ਨਿਊਯਾਰਕ, 17 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਸਪੇਸਐਕਸ ਦੇ ਵਿਸ਼ਾਲ ਸਟਾਰਸ਼ਿਪ ਰਾਕੇਟ ਦੀ 13ਵੀਂ ਟੈਸਟ ਉਡਾਣ ਲਾਂਚ ਤੋਂ ਠੀਕ ਪਹਿਲਾਂ ਤਕਨੀਕੀ ਖਰਾਬੀ ਕਾਰਨ ਰੋਕਣੀ ਪਈ। ਦੱਖਣੀ ਟੈਕਸਾਸ ਸਥਿਤ ਸਟਾਰਬੇਸ ਤੋਂ ਉਡਾਣ ਦੀ ਤਿਆਰੀ ਦੌਰਾਨ ਜਿਵੇਂ ਹੀ ਸੁਪਰ ਹੈਵੀ ਬੂਸਟਰ ਦੇ 33 ਰੈਪਟਰ ਇੰਜਣ ਚਾਲੂ ਹੋਣ ਲੱਗੇ, ਪ੍ਰਣਾਲੀ ਨੇ ਅਚਾਨਕ ਲਾਂਚ ਅਬੋਰਟ ਕਰ ਦਿੱਤਾ। ਸਪੇਸਐਕਸ ਨੇ ਕਿਹਾ ਕਿ ਇੰਜਣ ਸਟਾਰਟ ਹੋਣ ਸਮੇਂ ਸਾਹਮਣੇ ਆਈ ਗੜਬੜ ਦੀ ਜਾਂਚ ਕੀਤੀ ਗਈ ਹੈ। ਕੰਪਨੀ ਦੇ ਮੁਖੀ ਐਲਨ ਮਸਕ ਮੁਤਾਬਕ ਸੁਰੱਖਿਅਤ ਤੇ ਸਫਲ ਉਡਾਣ ਯਕੀਨੀ ਬਣਾਉਣ ਲਈ 2 ਰੈਪਟਰ ਇੰਜਣ ਹਟਾ ਕੇ ਨਵੇਂ ਇੰਜਣ ਲਗਾਏ ਜਾਣਗੇ। ਅਗਲੀ ਕੋਸ਼ਿਸ਼ ਸੰਭਾਵਤ ਤੌਰ ’ਤੇ ਅਗਲੇ ਹਫ਼ਤੇ ਕੀਤੀ ਜਾ ਸਕਦੀ ਹੈ।
