ਓਵਰਫਲੋ ਹੋਈ ਡੱਬਵਾਲੀ ਡਿਸਟ੍ਰੀਬਿਊਟਰੀ ਨੂੰ ਕਿਸਾਨਾਂ ਨੇ ਟੁੱਟਣ ਤੋਂ ਬਚਾਇਆ

ਕਿਸਾਨਾਂ ਵਲੋਂ ਡਿਸਟ੍ਰੀਬਿਊਟਰੀ ਦਾ ਪੁਲ ਚੌੜਾ ਕਰਨ ਦੀ ਮੰਗ
ਕਾਲਾਂਵਾਲੀ/ਸਿਰਸਾ, 14 ਜੂਨ (ਭੁਪਿੰਦਰ ਪੰਨੀਵਾਲੀਆ)- ਖੇਤੀ ਦੀ ਡੱਬਵਾਲੀ ਡਿਸਟ੍ਰੀਬਿਊਟਰੀ ਦੇ ਤੰਗ ਪੁਲ ਵਿੱਚ ਘਾਹ ਫੂਸ ਫਸਣ ਕਰਕੇ ਇਹ ਡਿਸਟ੍ਰੀਬਿਊਟਰੀ ਓਵਰਫਲੋ ਹੋ ਗਈ | ਇਹ ਤੰਗ ਪੁਲ ਰਾਸ਼ਟਰੀ ਰਾਜ ਮਾਰਗ 9 'ਤੇ ਡੱਬਵਾਲੀ-ਸਿਰਸਾ ਸੜਕ 'ਤੇ ਪਿੰਡ ਸਾਂਵਤਖੇੜਾ ਦੇ ਕੋਲ ਹੈ | ਪਾਣੀ ਦੇ ਨਾਲ ਡਿਸਟ੍ਰੀਬਿਊਟਰੀ ਵਿੱਚ ਵਗਦਾ ਮਲਬਾ ਤੰਗ ਪੁਲ ਵਿੱਚ ਫਸ ਗਿਆ | ਰੁਕਾਵਟ ਕਾਰਨ ਡਿਸਟ੍ਰੀਬਿਊਟਰੀ ਪੁਲ ਦੇ ਨੇੜੇ ਓਵਰਫਲੋ ਹੋ ਗਈ ਜਿਸ ਨਾਲ ਇਸ ਦੇ ਟੁੱਟਣ ਦਾ ਖ਼ਤਰਾ ਪੈਦਾ ਹੋ ਗਿਆ | ਜਦੋਂ ਇਸ ਦੀ ਸੂਚਨਾ ਪਿੰਡ ਮਸੀਤਾਂ ਦੇ ਕਿਸਾਨਾਂ ਨੂੰ ਮਿਲੀ ਤਾਂ ਕਿਸਾਨ ਸਰਵਜੀਤ ਸਿੰਘ ਮਸੀਤਾਂ, ਸਾਂਵਤਖੇੜਾ ਦੇ ਸਾਬਕਾ ਸਰਪੰਚ ਸੁਖਜਿੰਦਰ ਸਿੰਘ ਅਤੇ ਮਸੀਤਾਂ ਦੇ ਸਾਬਕਾ ਸਰਪੰਚ ਮਨਜੀਤ ਸਿੰਘ ਦਲੇਹ ਮੌਕੇ 'ਤੇ ਪਹੁੰਚੇ | ਕਿਸਾਨਾਂ ਨੇ ਮਲਬੇ ਨੂੰ ਹਟਾਉਣ ਲਈ ਇੱਕ ਜੇਸੀਬੀ ਬੁਲਾਈ ਜਿਸ ਨਾਲ ਤੰਗ ਪੁਲ 'ਚ ਫਸੇ ਮਲਬੇ ਨੂੰ ਕੱਢਿਆ ਗਿਆ | ਜਿਸ ਕਰਕੇ ਇਸ ਨਹਿਰ ਦੇ ਟੁੱਟਣ ਤੋਂ ਬਚਾਅ ਹੋ ਗਿਆ | ਕਿਸਾਨਾਂ ਦੇ ਅਨੁਸਾਰ ਨਹਿਰ ਦੀ ਸਮਰੱਥਾ 200 ਕਿਊਸਿਕ ਹੈ, ਰਾਸ਼ਟਰੀ ਰਾਜ ਮਾਰਗ ਦੇ ਹੇਠਾਂ ਪੁਲ ਕਾਫ਼ੀ ਤੰਗ ਹੈ | ਕਿਸਾਨਾਂ ਨੇ ਕਿਹਾ ਜਦੋਂ ਨਹਿਰ ਨਵੀਂ ਬਣਾਈ ਗਈ ਸੀ ਤਾਂ ਪੁਲ ਦੇ ਹਿੱਸੇ ਨੂੰ ਦੁਬਾਰਾ ਨਹੀਂ ਬਣਾਇਆ ਗਿਆ | ਜਿਸ ਕਰਕੇ ਇਸ ਤੰਗ ਪੁਲ ਵਿੱਚ ਥੋੜ੍ਹਾ ਜਿਹਾ ਘਾਹ ਫੂਸ ਫਸ ਜਾਣ ਕਰਕੇ ਇਹ ਬੰਦ ਹੋ ਜਾਂਦਾ ਹੈ | ਜਿਸ ਕਰਕੇ ਸੜਕ ਉਪਰ ਪਾਣੀ ਆ ਜਾਂਦਾ ਹੈ ਅਤੇ ਸੜਕ ਵਿੱਚ ਵੀ ਟੋਏ ਪੈ ਜਾਂਦੇ ਹਨ | ਕਿਸਾਨਾਂ ਨੇ ਦੱਸਿਆ ਕਿ ਇਸ ਸੰਬੰਧ ਵਿੱਚ ਉਹਨਾਂ ਡੱਬਵਾਲੀ ਦੇ ਤਹਿਸੀਲਦਾਰ ਨੂੰ ਇੱਕ ਮੰਗ ਪੱਤਰ ਵੀ ਦਿੱਤਾ ਸੀ ਪਰ ਹਾਲੇ ਤੱਕ ਕੋਈ ਕਾਰਵਾਈ ਨਹੀਂ ਹੋਈ | ਉਹਨਾਂ ਕਿਹਾ ਕਿ ਰਾਸ਼ਟਰੀ ਰਾਜ ਮਾਰਗ 9 'ਤੇ ਇਹਨਾਂ ਦਿਨਾਂ ਵਿੱਚ ਮੁਰੰਮਤ ਦਾ ਕੰਮ ਚੱਲ ਰਿਹਾ ਹੈ | ਇਸ ਦੌਰਾਨ ਹੀ ਇਸ ਪੁਲ ਨੂੰ ਦੁਬਾਰਾ ਬਣਾਇਆ ਜਾਵੇ ਤਾਂ ਜੋ ਇਸ ਡਿਸਟ੍ਰੀਬਿਊਟਰੀ ਵਿੱਚ ਪਾਣੀ ਦਾ ਪ੍ਰਵਾਹ ਸਹੀ ਰੂਪ ਵਿੱਚ ਹੋ ਸਕੇ |