ਨੌਸ਼ਹਿਰਾ ਪਨੂੰਆ, 8 ਜੁਲਾਈ(ਦੀਪਕ ਮੈਣੀ)-ਸਥਾਨਕ ਪਿੰਡ ਦੀ ਅਬਾਦੀ ਨੌ ਹਜ਼ਾਰ ਦੇ ਕਰੀਬ ਹੈ। ਪੰਚਾਇਤ ਕੋਲ ਪਹਿਲਾਂ 45 ਏਕੜ ਜ਼ਮੀਨ ਸੀ। ਪੰਜਾਬ ਸਰਕਾਰ ਵਲੋਂ ਆਦਰਸ਼ ਸਕੂਲ, ਖੇਡ ਗਰਾਊਂਡ, ਮਾਰਕਫੈਡ ਦੀ ਫੈਕਟਰੀ ਅਤੇ ਹੋਰ ਵੱਖ ਵੱਖ ਦਫ਼ਤਰਾ ਲਈ ਜ਼ਮੀਨ ਐਕਵਾਇਰ ਕਰਨ ਕਰਕੇ ਇਸ ਸਮੇਂ ਵੀਹ ਤੋਂ 25 ਏਕੜ ਜ਼ਮੀਨ ਪੰਚਾਇਤ ਕੋਲ ਹੁਣ ਵੀ ਹੈ। ਪੰਚਾਇਤ ਕੋਲ ਅਪਣੀ ਜ਼ਮੀਨ ਤੋਂ ਇਲਾਵਾ ਕਾਫੀ ਸ਼ਾਮਲਾਟ ਜ਼ਮੀਨ ਹੋਣ ਦੇ ਬਾਵਜੂਦ ਪਿੰਡ ਵਾਸੀਆਂ ਨੂੰ ਕੂੜੇ ਦਾ ਡੰਪ ਨਸੀਬ ਨਹੀਂ ਹੋ ਸਕਿਆ। ਪਿਛਲੇ ਸਾਲ ਸਰਕਾਰ ਵਲੋਂ ਪਿੰਡਾਂ ਵਿਚ ਗਿੱਲੇ ਤੇ ਸੁੱਕੇ ਕੂੜੇ ਦੀ ਸਾਂਭ ਸੰਭਾਲ ਲਈ ਡੰਪ ਬਣਾਉਣ ਦੀ ਸਕੀਮ ਸ਼ੁਰੂ ਕੀਤੀ ਗਈ। ਸਥਾਨਕ ਪੰਚਾਇਤ ਦੇ ਸੈਕਟਰੀ ਵਲੋਂ ਪਿੰਡ ਦੇ ਮੁਹਤਬਰਾਂ ਨਾਲ ਬਿਨਾਂ ਸਲਾਹ ਮਸ਼ਵਰਾ ਕੀਤੇ ਖੇਡ ਗਰਾਊਂਡ ਦੇ ਮੁੱਖ ਗੇਟ ’ਤੇ ਡੰਪ ਬਣਾਉਣਾ ਸ਼ੁਰੂ ਕਰ ਦਿੱਤਾ, ਜਿਸ ਦਾ ਪਿੰਡ ਵਾਸੀਆਂ ਵਲੋਂ ਵੱਡੇ ਪੱਧਰ ’ਤੇ ਵਿਰੋਧ ਕਰਨ ’ਤੇ ਡੰਪ ਨਾ ਬਣ ਸਕਿਆ। ਵਿਭਾਗ ਵਲੋਂ ਵੀ ਦੁਬਾਰਾ ਕਿਸੇ ਥਾਂ ਡੰਪ ਨਹੀਂ ਬਣਾਇਆ ਗਿਆ। ਪਿੰਡ ਦੇ ਹਰੇਕ ਰਸਤੇ ਤੇ ਕੂੜੇ ਦੇ ਢੇਰ ਦਿਖਾਈ ਦਿੰਦੇ ਹਨ। ਤੇਜ਼ ਹਵਾਵਾਂ ਹਨੇਰੀ ਚੱਲਣ ’ਤੇ ਕੂੜਾ ਉੱਡ ਕੇ ਵਾਪਸ ਘਰਾਂ ਹਵੇਲੀਆਂ ਵਿਚ ਵੜ ਜਾਂਦਾ ਹੈ। ਪਿੰਡ ਦੇ ਮੁਹਤਬਰਾਂ ਵਲੋਂ ਸਮੇਂ ਸਮੇਂ ’ਤੇ ਉੱਚ ਅਧਿਕਾਰੀਆ ਨੂੰ ਮਿਲ ਕੇ ਜਾਂ ਚਿੱਠੀ ਪੱਤਰ ਰਾਹੀ ਕੂੜੇ ਦੀ ਸਾਂਭ ਸੰਭਾਲ ਦਾ ਪ੍ਰਬੰਧ ਕਰਨ ਲਈ ਕਿਹਾ ਗਿਆ। ਅਫਸਰਾਂ ਵਲੋਂ ਸਿਵਾਏ ਭਰੋਸਿਆਂ ਦੇ ਅੱਜ ਤੱਕ ਕੋਈ ਪ੍ਰਬੰਧ ਨਹੀਂ ਕੀਤਾ ਗਿਆ। ਪਿੰਡ ਵਾਸੀਆਂ ਵਲੋਂ ਪੰਜਾਬ ਸਰਕਾਰ ਤੋਂ ਮੰਗ ਹੈ ਕਿ ਕੂੜੇ ਦੀ ਸੰਭਾਲ ਲਈ ਯੋਗ ਪ੍ਰਬੰਧ ਕੀਤੇ ਜਾਣ।
