ਸੋਸ਼ਲ ਮੀਡੀਆ ’ ਤੇ ਸਿਆਸੀ ਨਾਰਾਜ਼ਗੀ ਜ਼ਾਹਰ ਕਰਨ ਦਾ ਰੁਝਾਨ ਵਧਿਆ ਆਗੂਆਂ ਦੇ ਬਿਆਨਾਂ ਮਗਰੋਂ ਵਰਕਰਾਂ ਵਿਚ ਵੀ ਛਿੜਦੀ ਹੈ ਪੋਸਟਾਂ ਦੀ ਜੰਗ ਗੁਰਵਿੰਦਰ ਸਿੰਘ ਔਲਖ

ਅ

ਅਜੀਤ ਡੈਸਕ 15-09-2026

ਪਟਿਆਲਾ, 14 ਸਤੰਬਰ-ਸਿਆਸੀ ਆਗੂਆਂ ਵਲੋਂ ਦਿੱਤੇ ਜਾਂਦੇ ਬਿਆਨਾਂ ਤੇ ਟਿੱਪਣੀਆਂ ਤੋਂ ਬਾਅਦ ਸੋਸ਼ਲ ਮੀਡੀਆ ’ਤੇ ਉਨ੍ਹਾਂ ਦੇ ਸਮਰਥਕਾਂ ਵਿਚਕਾਰ ਸ਼ਬਦੀ ਜੰਗ ਦਾ ਰੁਝਾਨ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਇਕ ਧਿਰ ਵਲੋਂ ਕੀਤੀ ਗਈ ਟਿੱਪਣੀ ਦਾ ਜਵਾਬ ਦੂਜੀ ਧਿਰ ਦੇ ਸਮਰਥਕਾਂ ਵਲੋਂ ਦਿੱਤੇ ਜਾਣ ਮਗਰੋਂ ਗੱਲ ਕਈ ਵਾਰ ਸਿਆਸੀ ਵਿਰੋਧ ਤੋਂ ਅੱਗੇ ਵਧ ਕੇ ਨਿੱਜੀ ਟਿੱਪਣੀਆਂ ਤੱਕ ਪਹੁੰਚ ਜਾਂਦੀ ਹੈ । ਸਿਆਸੀ ਆਗੂ ਵਲੋਂ ਕਿਸੇ ਮੁੱਦੇ ’ਤੇ ਬਿਆਨ ਦਿੱਤੇ ਜਾਣ ਤੋਂ ਬਾਅਦ ਉਸ ਦੇ ਸਮਰਥਕ ਸੋਸ਼ਲ ਮੀਡੀਆ ’ਤੇ ਆਪਣਾ ਪੱਖ ਰੱਖਦੇ ਹਨ । ਇਸ ਦੇ ਜਵਾਬ ਵਿਚ ਵਿਰੋਧੀ ਧਿਰ ਨਾਲ ਸੰਬੰਧਿਤ ਵਰਕਰ ਵੀ ਪੋਸਟਾਂ ਅਤੇ ਟਿੱਪਣੀਆਂ ਰਾਹੀਂ ਜਵਾਬ ਦੇਣ ਲੱਗ ਪੈਂਦੇ ਹਨ। ਇਕ ਪੋਸਟ ਤੋਂ ਸ਼ੁਰੂ ਹੋਈ ਇਹ ਤਕਰਾਰ ਕੁਝ ਹੀ ਸਮੇਂ ਵਿਚ ਕਈ ਪੋਸਟਾਂ ਅਤੇ ਜਵਾਬੀ ਟਿੱਪਣੀਆਂ ਦਾ ਰੂਪ ਧਾਰ ਲੈਂਦੀ ਹੈ। ਸੋਸ਼ਲ ਮੀਡੀਆ ’ਤੇ ਸ਼ੁਰੂ ਹੋਈ ਬਹਿਸ ਕਈ ਵਾਰ ਸਿਆਸੀ ਧੜਿਆਂ ਵਿਚਕਾਰ ਆਹਮੋ-ਸਾਹਮਣੇ ਦੀ ਸਥਿਤੀ ਵੀ ਪੈਦਾ ਕਰ ਦਿੰਦੀ ਹੈ। ਖ਼ਾਸ ਕਰਕੇ ਤਿੱਖੀ ਅਤੇ ਅਪਮਾਨਜਨਕ ਭਾਸ਼ਾ ਸਿਆਸੀ ਵਿਰੋਧ ਨੂੰ ਹੋਰ ਤਲਖ਼ ਬਣਾਉਣ ਦਾ ਕਾਰਨ ਬਣਦੀ ਹੈ। ਸਿਆਸੀ ਵਿਰੋਧ ਲੋਕਤੰਤਰ ਦਾ ਹਿੱਸਾ ਹੈ ਤੇ ਵੱਖ-ਵੱਖ ਵਿਚਾਰਾਂ ’ਤੇ ਬਹਿਸ ਹੋਣੀ ਵੀ ਜ਼ਰੂਰੀ ਹੈ ਪਰ ਜੇਕਰ ਬਹਿਸ ਦਾ ਕੇਂਦਰ ਲੋਕ ਮਸਲਿਆਂ, ਨੀਤੀਆਂ ਅਤੇ ਸਰਕਾਰ ਦੀ ਕਾਰਗੁਜ਼ਾਰੀ ਦੀ ਥਾਂ ਇਕ-ਦੂਜੇ ’ਤੇ ਨਿੱਜੀ ਹਮਲੇ ਬਣ ਜਾਣ ਤਾਂ ਇਸ ਨਾਲ ਸਿਆਸੀ ਮਾਹੌਲ ਵਿਚ ਤਣਾਅ ਵਧਣਾ ਸੁਭਾਵਿਕ ਹੈ। ਸੋਸ਼ਲ ਮੀਡੀਆ ’ਤੇ ਸਿਆਸੀ ਸਰਗਰਮੀ ਵਧਣ ਦੇ ਨਾਲ ਵਰਕਰਾਂ ਵਲੋਂ ਸੰਜਮ ਵਰਤਣ ਦੀ ਲੋੜ ਵੀ ਉੱਭਰ ਕੇ ਸਾਹਮਣੇ ਆ ਰਹੀ ਹੈ।

ਪਿਛਲੀ ਖ਼ਬਰ ਪੰਜਾਬ ਦੇ ਹਰ ਵਿਦਿਆਰਥੀ ਲਈ ਇਤਿਹਾਸ ਤੇ ਸੱਭਿਆਚਾਰ ਦਾ ਕੋਰਸ ਕਰਨਾ ਲਾਜ਼ਮੀ ਕੀਤਾ ਜਾਵੇ-ਕੇ.ਬੀ.ਐਸ. ਸਿੱਧੂ ਅਗਲੀ ਖ਼ਬਰ ਪਨੀਰ ਦੇ ਨਾਂਅ ’ ਤੇ ਲੋਕਾਂ ਦੀ ਸਿਹਤ ਨਾਲ ਹੋ ਰਿਹਾ ਖਿਲਵਾੜ * ਪਨੀਰ ਦੇ ਪੰਜਾਬ ਵਿਚ 42 ਤੇ ਹਰਿਆਣਾ ਵਿਚ 70 ਫ਼ੀਸਦੀ ਸੈ...