ਭਾਈ ਵੀਰ ਸਿੰਘ ਸਾਹਿਤ ਸਦਨ ਨਵੀਂ ਦਿੱਲੀ ਵਲੋਂ ਡਾ. ਮੋਹਨਜੀਤ ਦੀ ਯਾਦ 'ਚ ਸਮਾਗਮ <br/>
ਅਜੀਤ ਡੈਸਕ
22-07-2025
ਡਾ. ਮੋਹਨਜੀਤ ਦੀ ਯਾਦ 'ਚ ਵਿਚਾਰ-ਚਰਚਾ ਦੌਰਾਨ ਸਭ ਤੋਂ ਪਹਿਲਾਂ ਉਨ੍ਹਾਂ ਦੀ ਪਤਨੀ ਕੁਲਦੀਪ ਕੌਰ ਨੇ ਵਿਆਹ ਤੋਂ ਲੈ ਕੇ ਅਖ਼ੀਰਲੇ ਸਮੇਂ ਤੱਕ ਦੀਆਂ ਪ੍ਰਮੁੱਖ ਯਾਦਾਂ ਨੂੰ ਸਾਂਝਾ ਕੀਤਾ | ਤਰਸੇਮ ਨੇ ਮੋਹਨਜੀਤ ਨੂੰ ਮੁਹੱਬਤੀ ਸੁਝਾਅ ਵਾਲੀ ਅਜਿਹੀ ਸ਼ਖ਼ਸੀਅਤ ਦੱਸਿਆ ਜੋ ਹਮੇਸ਼ਾ ਪੜ੍ਹਨ ਅਧਿਐਨ ਨਾਲ ਜੁੜੇ ਰਹੇ | ਡਾ. ਕੁਲਵੀਰ ਗੋਜਰਾ ਨੇ ਮੋਹਨਜੀਤ ਨੂੰ ਫ਼ਕੀਰਨੁਮਾ ਇਨਸਾਨ ਦੱੱਸਦਿਆਂ ਉਨ੍ਹਾਂ ਦੇ ਸਰੋਤੇ ਤੋਂ ਪਾਠਕ ਤੇ ਫਿਰ ਲੇਖਕ ਬਣਨ ਦੇ ਸਫ਼ਰ ਨੂੰ ਸਾਂਝਿਆਂ ਕੀਤਾ | ਸਤਪਾਲ ਭੀਖੀ ਨੇ ਡਾ. ਮੋਹਨਜੀਤ ਨਾਲ ਆਪਣੀਆਂ ਭਾਵਪੂਰਨ ਯਾਦਾਂ ਨੂੰ ਸਾਂਝਿਆਂ ਕਰਦਿਆਂ ਉਨ੍ਹਾਂ ਨੂੰ ਅਜਿਹੇ ਨਿਕਵਲੇ ਕਿਸਮ ਦੇ ਸ਼ਾਇਰ ਕਿਹਾ ਜਿਨ੍ਹਾਂ ਬਾਰੇ ਹਾਲੇ ਭਰਪੂਰ ਗੱਲ ਨਹੀਂ ਹੋਈ | ਮੁੰਬਈ ਤੋਂ ਪਹੁੰਚੇ ਡਾ. ਮੋਹਨਜੀਤ ਦੇ ਭਣੇਵੇਂ ਦੀਪਕ ਨੇ ਅਤੇ ਡਾ. ਮੋਹਨਜੀਤ ਦੇ ਬੇਟੇ ਨੀਲਾਂਬਰ ਤੇ ਸਨੇਹਅੰਬਰ ਨੇ ਆਪਣੇ ਪਰਿਵਾਰਕ ਅਨੁਭਵਾਂ ਨੂੰ ਸਾਂਝਾ ਕੀਤਾ | ਇਸ ਮੌਕੇ ਕਵਿਤ੍ਰੀਆਂ ਗਗਨਮੀਤ ਅਤੇ ਤਰਿੰਦਰ ਕੌਰ ਨੇ ਆਪਣੀਆਂ ਕਵਿਤਾਵਾਂ ਕ੍ਰਮਵਾਰ 'ਮੈਲੀ ਕੰਧ ਤੇ ਗੂੜੇ ਹਸਤਾਖ਼ਰ' ਅਤੇ 'ਡਾ. ਮੋਹਨਜੀਤ ਜੀ' ਰਾਹੀਂ ਉਨ੍ਹਾਂ ਨੂੰ ਕਾਵਿ-ਸ਼ਰਧਾਂਜਲੀ ਦਿੱਤੀ | ਉੱਘੇ ਨਾਟਕਕਾਰ ਡਾ. ਸਵਰਾਜਬੀਰ ਨੇ ਡਾ. ਮੋਹਨਜੀਤ ਨਾਲ 1985 ਤੋਂ ਉਨ੍ਹਾਂ ਨਾਲ ਬਿਤਾਏ ਪਲਾਂ ਨੂੰ ਸਰੋਤਿਆਂ ਨਾਲ ਸਾਂਝਾ ਕੀਤਾ | ਉਪਰੰਤ ਸਭਾ ਦੇ ਪ੍ਰਧਾਨ ਡਾ. ਵਨੀਤਾ ਨੇ ਬੁਲਾਰਿਆਂ ਦੀਆਂ ਡਾ. ਮੋਹਨਜੀਤ ਬਾਰੇ ਕਹੀਆਂ ਗੱਲਾਂ ਦਾ ਖ਼ੁਲਾਸਾ ਕਰਦਿਆਂ ਉਨ੍ਹਾਂ ਨੂੰ ਸੂਖ਼ਮ ਅਤੇ ਅਸਲੀ ਨਾਰੀਵਾਦੀ ਸ਼ਾਇਰ ਕਹਿੰਦਿਆਂ ਸੁਰਤੀ, ਬਿਰਤੀ, ਚਿੰਤਨ ਅਤੇ ਸਿਰਜਣਾ ਦੇ ਪੱਖ ਤੋਂ ਉਨ੍ਹਾਂ ਦੁਆਰਾ ਰਚੇ ਸਾਹਿਤ ਬਾਰੇ ਗੱਲ ਕੀਤੀ | ਪ੍ਰੋਗਰਾਮ ਦੇ ਅਖ਼ੀਰ ਵਿਚ ਸਦਨ ਦੀ ਖੋਜ ਵਿਦਿਆਰਥਣ ਹਰਮਨਮੀਤ ਕੌਰ ਨੇ ਸਦਨ ਵਲੋਂ ਪਹੁੰਚੇ ਵਕਤਿਆਂ ਤੇ ਸਰੋਤਿਆਂ ਦਾ ਤਹਿ ਦਿਲੋਂ ਸ਼ੁਕਰੀਆ ਅਦਾ ਕੀਤਾ | ਡਾ. ਮੋਹਨਜੀਤ ਦੇ ਪਰਿਵਾਰਕ ਮੈਂਬਰਾਂ, ਨਾਵਲਕਾਰ ਨਛੱਤਰ, ਡਾ. ਜਸਵਿੰਦਰ ਕੌਰ ਬਿੰਦਰਾ, ਡਾ. ਮਨੀਸ਼ਾ ਬੱਤਰਾ, ਡਾ. ਕਰਨਜੀਤ ਸਿੰਘ ਕੋਮਲ ਸਮੇਤ ਵੱਡੀ ਗਿਣਤੀ ਵਿਚ ਪਹੁੰਚੇ ਖੋਜ ਵਿਦਿਆਰਥੀਆਂ ਨੇ ਇਸ ਪ੍ਰੋਗਰਾਮ ਵਿਚ ਨਿੱਖੀ ਹਾਜ਼ਰੀ ਭਰੀ | ਡਾ. ਹਰਵਿੰਦਰ ਸਿੰਘ ਨੇ ਸਾਰੇ ਪ੍ਰੋਗਰਾਮ ਨੂੰ ਬਾਖ਼ੂਬੀ ਨਿਭਾਇਆ |