ਪਠਾਨਕੋਟ, 14 ਜੁਲਾਈ (ਸੰਧੂ)-ਮੋਂਟੇਸਰੀ ਕੈਂਬਰਿਜ ਸਕੂਲ ਪਠਾਨਕੋਟ ਦੇ ਹੋਣਹਾਰ ਤੈਰਾਕ ਵਿਨਾਇਕਾ ਮਹਾਜਨ ਨੇ ਸਵਿਟਜ਼ਰਲੈਂਡ ਦੀ ਪ੍ਰਸਿੱਧ ਜਨੀਵਾ ਝੀਲ ਵਿਚ ਕਰਵਾਏ ਗਏ 13 ਕਿੱਲੋਮੀਟਰ ਲੇਕ ਕਲਾਸਿਕ ਓਪਨ ਵਾਟਰ ਤੈਰਾਕੀ ਮੁਕਾਬਲੇ ਵਿਚ ਸਭ ਤੋਂ ਤੇਜ਼ ਸਮੇਂ ਵਿਚ ਤੈਰਾਕੀ ਪੂਰੀ ਕਰਨ ਵਾਲਾ ਦੁਨੀਆਂ ਦਾ ਪਹਿਲਾ ਤੈਰਾਕ ਬਣ ਗਿਆ ਹੈ। ਲੇਕ ਜਨੀਵਾ ਸਵਿਮਿੰਗ ਐਸੋਸੀਏਸ਼ਨ ਵਲੋਂ ਕਰਵਾਏ ਗਏ ਇਸ ਅੰਤਰਰਾਸ਼ਟਰੀ ਮੁਕਾਬਲੇ ਵਿਚ ਅਮਰੀਕਾ, ਆਸਟ੍ਰੇਲੀਆ, ਯੂਨਾਈਟਡ ਕਿੰਗਡਮ, ਬੈਲਜੀਅਮ, ਫਰਾਂਸ, ਸਵਿਟਜ਼ਰਲੈਂਡ ਸਮੇਤ ਕਈ ਦੇਸ਼ਾਂ ਦੇ ਚੋਟੀ ਦੇ ਓਪਨ ਵਾਟਰ ਤੈਰਾਕਾਂ ਨੇ ਭਾਗ ਲਿਆ। ਵਿਨਾਇਕਾ ਮਹਾਜਨ ਨੇ ਅਸਾਧਾਰਣ ਹੌਸਲੇ, ਮਜ਼ਬੂਤ ਇਰਾਦੇ ਤੇ ਸ਼ਾਨਦਾਰ ਤੈਰਾਕੀ ਕੌਸ਼ਲ ਦਾ ਪ੍ਰਦਰਸ਼ਨ ਕਰਦੇ ਹੋਏ ਪਹਿਲਾ ਸਥਾਨ ਹਾਸਲ ਕੀਤਾ। ਇਸ ਦੇ ਨਾਲ ਹੀ ਉਸ ਨੇ ਨਾ ਸਿਰਫ਼ ਮੌਜੂਦਾ ਰਿਕਾਰਡ ਤੋੜਿਆ। ਇਸ ਮੌਕੇ ਸਕੂਲ ਪ੍ਰਬੰਧਕਾਂ ਨੇ ਕਿਹਾ ਕਿ ਇਹ ਪ੍ਰਾਪਤੀ ਪੂਰੇ ਪਠਾਨਕੋਟ ਅਤੇ ਦੇਸ਼ ਲਈ ਮਾਣ ਵਾਲੀ ਗੱਲ ਹੈ। ਸਕੂਲ ਦੇ ਚੇਅਰਮੈਨ ਵਿਨੋਦ ਮਹਾਜਨ, ਵਾਈਸ ਚੇਅਰਮੈਨ ਆਕਾਸ਼ ਮਹਾਜਨ ਅਤੇ ਡਾਇਰੈਕਟਰ-ਕਮ-ਪ੍ਰਿੰਸੀਪਲ ਰਸ਼ਮੀ ਅਹਲੂਵਾਲੀਆ ਨੇ ਵਿਨਾਇਕਾ ਮਹਾਜਨ ਨੂੰ ਇਸ ਵਿਲੱਖਣ ਉਪਲੱਬਧੀ ਲਈ ਵਧਾਈ ਦਿੱਤੀ।
