ਬੋਹਾ, 19 ਨਵੰਬਰ (ਰਮੇਸ਼ ਤਾਂਗੜੀ)- ਸ਼ਹਿਰ ਦੇ ਵਾਰਡ ਨੰਬਰ 11, 12 'ਚ ਪ੍ਰੈੱਸ ਚੌਂਕ ਤੋਂ ਗਾਦੜ ਪੱਤੀ ਵੱਲ ਜਾਂਦੀ ਸੜਕ ਦੇ ਦੋਵੇਂ ਪਾਸੇ ਬਣੇ ਹੋਏ ਗੰਦੇ ਪਾਣੀ ਦੇ ਵੱਡੇ ਨਾਲੇ ਬੰਦ ਪਏ ਹਨ | ਗਾਦੜਾਂ ਦੀ ਆਬਾਦੀ ਦਾ ਅਥਾਹ ਪਾਣੀ ਇਨ੍ਹਾਂ ਨਾਲਿਆਂ ਰਾਹੀਂ ਅੱਗੇ ਸ਼ਹਿਰ ਵੱਲ ਨਿਕਲਦਾ ਕੀਤਾ ਹੋਇਆ ਹੈ | ਸੜਕ ਦੇ ਇਕ ਫ਼ਰਲਾਂਗ ਹਿੱਸੇ 'ਚ ਗੁਰਦੁਆਰਾ ਸਾਹਿਬ ਗਾਦੜਾਂ (ਸੰਗਤਸਰ ਸਾਹਿਬ), ਮਾਤਾ ਰਾਣੀ ਮੰਦਿਰ, ਦਰਗਾਹ ਪੀਰ ਗੁਲਾਬ ਸ਼ਾਹ ਆਦਿ 3 ਧਾਰਮਿਕ ਸਥਾਨ ਹਨ, ਜਿਨ੍ਹਾਂ ਅੱਗੇ ਸੜਕ 'ਤੇ ਕਦੇ ਝਾੜੂ ਵੀ ਨਹੀਂ ਫੇਰਿਆ ਜਾਂਦਾ | ਇਸ ਸੜਕ 'ਤੇ ਕਿਧਰੇ ਕੂੜਾਦਾਨ ਨਹੀਂ ਅਤੇ ਸਫ਼ਾਈ ਵੈਨ ਵੀ ਨੇੜਲੇ ਘਰਾਂ ਤੋਂ ਕੂੜਾ ਪਵਾ ਲਿਆਂਦੀ ਹੈ | ਸੜਕ 'ਤੇ ਬਣੇ ਦੋਵੇਂ ਨਾਲੇ ਨੀਵੇਂ ਹੋਣ ਕਰ ਕੇ ਡਾਫ ਲੱਗ ਜਾਂਦੀ ਹੈ, ਜਿਸ ਕਰ ਕੇ ਪਾਣੀ ਨਾਲੇ 'ਚ ਹੀ ਲੋਕਾਂ ਦੇ ਘਰਾਂ ਨਾਲ ਖੜ੍ਹ ਜਾਂਦਾ ਹੈ | ਇਸੇ ਕਰ ਕੇ ਬਹੁਤੇ ਮਕਾਨਾਂ ਦੀਆਂ ਨੀਂਹਾਂ 'ਚ ਤਰੇੜਾਂ ਆ ਗਈਆਂ ਹਨ | ਲੋਕਾਂ ਦੀ ਡਿਪਟੀ ਕਮਿਸ਼ਨਰ ਤੋਂ ਮੰਗ ਹੈ ਕਿ ਇਸ ਸੜਕ ਵੱਲ ਧਿਆਨ ਦਿੱਤਾ ਜਾਵੇ |