ਮੈਹਿੰਦਵਾਣੀ ’ਚ ਤੇਂਦੂਏ ਦੀ ਦਹਿਸ਼ਤ, ਗਾਂ ਨੂੰ ਬਣਾਇਆ ਸ਼ਿਕਾਰ

ਬੀਣੇਵਾਲ, 14 ਜੁਲਾਈ (ਬੈਜ ਚੌਧਰੀ)-ਬੀਤ ਇਲਾਕੇ ਦੇ ਪਿੰਡ ਮੈਹਿੰਦਵਾਣੀ ਵਿਚ ਇਕ ਤੇਂਦੂਆ ਲਗਾਤਾਰ ਕਈ ਦਿਨਾਂ ਤੋਂ ਪਿੰਡ ਦੇ ਜੰਗਲ ਨਾਲ ਲੱਗਦੇ ਘਰਾਂ ਨੇੜੇ ਦੇਖਿਆ ਗਿਆ। ਤੇਂਦੂਏ ਵਲੋਂ ਬੀਤੇ ਦਿਨ ਜੰਗਲ ਨਾਲ ਲੱਗਦੇ ਖੇਤਾਂ ਵਿਚ ਘਾ ਖਾ ਰਹੀ ਕਿਸਾਨ ਓਮ ਪ੍ਰਕਾਸ਼ ਬਜਾੜ ਦੀ ਕਰੀਬ 4 ਸਾਲਾਂ ਦੀ ਗਾਂ ਨੂੰ ਸ਼ਿਕਾਰ ਬਣਾ ਲਿਆ ਗਿਆ। ਪਿੰਡ ਦੇ ਲੋਕਾਂ ਬੂਟਾ ਕਸਾਣਾ ਸਰਪੰਚ ਮੈਹਿੰਦਵਾਣੀ ਗੁੱਜਰਾਂ, ਮੌਜੀ ਪੰਡਿਤ ਮੈਹਿੰਦਵਾਣੀ, ਕੁਲਭੂਸ਼ਨ ਕੁਮਾਰ ਸਾਬਕਾ ਸਰਪੰਚ, ਰਾਮ ਕਸਾਣਾ, ਬੰਟੀ ਕਸਾਣਾ, ਰਾਕੇਸ਼ ਕਸਾਣਾ ਤੇ ਜੌਲੀ ਪੰਡਿਤ ਨੇ ਦੱਸਿਆ ਕਿ ਤੇਂਦੂਆ ਕਈ ਦਿਨਾਂ ਤੋਂ ਜੰਗਲ ਨਾਲ ਲੱਗਦੇ ਘਰਾਂ ਖੇਤਾਂ ਨੇੜੇ ਦੇਖਿਆ ਗਿਆ। ਇਹ ਤੇਂਦੂਆ ਰਾਤ ਵੇਲੇ ਲੋਕਾਂ ਦੇ ਪਸ਼ੂਆਂ ਦੇ ਵਾੜੇ ਵਿਚ ਆ ਜਾਂਦਾ ਹੈ, ਜੋ ਕਿ ਪਿੰਡ ਦੇ ਕਈ ਲੋਕਾਂ ਵਲੋਂ ਦੇਖਿਆ ਗਿਆ ਹੈ। ਲੋਕਾਂ ਨੇ ਦੱਸਿਆ ਕਿ ਲਗਾਤਾਰ ਪਹਾੜਾਂ ਤੋਂ ਜੰਗਲ ਦੀ ਹੋ ਰਹੀ ਕਟਾਈ ਦੇ ਚੱਲਦਿਆਂ ਜੰਗਲੀ ਜਾਨਵਰਾਂ ਨੇ ਹੁਣ ਆਬਾਦੀ ਵਾਲੇ ਇਲਾਕੇ ਦਾ ਰੁਖ਼ ਕਰ ਲਿਆ ਹੈ ਅਤੇ ਅਜਿਹੇ ਮਾਸਖੋਰੇ ਜਾਨਮਰ ਅਕਸਰ ਪਿੰਡਾਂ ‘ਚ ਜਾਨੀ ਨੁਕਸਾਨ ਕਰ ਰਹੇ ਹਨ। ਲੋਕਾਂ ਨੇ ਜੰਗਲੀ ਜੀਵ ਵਿਭਾਗ ਤੋਂ ਮੰਗ ਕੀਤੀ ਹੈ ਕਿ ਇਸ ਤੇਂਦੂਏ ਨੂੰ ਫੜਨ ਲਈ ਪਿੰਜਰਾ ਲਗਾ ਕੇ ਫੜ ਕੇ ਕਿਸੇ ਦੂਰ ਦਰਾ ਜੰਗਲਾਂ ਵਿਚ ਛੱਡਿਆ ਜਾਵੇ।