ਖਰੜ, 27 ਦਸੰਬਰ (ਜੰਡਪੁਰੀ)-ਭਗਵਾਨ ਸ੍ਰੀ ਰਾਮ ਚੰਦਰ ਦੇ ਪੁਰਖਿਆਂ ਨਾਲ ਸੰਬੰਧਤ ਮਹਾਰਾਜਾ ਸਰੋਵਰ ਕਿਨਾਰੇ ਉਸਾਰੇ ਜਾ ਰਹੇ ਸ੍ਰੀ ਰਾਮ ਮੰਦਰ ਵਿਖੇ ਮੰਡਪਾ ਡੋਮ ਦਾ ਲੈਂਟਰ 4 ਜਨਵਰੀ ਨੂੰ ਪਾਇਆ ਜਾਵੇਗਾ | ਇਹ ਫ਼ੈਸਲਾ ਅੱਜ ਇਸ ਮੰਦਰ ਦੀ ਉਸਾਰੀ 'ਚ ਲੱਗੀ ਪ੍ਰਬੰਧਕੀ ਕਮੇਟੀ ਦੀ ਹੋਈ ਮੀਟਿੰਗ ਦੌਰਾਨ ਲਿਆ | ਇਸ ਮੌਕੇ ਅਨੰਦ ਬਾਂਸਲ, ਅਨਿਲ ਕਾਂਸਲ, ਦਵਿੰਦਰ ਗੁਪਤਾ, ਕੁਲਵੰਤ ਚੌਧਰੀ, ਜਤਿੰਦਰ ਅਰੋੜਾ, ਅਨੁਜ ਸੂਦ, ਜੀ. ਪੀ. ਧੀਮਾਨ, ਪ੍ਰਵੀਨ ਸ਼ਰਮਾ, ਡਾ. ਐਮ. ਐਸ. ਸੰਧੂ, ਵਿਨੈ ਸੂਦ, ਪ੍ਰੀਤੀ ਰਾਣਾ ਤੇ ਵਿਨੋਦ ਸਿੰਗਲਾ ਆਦਿ ਨੇ ਦੱਸਿਆ ਕਿ ਇਸ ਡੋਮ ਦੀ ਉਚਾਈ ਛੱਤ ਤੋਂ 35 ਫੁੱਟ ਹੋਵੇਗੀ, ਜਦਕਿ ਲੰਬਾਈ-ਚੌੜਾਈ 40-40 ਫੁੱਟ ਹੋਵੇਗੀ | ਲੈਂਟਰ 'ਚ ਲਗਪਗ 450 ਬੈਗ ਸੀਮਿੰਟ ਦੀ ਖਪਤ ਹੋਣ ਦੀ ਆਸ ਹੈ | ਉਨ੍ਹਾਂ ਦੱਸਿਆ ਕਿ 4 ਜਨਵਰੀ ਨੂੰ ਸ੍ਰੀ ਰਾਮ ਭਵਨ ਵਿਖੇ ਸਵੇਰੇ 10 ਵਜੇ ਇਕ ਸਮਾਗਮ ਕਰਵਾਇਆ ਜਾਵੇਗਾ, ਜਿਸ 'ਚ ਸਾਰੇ ਸ਼ਹਿਰ ਵਾਸੀ ਸ਼ਾਮਿਲ ਹੋਣਗੇ, ਉਪਰੰਤ ਹਰ ਸ਼ਹਿਰ ਨਿਵਾਸੀ ਇਸ ਲੈਂਟਰ 'ਚ ਕੰਕਰੀਟ ਪਾਵੇਗਾ | ਉਸ ਦਿਨ ਰਾਜਸੀ ਪਾਰਟੀਆਂ ਸਮੇਤ ਸਮਾਜਿਕ ਤੇ ਧਾਰਮਿਕ ਸੰਸਥਾਵਾਂ ਦੇ ਆਗੂ ਵੀ ਉਚੇਚੇ ਤੌਰ 'ਤੇ ਹਾਜ਼ਰੀ ਭਰਨਗੇ |
