ਟੋਏ ਵਿਚ ਡੁੱਬਣ ਕਾਰਨ 5 ਸਾਲਾ ਬੱਚੇ ਦੀ ਮੌਤ

ਮਮਦੋਟ, 20 ਜੁਲਾਈ (ਰਾਜਿੰਦਰ ਸਿੰਘ ਹਾਂਡਾ)-ਮਮਦੋਟ ਬਲਾਕ ਦੇ ਪਿੰਡ ਲੱਖਾ ਸਿੰਘ ਵਾਲਾ ਹਿਠਾੜ ਵਿਖੇ ਪਾਣੀ ਨਾਲ ਭਰੇ ਟੋਏ ਵਿਚ ਡੁੱਬਣ ਕਾਰਨ ਕਰੀਬ ਪੰਜ ਸਾਲਾ ਬੱਚੇ ਦੀ ਮੌਤ ਹੋ ਗਈ | ਪ੍ਰਾਪਤ ਜਾਣਕਾਰੀ ਅਨੁਸਾਰ ਪਿੰਡ ਦੇ ਨਜ਼ਦੀਕ ਹੀ ਪਸ਼ੂਆਂ ਦੇ ਚਾਰੇ ਵਿਚ ਭਰਿਆ ਮੀਂਹ ਦਾ ਪਾਣੀ ਕਿਸਾਨ ਵਲੋਂ ਕੋਈ ਪੰਜ ਛੇ ਫੁੱਟ ਡੂੰਘਾ ਟੋਆ ਪੁੱਟ ਕੇ ਉਸ ਵਿਚ ਪਾਇਆ ਗਿਆ ਸੀ ਤਾਂ ਜੋ ਸਾਰਾ ਚਾਰਾ ਖ਼ਰਾਬ ਨਾ ਹੋਵੇ | ਟੋਆ ਪਿੰਡ ਦੇ ਰਿਹਾਇਸ਼ੀ ਇਲਾਕੇ ਦੇ ਨਜ਼ਦੀਕ ਹੋਣ ਕਾਰਨ ਦੁਪਹਿਰ ਵੇਲ ਜਦੋਂ ਪਰਿਵਾਰ ਸੁੱਤਾ ਪਿਆ ਸੀ ਤਾਂ 5 ਸਾਲਾਂ ਬੱਚਾ ਅਰਮਾਨ ਸਿੰਘ ਪੁੱਤਰ ਗੁਰਜੀਤ ਸਿੰਘ ਖੇਡਦੇ ਹੋਏ ਟੋਏ ਵਿਚ ਡਿਗ ਪਿਆ | ਜਿਸ ਦੀ ਪਾਣੀ ਵਿਚ ਡੁੱਬਣ ਨਾਲ ਮੌਤ ਹੋ ਗਈ | ਬੱਚੇ ਨੂੰ ਘਰ ਵਿਚ ਨਾਂ ਦੇਖ ਕੇ ਮਾਂ ਪਿਓ ਨੇ ਭਾਲ ਕੀਤੀ ਤਾਂ ਕਰੀਬ ਇਕ ਘੰਟੇ ਬਾਅਦ ਬੱਚਾ ਵਿਚ ਪਾਣੀਂ ਦੇ ਟੋਏ ਵਿਚੋਂ ਮਿਲਿਆ ਜੋ ਕਿ ਮਿ੍ਤਕ ਪਾਇਆ ਗਿਆ | ਇਸ ਘਟਨਾ ਨਾਲ ਸਮੁੱਚੇ ਪਿੰਡ ਵਿਚ ਸੋਗ ਦੀ ਲਹਿਰ ਪਾਈ ਜਾ ਰਹੀ ਹੈ |