ਪੰਜਾਬ ਸਰਕਾਰ ਵਲੋਂ ਲੁਧਿਆਣਾ 'ਚ 120 ਕਰੋੜ ਦੇ ਘਪਲੇ 'ਚ ਵੱਡੀ ਕਾਰਵਾਈ, 3 ਸੀਨੀਅਰ ਅਧਿਕਾਰੀ ਮੁਅੱਤਲ

4 hours 3 minutes ago

ਡੇਰਾਬੱਸੀ, 21 ਅਪ੍ਰੈਲ (ਰਣਬੀਰ ਸਿੰਘ ਪੜ੍ਹੀ)-ਪੰਜਾਬ ਸਰਕਾਰ ਦੇ ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਨੇ ਬਲਾਕ ਲੁਧਿਆਣਾ-2 ਵਿਚ ਵਾਪਰੇ ਅਨੁਮਾਨਿਤ ਰੁਪਏ 120.87 ਕਰੋੜ ਦੇ ਆਰਥਿਕ ਘਪਲੇ ਸਬੰਧੀ ਵੱਡੀ ਪ੍ਰਸ਼ਾਸਨਿਕ ਕਾਰਵਾਈ ਕੀਤੀ ਹੈ। ਇਹ ਘਪਲਾ ਪਿੰਡ ਸਲੇਮਪੁਰ, ਸੋਲਕੀਆਣਾ, ਬੌਕੜ ਗੁਜਰਾ, ਸੇਖੋਵਾਲ, ਕੜਿਆਣਾ ਖੁਰਦ ਅਤੇ ਪੰਨਾਨਸੂ ਨੂੰ ਜਾਰੀ ਕੀਤੀ ਅਵਾਰਡ ਮਨੀ ਦੀ ਰਕਮ ਨਾਲ ਜੁੜਿਆ ਹੋਇਆ ਹੈ। ਹੁਕਮ ਅਨੁਸਾਰ, ਉਕਤ ਸਮੇਂ ਦੌਰਾਨ ਬਲਾਕ ਲੁਧਿਆਣਾ-2 ਵਿਚ ਤਾਇਨਾਤ ਰਹੇ ਤਿੰਨ ਅਧਿਕਾਰੀਆਂ ਸ਼੍ਰੀਮਤੀ ਰੁਪਿੰਦਰਜੀਤ ਕੌਰ (ਬੀ.ਡੀ.ਪੀ.ਓ.), ਸਿਮਰਤ ਕੌਰ (ਐਸ.ਈ.ਪੀ.ਓ. ਚਾਰਜ ਬੀ.ਡੀ.ਪੀ.ਓ.) ਅਤੇ ਗੁਰਪ੍ਰੀਤ ਸਿੰਘ ਮਾਂਗਟ (ਐਸ.ਈ.ਪੀ.ਓ. ਚਾਰਜ ਬੀ.ਡੀ.ਪੀ.ਓ.) ਨੂੰ ਤੁਰੰਤ ਪ੍ਰਭਾਵ ਨਾਲ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਇਹ ਕਦਮ ਪੰਜਾਬ ਸਿਵਲ ਸੇਵਾਵਾਂ (ਸਜ਼ਾ ਅਤੇ ਅਪੀਲ) ਨਿਯਮਾਂਵਲੀ 1970 ਦੇ ਨਿਯਮ 4(i)(a) ਤਹਿਤ ਲਿਆ ਗਿਆ ਹੈ। ਮੁਅੱਤਲੀ ਦੌਰਾਨ ਅਮਲਯੋਗ ਨਿਯਮ: ਮੁਅੱਤਲੀ ਦੀ ਮਿਆਦ ਦੌਰਾਨ ਉਕਤ ਅਧਿਕਾਰੀਆਂ ਨੂੰ ਸਰਕਾਰੀ ਨਿਯਮਾਂ ਅਨੁਸਾਰ ਮੁਅੱਤਲੀ ਭੱਤਾ ਮਿਲੇਗਾ ਪਰ ਇਹ ਭੱਤਾ ਉਹ ਉਦੋਂ ਹੀ ਹਾਸਲ ਕਰ ਸਕਣਗੇ। ਜੇਕਰ ਉਹ ਲਿਖਤੀ ਸਰਟੀਫਿਕੇਟ ਦੇਣ ਕਿ ਉਹ ਕਿਸੇ ਹੋਰ ਨੌਕਰੀ ਜਾਂ ਵਿਅਕਤੀਗਤ ਕਾਰੋਬਾਰ ਵਿਚ ਲੱਗੇ ਨਹੀਂ ਹਨ। ਇਸ ਸਮੇਂ ਦੌਰਾਨ ਉਨ੍ਹਾਂ ਦਾ ਹੈੱਡਕੁਆਰਟਰ ਜ਼ਿਲ੍ਹਾ ਵਿਕਾਸ ਅਤੇ ਪੰਚਾਇਤ ਅਫ਼ਸਰ, ਲੁਧਿਆਣਾ ਦੇ ਦਫ਼ਤਰ ਵਿਚ ਹੋਵੇਗਾ। ਇਹ ਹੁਕਮ ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਦੇ ਪ੍ਰਬੰਧਕੀ ਸਕੱਤਰ ਅਜਿਤ ਬਾਲਾਜੀ ਜੋਸ਼ੀ, ਆਈ.ਏ.ਐਸ. ਵਲੋਂ ਜਾਰੀ ਕੀਤਾ ਗਿਆ ਹੈ।