸ ਲੀਬੇਨਬਰਗ ਦੇ ਅਧੀਨ ਸਿਖਲਾਈ ਲੈਣ ਤੋਂ ਬਾਅਦ, ਅਰਸ਼ਦ ਨੇ ਇਸ ਵਾਰ ਆਪਣੇ ਸਥਾਨਕ ਕੋਚ ਸਲਮਾਨ ਬੱਟ ਤੇ ਸਥਾਨਕ ਟ੍ਰੇਨਰਾਂ ਨਾਲ ਤਿਆਰੀ ਕੀਤੀ।