ਕੋਟਫੱਤਾ, 19 ਜੂਨ (ਰਣਜੀਤ ਸਿੰਘ ਬੁੱਟਰ)- ਥਾਣਾ ਸਦਰ ਬਠਿੰਡਾ ਅਧੀਨ ਪੈਂਦੀ ਚੌਕੀ ਕੋਟਸ਼ਮੀਰ ਦੇ ਖੇਤਰ ਵਿਚ ਇਨ੍ਹੀਂ ਦਿਨੀਂ ਚੋਰੀਆਂ ਦੀ ਵੱਡੀ ਭਰਮਾਰ ਹੈ। ਪਿਛਲੇ 20 ਕੁ ਦਿਨਾਂ ਵਿਚ ਕੋਟਸ਼ਮੀਰ ਨਗਰ ਵਿਚ ਚੋਰ ਦਰਜਨ ਭਰ ਥਾਵਾਂ ‘ਤੇ ਆਪਣਾ ਹੱਥ ਸਾਫ਼ ਕਰ ਗਏ। ਹਫ਼ਤਾ ਕੁ ਪਹਿਲਾਂ ਇਕ ਮਹਾਜਨ ਪਰਿਵਾਰ ਦੇ ਘਰ ਦੋ ਲੱਖ ਦੇ ਲਗਪਗ ਦੀ ਵੱਡੀ ਚੋਰੀ ਹੋਈ ਸੀ ਉਸ ਤੋਂ ਪਹਿਲਾਂ ਚੋਰ ਤਿੰਨ ਚਾਰ ਹੋਰ ਚੋਰੀ ਦੀਆਂ ਘਟਨਾਵਾਂ ਨੂੰ ਅੰਜਾਮ ਦੇ ਚੁੱਕੇ ਸਨ। ਬੀਤੀ ਰਾਤ ਚੋਰਾਂ ਵਲੋਂ ਇਕ ਹੋਰ ਮਹਾਜਨ ਪਰਿਵਾਰ ਦੇ ਘਰ ਤੋਂ ਮੋਬਾਇਲ ਚੋਰੀ ਕਰਨ ਤੋਂ ਇਲਾਵਾ ਇਕ ਪ੍ਰਵਾਸੀ ਗੋਲ ਗੱਪਿਆਂ ਵਾਲੇ ਦੇ ਘਰ ਵੀ ਚੋਰੀ ਦੀ ਅਸਫਲ ਕੋਸ਼ਿਸ਼ ਕੀਤੀ ਗਈ। ਜਦੋਂ ਕੋਟਸ਼ਮੀਰ ਚੌਕੀ ਇੰਚਾਰਜ ਗੁਰਪ੍ਰੀਤ ਸਿੰਘ ਸਿੱਧੂ ਨਾਲ ਨਿੱਤ ਦਿਨ ਵਾਪਰ ਰਹੀਆਂ ਘਟਨਾਵਾਂ ਬਾਰੇ ਗੱਲਬਾਤ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਤਾਂ ਉਨ੍ਹਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ। ਪਤਾ ਲੱਗਿਆ ਕਿ ਚੌਕੀ ਕੋਲ ਮੁਲਾਜ਼ਮਾਂ ਦੀ ਵੱਡੀ ਘਾਟ ਹੈ। ਚੌਕੀ ਅਧੀਨ ਗਰੋਥ ਦੇ ਸੈਂਟਰ ਤੋਂ ਇਲਾਵਾ ਅੱਧੀ ਦਰਜਨ ਦੇ ਲਗਭਗ ਪਿੰਡ ਵੀ ਪੈਂਦੇ ਹਨ ਪਰ ਮੁਲਾਜ਼ਮ ਸਿਰਫ਼ 9 ਹੀ ਹਨ ਜੋ ਇੰਨੇ ਵੱਡੇ ਏਰੀਏ ਨੂੰ ਕੰਟਰੋਲ ਕਰਨ ਤੋਂ ਅਸਮਰੱਥ ਹਨ। ਦੂਜੇ ਪਾਸੇ ਪਤਾ ਲੱਗਾ ਹੈ ਕਿ ਰਾਤ ਨੂੰ ਰੋਡ ਤੇ ਲੱਗਣ ਵਾਲਾ ਨਾਕਾ ‘ਤੇ ਬੱਸ ਅੱਡੇ ‘ਤੇ ਖੜ੍ਹਦੀ ਐਸ.ਐਸ. ਐਫ ਦੀ ਗੱਡੀ ਵੀ ਇਥੋਂ ਬਦਲ ਕੇ ਕੋਟਫੱਤਾ ਵਿਖੇ ਚਲੀ ਗਈ ਹੈ ਜਿਸ ਨਾਲ ਚੋਰਾਂ ਦੇ ਹੌਸਲੇ ਹੋਰ ਬੁਲੰਦ ਹੋਏ ਹਨ। ਰਾਤ ਨੂੰ ਲੱਗਣ ਵਾਲੇ ਨਾਕੇ ਅਤੇ ਐੱਸ.ਐੱਸ.ਐੱਫ. ਦੀ ਖੜ੍ਹੀ ਗੱਡੀ ਕਾਰਨ ਚੋਰਾਂ ਨੇ ਮਨ ਅੰਦਰ ਖ਼ੌਫ਼ ਸੀ ਜੋ ਹੁਣ ਨਿਕਲ ਚੁੱਕਾ ਹੈ। ਕੋਟਸ਼ਮੀਰ ਨਗਰ ਪੰਚਾਇਤ ਦੇ ਚੁਣੇ ਨਵੇਂ ਕੌਂਸਲਰ ਤੇ ਹੋਰ ਮੁਹਤਬਰ ਕੋਟਸ਼ਮੀਰ ਚੌਕੀ ਇੰਚਾਰਜ ਨੂੰ ਮਿਲੇ ਤੇ ਹੋ ਰਹੀਆਂ ਇਹਨਾਂ ਵਾਰਦਾਤਾਂ ਤੇ ਚਿੰਤਾ ਪ੍ਰਗਟ ਕੀਤੀ। ਇਸ ਮੌਕੇ ਕੋਟਸ਼ਮੀਰ ਨਗਰ ਪੰਚਾਇਤ ਦੇ ਕੌਂਸਲਰ ਪਰਮਜੀਤ ਸਿੰਘ ਪੰਮਾ ਕੌਂਸਲਰ ਜਸਪ੍ਰੀਤ ਸਿੰਘ ਜੱਸਾ, ਕੌਂਸਲਰ ਰਾਮ ਸਿੰਘ ਮਾਨ, ਕੌਂਸਲਰ ਜਸਦੀਪ ਕੌਰ ਦੇ ਪਤੀ ਮਨਪ੍ਰੀਤ ਸਿੰਘ ਰਤੜਾ, ਰਾਜ ਕੁਮਾਰ, ਰਾਜਵਿੰਦਰ ਸਿੰਘ ਰਾਜੂ, ਜਗਪਾਲ ਸਿੰਘ ਟੇਲਰ, ਰਮਨ ਸਿੰਘ ਸਿੱਧੂ ਤੇ ਹੋਰ ਪਿੰਡ ਵਾਸੀ ਹਾਜ਼ਰ ਸਨ।
