ਨਵੀਂ ਦਿੱਲੀ, 17 ਜੁਲਾਈ (ਮਿਸਰਦੀਪ ਭਾਟੀਆ)-ਦਿੱਲੀ ਦੇ ਲੱਖਾਂ ਬੱਸ ਯਾਤਰੀਆਂ ਨੂੰ ਬੱਸਾਂ ਦੀ ਘਾਟ ਕਾਰਨ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ | ਕਾਰਨ ਇਹ ਹੈ ਕਿ ਕਲੱਸਟਰ ਸਕੀਮ ਅਧੀਨ ਤਿੰਨ ਡਿਪੂਆਂ ਤੋਂ ਚੱਲਣ ਵਾਲੀਆਂ 533 ਬੱਸਾਂ ਨੂੰ ਬੁੱਧਵਾਰ ਤੋਂ ਇਕੋ ਸਮੇਂ ਸੜਕਾਂ ਤੋਂ ਹਟਾ ਦਿੱਤਾ ਗਿਆ ਹੈ | ਇਹ ਸਾਰੀਆਂ ਸੰਤਰੀ ਰੰਗ ਦੀਆਂ ਸਟੈਂਡਰਡ ਫਲੋਰ ਬੱਸਾਂ ਸਨ ਅਤੇ ਸੀ.ਐਨ.ਜੀ. ਨਾਲ ਚਲਦੀਆਂ ਸਨ | 10 ਸਾਲ ਤੋਂ ਵੱਧ ਪੁਰਾਣੀਆਂ ਹੋਣ ਕਰ ਕੇ ਇਨ੍ਹਾਂ ਨੂੰ ਹਟਾਇਆ ਗਿਆ ਹੈ | ਇਨ੍ਹਾਂ ਦੀ ਥਾਂ 'ਤੇ ਨਵੀਆਂ ਇਲੈਕਟਿ੍ਕ ਬੱਸਾਂ ਆਉਣਗੀਆਂ | ਫਿਲਹਾਲ, ਇੰਨੀ ਵੱਡੀ ਗਿਣਤੀ ਵਿਚ ਬੱਸਾਂ ਇਕੋ ਸਮੇਂ ਸੜਕਾਂ ਤੋਂ ਹਟਾਉਣ ਨਾਲ ਦਿੱਲੀ ਦੇ ਬੱਸ ਯਾਤਰੀਆਂ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ | ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਕੈਰ ਡਿਪੂ ਤੋਂ 295, ਸੀਮਾਪੁਰੀ ਡਿਪੂ ਤੋਂ 129 ਅਤੇ ਰਾਜਘਾਟ-3 ਡਿਪੂ ਤੋਂ 109 ਕਲੱਸਟਰ ਬੱਸਾਂ ਦਿੱਲੀ ਦੇ 56 ਵੱਖ-ਵੱਖ ਰੂਟਾਂ 'ਤੇ ਚਲਾਈਆਂ ਜਾ ਰਹੀਆਂ ਸਨ | ਇਨ੍ਹਾਂ ਵਿਚੋਂ ਬਹੁਤ ਸਾਰੇ ਰੂਟ ਦਿੱਲੀ ਦੇ ਦੂਰ-ਦੁਰਾਡੇ ਪੇਂਡੂ ਖੇਤਰਾਂ ਨੂੰ ਜੋੜਦੇ ਸਨ ਜਿੱਥੇ ਹੁਣ ਲੋਕਾਂ ਨੂੰ ਹੁਣ ਬੱਸਾਂ ਦੀ ਘਾਟ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ | ਹਾਲਾਂਕਿ ਦਿੱਲੀ ਸਰਕਾਰ ਦਾ ਦਾਅਵਾ ਹੈ ਕਿ ਡੀ.ਟੀ.ਸੀ. ਅਤੇ ਕਲੱਸਟਰ ਸਕੀਮ ਦੇ ਬੇੜੇ ਲਈ ਹੁਣ ਨਵੀਆਂ ਇਲੈਕਟਿ੍ਕ ਬੱਸਾਂ ਆ ਰਹੀਆਂ ਹਨ | ਨਾਲ ਹੀ ਹੁਣ 600 ਤੋਂ ਵੱਧ 'ਦੇਵੀ' ਬੱਸਾਂ ਵੀ ਚੱਲ ਰਹੀਆਂ ਹਨ | ਇਸ ਲਈ ਅਜਿਹੀ ਸਥਿਤੀ ਵਿਚ ਯਾਤਰੀਆਂ ਨੂੰ ਜ਼ਿਆਦਾ ਮੁਸ਼ਕਿਲਾਂ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ |
