ਈਰਾਨ ਜੰਗ ਨੇ ਨਾਟੋ ’ਚ ਵਧਾਈਆਂ ਦਰਾਰਾਂ
ਅਜੀਤ ਡੈਸਕ
10-07-2026
ਨਿਊਯਾਰਕ, 9 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਈਰਾਨ ਨਾਲ ਮੁੜ ਭੜਕੇ ਟਕਰਾਅ ਨੇ ਨਾਟੋ ਗਠਜੋੜ ਅੰਦਰ ਮੌਜੂਦ ਮਤਭੇਦਾਂ ਨੂੰ ਖੁੱਲ੍ਹ ਕੇ ਸਾਹਮਣੇ ਲਿਆ ਦਿੱਤਾ ਹੈ। ਤੁਰਕੀ ਦੀ ਰਾਜਧਾਨੀ ਅੰਕਾਰਾ ਵਿਚ ਹੋਏ ਨਾਟੋ ਸਿਖਰ ਸੰਮੇਲਨ ਦੌਰਾਨ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਈਰਾਨ ਵਿਰੁੱਧ ਕਿਸੇ ਨਵੀਂ ਸਾਂਝੀ ਫੌਜੀ ਕਾਰਵਾਈ ਲਈ ਯੂਰਪੀ ਦੇਸ਼ਾਂ ਦਾ ਸਮਰਥਨ ਨਹੀਂ ਮਿਲਿਆ। ਸੰਮੇਲਨ ਦੇ ਅੰਤ ਤੱਕ ਨਾਟੋ ਵੱਲੋਂ ਈਰਾਨ ਜੰਗ ’ਚ ਸਿੱਧੇ ਸਹਿਯੋਗ ਦਾ ਕੋਈ ਨਵਾਂ ਐਲਾਨ ਨਹੀਂ ਕੀਤਾ ਗਿਆ।
ਟਰੰਪ ਨੇ ਇੱਕ ਪਾਸੇ ਨਾਟੋ ਵਿਚ “ਸ਼ਾਨਦਾਰ ਏਕਤਾ” ਦਾ ਦਾਅਵਾ ਕੀਤਾ, ਪਰ ਦੂਜੇ ਪਾਸੇ ਯੂਰਪੀ ਦੇਸ਼ਾਂ ਦੀ ਹਿਚਕਚਾਹਟ ‘ਤੇ ਨਾਰਾਜ਼ਗੀ ਵੀ ਜਤਾਈ। ਇਸ ਦੇ ਉਲਟ ਕਈ ਯੂਰਪੀ ਆਗੂਆਂ ਨੇ ਸਪੱਸ਼ਟ ਸੰਕੇਤ ਦਿੱਤਾ ਕਿ ਉਹ ਮੱਧ ਪੂਰਬ ਦੀ ਇਸ ਜੰਗ ਵਿਚ ਸਿੱਧੇ ਤੌਰ ‘ਤੇ ਸ਼ਾਮਲ ਹੋਣ ਦੇ ਹੱਕ ਵਿਚ ਨਹੀਂ ਹਨ ਅਤੇ ਯੂਰਪ ਨੂੰ ਹੁਣ ਆਪਣੀ ਸੁਰੱਖਿਆ ਨੀਤੀ ਹੋਰ ਮਜ਼ਬੂਤ ਬਣਾਉਣ ਦੀ ਲੋੜ ਹੈ।
