ਸਿੱਖ ਕੌਮ ਵਿਚ ਪੱਗ ਜਾਂ ਦਸਤਾਰ ਕੇਵਲ ਸਿਰ ਦਾ ਸ਼ਿੰਗਾਰ ਨਹੀਂ, ਸਗੋਂ ਸਨਮਾਨ, ਸਵੈਮਾਣ, ਧਾਰਮਿਕ ਪਛਾਣ ਤੇ ਵਿਰਾਸਤ ਦਾ ਪ੍ਰਤੀਕ ਹੈ। ਪਰ ਪਿਛਲੇ ਕੁਝ ਸਾਲਾਂ ਦੌਰਾਨ ਵੱਖ-ਵੱਖ ਸਿਆਸੀ ਪਾਰਟੀਆਂ ਦੇ ਆਗੂਆਂ ਵਲੋਂ ਆਪਣੀ ਪਛਾਣ ਲਈ ਖ਼ਾਸ ਰੰਗਾਂ ਦੀਆਂ ਦਸਤਾਰਾਂ ਸਜਾਉਣ ਕਾਰਨ ਆਮ ਲੋਕਾਂ ਵਿਚ ਇਕ ਨਵੀਂ ਚਿੰਤਾ ਉੱਭਰ ਕੇ ਸਾਹਮਣੇ ਆਈ ਹੈ।
ਅੱਜ ਬਹੁਤ ਸਾਰੇ ਅਜਿਹੇ ਲੋਕ ਜਿਨ੍ਹਾਂ ਦਾ ਕਿਸੇ ਵੀ ਰਾਜਨੀਤਕ ਪਾਰਟੀ ਨਾਲ ਕੋਈ ਸਬੰਧ ਨਹੀਂ ਹੈ, ਘਰੋਂ ਨਿਕਲਣ ਸਮੇਂ ਇਸ ਗੱਲ ਬਾਰੇ ਸੋਚਣ ਲਈ ਮਜਬੂਰ ਹੋ ਜਾਂਦੇ ਹਨ ਕਿ ਉਹ ਕਿਸ ਰੰਗ ਦੀ ਦਸਤਾਰ ਸਜਾਉਣ। ਜੇਕਰ ਕੋਈ ਵਿਅਕਤੀ ਅਨਜਾਣੇ ਵਿਚ ਉਸ ਰੰਗ ਦੀ ਦਸਤਾਰ ਸਜਾ ਲੈਂਦਾ ਹੈ, ਜੋ ਰੰਗ ਕਿਸੇ ਖ਼ਾਸ ਸਿਆਸੀ ਪਾਰਟੀ ਨਾਲ ਜੁੜਿਆ ਹੁੰਦਾ ਹੈ ਤਾਂ ਲੋਕਾਂ ਵਿਚ ਇਹ ਪ੍ਰਭਾਵ ਬਣ ਜਾਂਦਾ ਹੈ ਕਿ ਇਹ ਵਿਅਕਤੀ ਫਲਾਣੀ ਪਾਰਟੀ ਦਾ ਸਮਰਥਕ ਜਾਂ ਵਰਕਰ ਹੈ। ਇਸ ਕਾਰਨ ਕਈ ਲੋਕ ਆਪਣੀ ਪਸੰਦ ਦੇ ਰੰਗ ਦੀ ਦਸਤਾਰ ਸਜਾਉਣ ਤੋਂ ਵੀ ਹਿਚਕਚਾਉਣ ਲੱਗ ਪਏ ਹਨ। ਵੱਖ-ਵੱਖ ਪਾਰਟੀਆਂ ਦੇ ਰੰਗਾਂ ਨਾਲ ਦਸਤਾਰ ਨੂੰ ਜੋੜਨ ਕਾਰਨ ਨੌਜਵਾਨਾਂ ਵਿਚ ਇਹ ਧਾਰਨਾ ਬਣ ਸਕਦੀ ਹੈ ਕਿ ਕਿਸੇ ਖ਼ਾਸ ਰੰਗ ਦੀ ਪੱਗ ਕਿਸੇ ਵਿਸ਼ੇਸ਼ ਰਾਜਨੀਤਕ ਸੋਚ ਦੀ ਪ੍ਰਤੀਨਿਧਤਾ ਕਰਦੀ ਹੈ, ਜੋ ਕਿ ਸਿੱਖ ਪਰੰਪਰਾਵਾਂ ਦੀ ਵਿਸ਼ਾਲਤਾ ਤੇ ਸਰਬ-ਸਾਂਝੇਪਣ ਦੇ ਉਲਟ ਹੈ। ਸਮਾਜਿਕ ਤੇ ਧਾਰਮਿਕ ਵਰਗਾਂ ਦਾ ਮੰਨਣਾ ਹੈ ਕਿ ਦਸਤਾਰ ਨੂੰ ਰਾਜਨੀਤਕ ਰੰਗਾਂ ਤੋਂ ਉੱਪਰ ਰੱਖਣਾ ਚਾਹੀਦਾ ਹੈ। ਦਸਤਾਰ ਸਿੱਖ ਪੰਥ ਦੀ ਸਾਂਝੀ ਵਿਰਾਸਤ ਹੈ ਅਤੇ ਇਸ ਨੂੰ ਕਿਸੇ ਇਕ ਪਾਰਟੀ ਜਾਂ ਵਿਚਾਰਧਾਰਾ ਨਾਲ ਜੋੜ ਕੇ ਨਹੀਂ ਦੇਖਿਆ ਜਾਣਾ ਚਾਹੀਦਾ। ਹਰ ਵਿਅਕਤੀ ਨੂੰ ਆਪਣੀ ਪਸੰਦ ਤੇ ਪਰੰਪਰਾ ਅਨੁਸਾਰ ਕਿਸੇ ਵੀ ਰੰਗ ਦੀ ਦਸਤਾਰ ਸਜਾਉਣ ਦੀ ਆਜ਼ਾਦੀ ਹੋਣੀ ਚਾਹੀਦੀ ਹੈ, ਕਿਉਂਕਿ ਦਸਤਾਰ ਦੀ ਮਹੱਤਤਾ ਕਿਸੇ ਰੰਗ ਜਾਂ ਸਿਆਸੀ ਪਛਾਣ ਤੋਂ ਕਿਤੇ ਵੱਧ ਹੈ। ਇਸ ਲਈ ਪੱਗ ਦੀ ਅਸਲ ਪਛਾਣ ਨੂੰ ਕਾਇਮ ਰੱਖਣ ਦੀ ਲੋੜ ਹੈ ਕਿ ਇਸ ਨੂੰ ਰਾਜਨੀਤਕ ਰੰਗਾਂ ਤੋਂ ਉੱਪਰ ਰੱਖਿਆ ਜਾਵੇ। ਸਿੱਖ ਇਤਿਹਾਸ ਤੇ ਗੁਰਸਿੱਖੀ ਪਰੰਪਰਾ ਵਿਚ ਪੱਗ ਸਨਮਾਨ, ਸੇਵਾ, ਹਿੰਮਤ ਤੇ ਮਨੁੱਖਤਾ ਦੀ ਪ੍ਰਤੀਕ ਰਹੀ ਹੈ। ਇਸ ਲਈ ਸਮੇਂ ਦੀ ਲੋੜ ਹੈ ਕਿ ਨੌਜਵਾਨ ਪੀੜ੍ਹੀ ਨੂੰ ਦਸਤਾਰ ਦੇ ਅਸਲ ਮਹੱਤਵ ਬਾਰੇ ਜਾਗਰੂਕ ਕੀਤਾ ਜਾਵੇ, ਤਾਂ ਜੋ ਇਹ ਮਹਾਨ ਵਿਰਾਸਤ ਆਉਣ ਵਾਲੀਆਂ ਪੀੜ੍ਹੀਆਂ ਤੱਕ ਉਸੇ ਸਨਮਾਨ ਨਾਲ ਪਹੁੰਚ ਸਕੇ।
ਲੋੜ ਇਸ ਗੱਲ ਦੀ ਹੈ ਕਿ ਸਮਾਜ ਤੇ ਸਿਆਸੀ ਪਾਰਟੀਆਂ ਦੋਵੇਂ ਦਸਤਾਰ ਦੀ ਮੂਲ ਮਹੱਤਤਾ ਨੂੰ ਸਮਝਣ ਅਤੇ ਇਸ ਨੂੰ ਸਿਰਫ਼ ਰਾਜਨੀਤਕ ਪਛਾਣ ਤੱਕ ਸੀਮਤ ਕਰਨ ਦੀ ਬਜਾਏ ਸਿੱਖੀ ਦੀ ਸ਼ਾਨ, ਅਣਖ ਅਤੇ ਸੱਭਿਆਚਾਰਕ ਵਿਰਾਸਤ ਵਜੋਂ ਸਤਿਕਾਰ ਦੇਣ। ਇਸ ਨਾਲ ਆਮ ਲੋਕ ਬਿਨਾਂ ਕਿਸੇ ਸੰਕੋਚ ਦੇ ਆਪਣੀ ਪਸੰਦ ਦੀ ਦਸਤਾਰ ਸਜਾ ਸਕਣਗੇ ਅਤੇ ਦਸਤਾਰ ਦੀ ਮਰਿਆਦਾ ਵੀ ਬਰਕਰਾਰ ਰਹੇਗੀ।
-ਇੰਚਾਰਜ 'ਅਜੀਤ' ਉਪ ਦਫ਼ਤਰ, ਫ਼ਤਹਿਗੜ੍ਹ ਸਾਹਿਬ
ਮੋਬਾਈਲ : 98885-20903
