ਨਵੀਂ ਦਿੱਲੀ, 17 ਜੁਲਾਈ (ਪੀ. ਟੀ. ਆਈ.)-ਚੋਣ ਕਮਿਸ਼ਨ ਨੇ ਹੁਣ ਤੱਕ ਪਾਇਆ ਹੈ ਕਿ ਬਿਹਾਰ 'ਚ 5.76 ਲੱਖ ਤੋਂ ਵੱਧ ਵੋਟਰ ਕਈ ਥਾਵਾਂ 'ਤੇ ਨਾਮਜ਼ਦ ਹਨ, ਜਦੋਂਕਿ 12.55 ਲੱਖ ਤੋਂ ਵੱਧ ਦੀ ਮੌਤ ਹੋ ਗਈ ਹੈ | ਜਿਵੇਂ ਕਿ ਰਾਜ ਦੀ ਵੋਟਰ ਸੂਚੀ ਦੀ ਵਿਸ਼ੇਸ਼ ਤੀਬਰ ਸੋਧ (ਐਸ. ਆਈ. ਆਰ.) ਜਾਰੀ ਹੈ, ਅਧਿਕਾਰਤ ਡੇਟਾ ਇਹ ਵੀ ਦੱਸਦਾ ਹੈ ਕਿ ਲਗਭਗ 7.90 ਕਰੋੜ ਵੋਟਰਾਂ 'ਚੋਂ ਬੂਥ ਪੱਧਰ ਦੇ ਅਧਿਕਾਰੀਆਂ ਦੇ ਘਰ-ਘਰ ਦੌਰੇ ਦੌਰਾਨ 35.69 ਲੱਖ ਤੋਂ ਵੱਧ ਵੋਟਰ ਉਨ੍ਹਾਂ ਦੇ ਪਤਿਆਂ 'ਤੇ ਨਹੀਂ ਮਿਲੇ | ਅੰਕੜਿਆਂ ਅਨੁਸਾਰ 17.37 ਲੱਖ ਤੋਂ ਵੱਧ ਵੋਟਰ ਸ਼ਾਇਦ ਸਥਾਈ ਤੌਰ 'ਤੇ ਤਬਦੀਲ ਹੋ ਗਏ ਹਨ | ਚੋਣ ਅਥਾਰਟੀ ਨੇ ਰੇਖਾਂਕਿਤ ਕੀਤਾ ਕਿ ਆਉਣ ਵਾਲੇ ਦਿਨਾਂ 'ਚ ਅੰਕੜੇ ਬਦਲ ਜਾਣਗੇ | ਚੋਣ ਕਮਿਸ਼ਨ ਨੇ 14 ਜੁਲਾਈ ਨੂੰ ਕਿਹਾ ਸੀ ਕਿ ਬਿਹਾਰ ਦੇ ਕੁੱਲ 7.89 ਕਰੋੜ ਵੋਟਰਾਂ 'ਚੋਂ 6.60 ਕਰੋੜ ਤੋਂ ਵੱਧ ਜਾਂ 83.66 ਫ਼ੀਸਦੀ ਦੇ ਨਾਂਅ 1 ਅਗਸਤ ਨੂੰ ਪ੍ਰਕਾਸ਼ਿਤ ਹੋਣ ਵਾਲੀ ਡਰਾਫਟ ਵੋਟਰ ਸੂਚੀ 'ਚ ਸ਼ਾਮਿਲ ਕੀਤੇ ਜਾਣਗੇ | ਸੂਚੀ 'ਚ ਉਹ ਸਾਰੇ ਵੋਟਰ ਸ਼ਾਮਿਲ ਹੋਣਗੇ, ਜਿਨ੍ਹਾਂ ਦੇ ਫਾਰਮ ਆਖਰੀ ਮਿਤੀ ਤੱਕ ਪ੍ਰਾਪਤ ਹੋ ਚੁੱਕੇ ਹਨ | ਅਖ਼ਬਾਰਾਂ ਦੇ ਇਸ਼ਤਿਹਾਰਾਂ ਰਾਹੀਂ ਅਤੇ ਸਿੱਧੇ ਸੰਪਰਕ ਰਾਹੀਂ ਉਨ੍ਹਾਂ ਵੋਟਰਾਂ ਨਾਲ ਕੇਂਦਰਿਤ ਯਤਨ ਕੀਤੇ ਜਾ ਰਹੇ ਹਨ, ਜੋ ਅਸਥਾਈ ਤੌਰ 'ਤੇ ਰਾਜ ਤੋਂ ਬਾਹਰ ਚਲੇ ਗਏ ਹੋ ਸਕਦੇ ਹਨ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਉਹ ਸਮੇਂ ਸਿਰ ਆਪਣੇ ਗਣਨਾ ਫਾਰਮ (56) ਭਰ ਸਕਣ ਅਤੇ ਉਨ੍ਹਾਂ ਦੇ ਨਾਂਅ ਵੀ ਡਰਾਫਟ ਸੂਚੀ 'ਚ ਸ਼ਾਮਿਲ ਕੀਤੇ ਜਾਣ |
