ਏਸ਼ਿਆਈ ਖੇਡਾਂ ਕੱਲ੍ਹ ਤੋਂ

ਜਲੰਧਰ, 17 ਸਤੰਬਰ (ਡਾ. ਜਤਿੰਦਰ ਸਾਬੀ)-ਏਸ਼ਿਆਈ ਖੇਡਾਂ ਦੇ ਇਤਿਹਾਸ ਵਿਚ ਭਾਰਤ ਦੀ ਲਗਾਤਾਰ ਵਧ ਰਹੀ ਖੇਡ ਤਾਕਤ ਨੂੰ ਅੱਗੇ ਲਿਜਾਣ ਲਈ ਭਾਰਤੀ ਖਿਡਾਰੀ ਇਕ ਵਾਰ ਫਿਰ ਵੱਡੇ ਮੰਚ ’ਤੇ ਆਪਣੀ ਕਾਬਲੀਅਤ ਦਾ ਪ੍ਰਦਰਸ਼ਨ ਕਰਨ ਲਈ ਤਿਆਰ ਹਨ। ਜਪਾਨ ਦੇ ਆਈਚੀ-ਨਾਗੋਆ ਵਿਚ 19 ਸਤੰਬਰ ਤੋਂ ਸ਼ੁਰੂ ਹੋਣ ਵਾਲੀਆਂ ਏਸ਼ਿਆਈ ਖੇਡਾਂ-2026 ਵਿਚ ਖੇਡਾਂ ਦੀ ਗਿਣਤੀ ਤਾਂ ਵਧੀ ਹੈ ਪਰ ਤਗ਼ਮਿਆਂ ਦੇ ਮੁਕਾਬਲੇ ਪਿਛਲੀਆਂ ਏਸ਼ਿਆਈ ਖੇਡਾਂ ਨਾਲੋਂ ਘੱਟ ਹੋਣ ਕਾਰਨ ਹਰ ਮੁਕਾਬਲਾ ਹੋਰ ਵੀ ਮਹੱਤਵਪੂਰਨ ਬਣ ਗਿਆ ਹੈ।ਆਈਚੀ-ਨਾਗੋਆ ਏਸ਼ਿਆਈ ਖੇਡਾਂ ਵਿਚ 43 ਖੇਡਾਂ, 71 ਈਵੈਟਸ ਅਤੇ 469 ਤਗ਼ਮਾ ਮੁਕਾਬਲੇ ਹੋਣਗੇ। ਹਾਂਗਝੂ ਏਸ਼ਿਆਈ ਖੇਡਾਂ ਦੇ ਮੁਕਾਬਲੇ ਇਸ ਵਾਰ ਤਿੰਨ ਹੋਰ ਖੇਡਾਂ ਅਤੇ 10 ਹੋਰ ਈਵੈਟਸ ਸ਼ਾਮਲ ਕੀਤੀਆਂ ਗਈਆਂ ਹਨ, ਪਰ ਤਗ਼ਮਾ ਮੁਕਾਬਲੇ 12 ਘੱਟ ਹੋਣਗੇ। ਇਸ ਨਾਲ ਖਿਡਾਰੀਆਂ ਲਈ ਕੁਆਲੀਫਿਕੇਸ਼ਨ ਅਤੇ ਤਗ਼ਮੇ ਦੀ ਦੌੜ ਹੋਰ ਸਖ਼ਤ ਹੋਣ ਦੀ ਉਮੀਦ ਹੈ। ਆਈਚੀ-ਨਾਗੋਆ ਵਿਚ ਭਾਰਤ ਦੇ ਲਗਭਗ 501 ਖਿਡਾਰੀ ਦੇਸ਼ ਦੀ ਨੁਮਾਇੰਦਗੀ ਕਰਦੇ ਹੋਏ ਇਸ ਪ੍ਰਦਰਸ਼ਨ ਨੂੰ ਹੋਰ ਉੱਚਾਈ ਦੇਣ ਲਈ ਮੈਦਾਨ ਵਿਚ ਉਤਰਣਗੇ।