ਜਲੰਧਰ, 10 ਅਕਤੂਬਰ (ਐੱਮ. ਐੱਸ. ਲੋਹੀਆ) - ਡਾ. ਅੰਕੁਸ਼ ਪੀਐੱਮ, ਡੀਐੱਮ, ਕਲੀਨਿਕਲ ਇਮਿਊਨੋਲੋਜੀ ਅਤੇ ਰਿਊਮੈਟੋਲੋਜੀ, ਫੋਰਟਿਸ ਹਸਪਤਾਲ ਜਲੰਧਰ ਨੇ ਜਾਣਕਾਰੀ ਦਿੱਤੀ ਕਿ ਗਠੀਏ ਨੂੰ ਸਿਰਫ਼ ਜੋੜਾਂ ਦੀ ਸਮੱਸਿਆ ਵਜੋਂ ਨਹੀਂ ਦੇਖਣਾ ਚਾਹੀਦਾ, ਖ਼ਾਸ ਕਰਕੇ ਉਦੋਂ ਜਦੋਂ ਜੋੜਾਂ ਦੇ ਲੱਛਣਾਂ ਦੇ ਨਾਲ-ਨਾਲ ਸਿਹਤ ਨਾਲ ਜੁੜੀਆਂ ਹੋਰ ਅਸਪਸ਼ਟ ਸਮੱਸਿਆਵਾਂ ਵੀ ਹੋਣ। ਉਨ੍ਹਾਂ ਕਿਹਾ ਕਿ ਬਿਮਾਰੀ ਦਾ ਦੇਰ ਨਾਲ ਪਤਾ ਲੱਗਣਾ ਚਿੰਤਾ ਦਾ ਵਿਸ਼ਾ ਹੈ, ਕਿਉਂਕਿ ਮਰੀਜ਼ ਜੋੜਾਂ ’ਚ ਲਗਾਤਾਰ ਦਰਦ ਅਤੇ ਅਕੜਾਅ ਨੂੰ ਵਧਦੀ ਉਮਰ, ਸਰੀਰਕ ਮਿਹਨਤ ਜਾਂ ਰੋਜ਼ਾਨਾ ਹੋਣ ਵਾਲੇ ਦਰਦ ਅਤੇ ਤਕਲੀਫ਼ ਦਾ ਨਤੀਜਾ ਮੰਨ ਸਕਦੇ ਹਨ। ਹਾਲਾਂਕਿ, ਗਠੀਏ ਦੀਆਂ ਸੋਜ ਵਾਲੀਆਂ ਅਤੇ ਆਟੋਇਮਿਊਨ ਕਿਸਮਾਂ ਵਿੱਚ ਬਿਨਾਂ ਇਲਾਜ ਦੇ ਬਿਮਾਰੀ ਹੌਲੀ-ਹੌਲੀ ਜੋੜਾਂ ਨੂੰ ਨੁਕਸਾਨ ਪਹੁੰਚਾ ਸਕਦੀ ਹੈ ਅਤੇ ਕੁਝ ਮਾਮਲਿਆਂ ਵਿੱਚ ਹੋਰ ਅੰਗਾਂ ਨੂੰ ਵੀ ਪ੍ਰਭਾਵਿਤ ਕਰ ਸਕਦੀ ਹੈ, ਜਿਸ ਨਾਲ ਫੇਫੜਿਆਂ, ਗੁਰਦਿਆਂ ਅਤੇ ਦਿਲ ਨਾਲ ਜੁੜੀਆਂ ਗੰਭੀਰ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਡਾ. ਅੰਕੁਸ਼ ਪੀ . ਐੱਮ. ਅਨੁਸਾਰ, ਬਿਮਾਰੀ ਦੇ ਪ੍ਰਭਾਵਸ਼ਾਲੀ ਪ੍ਰਬੰਧਨ ਲਈ ਜਲਦੀ ਡਾਕਟਰੀ ਸਲਾਹ ਲੈਣਾ, ਸਹੀ ਜਾਂਚ ਕਰਵਾਉਣਾ ਅਤੇ ਸਮੇਂ ਸਿਰ ਇਲਾਜ ਸ਼ੁਰੂ ਕਰਨਾ ਜ਼ਰੂਰੀ ਹੈ। ਬਿਮਾਰੀ ਦੀ ਪਛ ਾਣ ਦੇ ਆਧਾਰ ’ਤੇ ਇਲਾਜ ਵਿੱਚ ਸੋਜ ਘਟਾਉਣ ਵਾਲੀਆਂ ਦਵਾਈਆਂ, ਬਿਮਾਰੀ ਦੇ ਪ੍ਰਭਾਵ ਨੂੰ ਬਦਲਣ ਵਾਲੀਆਂ ਐਂਟੀ-ਰਿਊਮੈਟਿਕ ਦਵਾਈਆਂ ਅਤੇ ਲੋੜ ਪੈਣ ’ਤੇ ਬਾਇਓਲੌਜਿਕ ਥੈਰੇਪੀ ਸ਼ਾਮਿਲ ਹੋ ਸਕਦੀ ਹੈ।
