-ਪ੍ਰਧਾਨ ਮੰਤਰੀ ਦੀ ਆਮਦ ਨੂੰ ਲੈ ਕੇ ਤਿਆਰੀਆਂ ਜਾਰੀ- ਜਿੱਥੇ ਕਦੇ ਝਾੜੂ ਨਹੀਂ ਵੱਜਾ, ਉੱਥੇ ਜੰਗੀ ਪੱਧਰ ’ਤੇ ਚੱਲ ਰਿਹਾ ਸਫ਼ਾਈ ਅਭਿਆਨ
ਅਜੀਤ ਡੈਸਕ
15-07-2026
ਸ਼ਰਾਬ ਦੇ ਠੇਕੇ ਨੂੰ ਸਵਾਗਤੀ ਬੋਰਡ ਨਾਲ ਢੱਕਿਆ ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ਦੇ ਗੇਟ ਦੇ ਬਿਲਕੁਲ ਬਾਹਰ ਸਥਿਤ ਸ਼ਰਾਬ ਦੇ ਠੇਕੇ ਨੂੰ ਪ੍ਰਧਾਨ ਮੰਤਰੀ ਦੀ ਆਮਦ ਤੋਂ ਪਹਿਲਾਂ ਪੂਰੀ ਤਰ੍ਹਾਂ ਸਵਾਗਤੀ ਫਲੈਕਸਾਂ ਨਾਲ ਢੱਕ ਦਿੱਤਾ ਗਿਆ ਹੈ ਤੇ ਇਸ ਦੇ ਨਾਲ ਹੀ ਬਣੇ ਹੋਏ ਇੱਕ ਢਾਬੇ ਨੂੰ ਵੀ ਕਮਰੇ ਦਾ ਰੂਪ ਦਿੰਦੇ ਹੋਏ ਇਸ ਨੂੰ ਪੂਰੀ ਤਰ੍ਹਾਂ ਸੁੰਦਰ ਫਲੈਕਸਾਂ ਨਾਲ ਢੱਕ ਕੇ ਇਸ ਨੂੰ ਸੂੰਦਰ ਰੂਪ ਦੇ ਦਿੱਤਾ ਗਿਆ ਹੈ।
ਜਿੱਥੇ ਕਦੇ ਝਾੜੂ ਨਹੀਂ ਵੱਜਾ ਉੱਥੇ ਜੰਗੀ ਪੱਧਰ ’ਤੇ ਚੱਲ ਰਿਹਾ ਸਫਾਈ ਅਭਿਆਨ
ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ਦੇ ਬਿਲਕੁਲ ਬਾਹਰ ਜਲੰਧਰ–ਫਗਵਾੜਾ ਹਾਈਵੇ ਦੀ ਸਰਵਿਸ ਲਾਈਨ ’ਤੇ ਪ੍ਰਧਾਨ ਮੰਤਰੀ ਦੀ ਆਮਦ ਨੂੰ ਲੈ ਕੇ ਜੰਗੀ ਪੱਧਰ ’ਤੇ ਸਫਾਈ ਅਭਿਆਨ ਚਲਾਇਆ ਜਾ ਰਿਹਾ ਹੈ ਤੇ ਲੋਕਾਂ ਦਾ ਕਹਿਣਾ ਹੈ ਕਿ ਇਸ ਰੋਡ ’ਤੇ ਅੱਜ ਤੱਕ ਕਦੇ ਵੀ ਕਿਸੇ ਵਲੋਂ ਝਾੜੂ ਤੱਕ ਨਹੀਂ ਮਾਰਿਆ ਗਿਆ ਪ੍ਰੰਤੂ ਅੱਜ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦੀਆਂ ਹਦਾਇਤਾਂ ’ਤੇ ਸੜਕ ਦੇ ਹਰ ਪਾਸਿਉਂ ਕੂੜੇ ਦੇ ਇਕ ਇਕ ਲਿਫਾਫੇ ਤੱਕ ਨੂੰ ਵੀ ਚੁੱਕ ਕੇ ਸਫਾਈ ਕੀਤੀ ਜਾ ਰਹੀ ਹੈ, ਜਿਸ ਨਾਲ ਲੋਕਾਂ ਨੂੰ ਸਾਲਾ ਪੁਰਾਣੀ ਕੂੜੇ ਦੀ ਸਮੱਸਿਆ ਤੋਂ ਬਹੁਤ ਵੱਡੀ ਰਾਹਤ ਮਿਲ ਰਹੀ ਹੈ। ਇਸ ਦੇ ਨਾਲ ਹੀ ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ਦੇ ਬਿਲਕੁਲ ਬਾਹਰ ਵੀ ਕਈ ਸਾਲਾਂ ਤੋਂ ਬਰਸਾਤ ਦੇ ਪਾਣੀ ਕਾਰਨ ਟੁੱਟੀ ਪਈ ਸੜਕ ’ਤੇ ਵੀ ਲੁੱਕ ਪਾ ਕੇ ਉਸ ਨੂੰ ਤਿਆਰ ਕੀਤਾ ਜਾ ਰਿਹਾ ਹੈ, ਜਿਸ ਨਾਲ ਵਾਹਨ ਚਾਲਕਾਂ ਨੂੰ ਵੀ ਕਾਫ਼ੀ ਰਾਹਤ ਮਿਲੀ ਹੈ ।
