ਚੱਬੇਵਾਲ, 26 ਮਾਰਚ (ਰਾਜੀਵ ਭਾਰਦਵਾਜ)-ਚੱਬੇਵਾਲ ਵਿਚ ਦੋ ਪੈਟਰੋਲ ਪੰਪਾਂ ਵਿਚੋਂ ਇਕ 'ਤੇ ਲੋਕਾਂ ਦੀ ਪੈਟਰੋਲ ਅਤੇ ਡੀਜ਼ਲ ਲੈਣ ਵਾਲਿਆਂ ਦੀਆਂ ਲਾਈਨਾਂ ਲੱਗੀਆਂ ਰਹੀਆਂ ਅਤੇ ਦੂਸਰੇ ਨੇ ਬਾਹਰ ਰੱਸੀ ਲਗਾ ਕੇ ਗੱਡੀਆਂ ਦਾ ਆਉਣਾ ਜਾਣਾ ਬੰਦ ਕਰ ਦਿੱਤਾ | ਇਸ ਸੰਬੰਧੀ ਕਿਸਾਨ ਪਰਮਿੰਦਰ ਸਿੰਘ ਚੱਬੇਵਾਲ, ਰਸ਼ਪਾਲ ਸਿੰਘ ਝੂਟੀ, ਜਤਿੰਦਰ ਸਿੰਘ ਹਾਰਟਾ, ਸਿਮਰਨਜੀਤ ਸਿੰਘ, ਦਿਲਬਾਗ ਸਿੰਘ ਝੂਟੀ, ਸੁਖਦੀਪ ਸਿੰਘ ਪੱਟੀ, ਕੁਲਵਿੰਦਰ ਸਿੰਘ ਚੱਕ ਮੱਲ੍ਹਾ ਆਦਿ ਨੇ ਕਿਹਾ ਕਿ ਇੱਕ ਹਫ਼ਤੇ ਬਾਅਦ ਕਣਕ ਦਾ ਸੀਜ਼ਨ ਸ਼ੁਰੂ ਹੋਣ ਵਾਲਾ ਹੈ ਅਤੇ ਜੇਕਰ ਡੀਜ਼ਲ ਦੀ ਜਰਾ ਵੀ ਕਿੱਲਤ ਆਈ ਤਾਂ ਕਿਸਾਨਾਂ ਦਾ ਬਹੁਤ ਵੱਡਾ ਨੁਕਸਾਨ ਹੋਵੇਗਾ | ਕਣਕਾਂ ਦੀ ਵਢਾਈ ਤੋਂ ਲੈ ਕੇ ਤੂੜੀ ਤੱਕ ਦੀ ਸਾਰਾ ਕੰਮ ਡੀਜ਼ਲ ਤੇ ਨਿਰਭਰ ਕਰਦਾ ਹੈ | ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਲਗਾਤਾਰ ਕਿਹਾ ਜਾ ਰਿਹਾ ਹੈ ਕਿ ਡੀਜ਼ਲ ਅਤੇ ਪੈਟਰੋਲ ਦੀ ਕੋਈ ਕਮੀ ਨਹੀਂ ਹੈ ਅਤੇ ਫਿਰ ਪੈਟਰੋਲ ਪੰਪਾਂ ਤੇ ਇਸ ਤਰਾਂ ਖੱਜਲ ਖ਼ੁਆਰੀ ਨਹੀਂ ਹੋਣੀ ਚਾਹੀਦੀ |
