ਕੋ-ਆਪ੍ਰੇਟਿਵ ਸੁਸਾਇਟੀ ਦਾ ਸੈਕਟਰੀ ਫ਼ਰਲੋ 'ਤੇ ਖਾਦਾਂ ਲੈਣ ਵਾਲੇ ਕਿਸਾਨ ਪ੍ਰੇਸ਼ਾਨ <br/>

ਭੁੱਚੋ ਮੰਡੀ, 20 ਨਵੰਬਰ (ਬਿੱਕਰ ਸਿੰਘ ਸਿੱਧੂ)-ਕਣਕ ਦੀ ਬਿਜਾਈ ਜ਼ੋਰਾਂ ਸ਼ੋਰਾਂ 'ਤੇ ਚੱਲ ਰਹੀ ਹੋਣ ਦੇ ਬਾਵਜੂਦ ਕੋ ਅਪਰੇਟਿਵ ਸੁਸਾਇਟੀ ਸੇਮਾ ਦਾ ਸੈਕਟਰੀ ਕੰਮ ਦੇ ਦਿਨ ਦਫ਼ਤਰ ਬੰਦ ਕਰਕੇ ਫਰਲੋ 'ਤੇ ਚਲਾ ਜਾਂਦਾ ਹੈ ਅਤੇ ਖਾਦਾਂ ਵਗੈਰਾ ਖਰੀਦਣ ਵਾਲੇ ਕਿਸਾਨ ਪ੍ਰੇਸ਼ਾਨ ਹੋ ਰਹੇ ਹਨ | ਪਿੰਡ ਦੇ ਕਈ ਕਿਸਾਨਾਂ ਨੇ ਦੱਸਿਆ ਕਿ ਪੂਰੇ ਹਫ਼ਤੇ ਦੌਰਾਨ ਇਕ ਦੋ ਦਿਨ ਹੀ ਸੁਸਾਇਟੀ ਦਾ ਗੇਟ ਖੁੱਲ੍ਹਾ ਮਿਲਦਾ ਜ਼ਿਆਦਾਤਰ ਬੰਦ ਹੀ ਰਹਿੰਦਾ | ਕਈਆਂ ਦਾ ਕਹਿਣਾ ਹੈ ਕਿ ਬਹੁਤ ਸਾਰੇ ਪਿੰਡ ਵਾਸੀ ਕਰਿਆਨੇ ਦਾ ਸਮਾਨ ਵੀ ਪਿੰਡ ਦੀ ਸੁਸਾਇਟੀ ਤੋਂ ਹੀ ਲੈਂਦੇ ਹਨ, ਉਨ੍ਹਾਂ ਨੂੰ ਵੀ ਖੱਜਲ ਹੋਣਾ ਪੈ ਰਿਹਾ ਹੈ | ਕੁਝ ਬੀਬੀਆਂ ਦਾ ਕਹਿਣਾ ਸੀ ਕਿ ਜਦ ਵੀ ਕੋਈ ਘਰੇਲੂ ਸਾਮਾਨ ਜਿਵੇਂ ਚਾਹ ਪੱਤੀ, ਖੰਡ, ਗੁੜ ਜਾਂ ਕੋਈ ਹੋਰ ਸਮਾਨ ਲੈਣ ਆਉਂਦੀਆਂ ਹਨ ਤਾਂ ਗੇਟ ਬੰਦ ਵੇਖ ਨਿਰਾਸ਼ ਹੋ ਕੇ ਮੁੜਨਾ ਪੈਂਦਾ ਹੈ | ਜਦੋਂ ਸੈਕਟਰੀ ਨਾਲ ਮੋਬਾਇਲ 'ਤੇ ਗੱਲ ਕੀਤੀ ਗਈ ਕਿ ਕੀ ਅੱਜ ਛੁੱਟੀ ਹੈ ਸੁਸਾਇਟੀ ਦਾ ਦਫ਼ਤਰ ਬੰਦ ਕਿਉਂ ਹੈ ਤਾਂ ਉਸ ਦਾ ਕਹਿਣਾ ਸੀ ਕਿ ਉਹ ਕਿਸੇ ਕੰਮ ਦੇ ਸਬੰਧ ਵਿਚ ਬਾਹਰ ਗਿਆ ਹੋਇਆ ਹੈ | ਸਮੂਹ ਪਿੰਡ ਵਾਸੀਆਂ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਸੁਸਾਇਟੀ ਦੇ ਸੈਕਟਰੀ ਦੀ ਹਾਜ਼ਰੀ ਯਕੀਨੀ ਬਣਾਈ ਜਾਵੇ |