ਭੀਖੀ, 26 ਦਸੰਬਰ (ਬਲਕਾਰ ਸਿੰਘ ਸਹੋਤਾ)-ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਡਕੌਂਦਾ) ਵਲੋਂ ਪਿੰਡ ਅਤਲਾ ਕਲਾਂ ਦੇ ਕਿਸਾਨ ਨੂੰ ਐਕਸਿਸ ਬੈਂਕ ਬਰਾਂਚ ਭੀਖੀ ਵਲੋਂ ਲਿਮਟ ਦੀ ਪੂਰੀ ਰਕਮ ਭਰਨ ਉਪਰੰਤ ਵੀ ਐਨ.ਓ.ਸੀ. ਨਾ ਦੇਣ ਦੇ ਵਿਰੋਧ 'ਚ ਬਲਾਕ ਪ੍ਰਧਾਨ ਬਾਵਾ ਸਿੰਘ ਖੀਵਾ ਦੀ ਅਗਵਾਈ ਹੇਠ ਧਰਨਾ ਪ੍ਰਦਰਸ਼ਨ ਕੀਤਾ ਗਿਆ | ਸੂਬਾ ਆਗੂ ਮੱਖਣ ਸਿੰਘ ਭੈਣੀਬਾਘਾ ਨੇ ਦੱਸਿਆ ਕਿ ਕਿਸਾਨ ਬੂਟਾ ਸਿੰਘ ਪੁੱਤਰ ਗੁਰਦੇਵ ਸਿੰਘ ਵਾਸੀ ਅਤਲਾ ਕਲਾਂ ਨੇ ਐਕਸਿਸ ਬੈਂਕ ਪਾਸੋਂ ਤਕਰੀਬਨ 3 ਸਾਲ ਪਹਿਲਾਂ 13 ਲੱਖ ਦਾ ਖੇਤੀਬਾੜੀ ਲੋਨ ਲਿਆ ਸੀ | ਉਸ ਵਲੋਂ ਤਕਰੀਬਨ 3 ਮਹੀਨੇ ਪਹਿਲਾਂ ਰਕਮ ਦਾ ਵਿਆਜ ਸਮੇਤ ਪੂਰਾ ਭੁਗਤਾਨ ਕਰ ਦਿੱਤਾ ਗਿਆ ਸੀ ਪਰ ਬੈਂਕ ਅਧਿਕਾਰੀਆਂ ਵਲੋਂ ਵਾਰ-ਵਾਰ ਗੇੜੇ ਲਾਉਣ 'ਤੇ ਵੀ ਉਸ ਨੂੰ ਐਨ.ਓ.ਸੀ ਸਰਟੀਫਿਕੇਟ ਨਾ ਦਿੱਤਾ ਗਿਆ ਤਾਂ ਬੇਵੱਸ ਬੂਟਾ ਸਿੰਘ ਵਲੋਂ ਜਥੇਬੰਦੀ ਕੋਲ ਪਹੁੰਚ ਕੀਤੀ ਗਈ | ਜਥੇਬੰਦੀ ਦੇ ਆਗੂਆਂ ਵਲੋਂ ਸਬੰਧਿਤ ਅਧਿਕਾਰੀਆਂ ਕੋਲ ਪਹੁੰਚ ਕਰਨ 'ਤੇ ਵੀ ਉਨ੍ਹਾਂ ਵਲੋਂ ਕੋਈ ਠੋਸ ਜਵਾਬਦੇਹੀ ਨਾ ਕੀਤੀ ਗਈ ਤਾਂ ਮਜਬੂਰਨ ਜਥੇਬੰਦੀ ਵਲੋਂ ਬੈਂਕ ਦਾ ਘਿਰਾਓ ਕੀਤਾ ਗਿਆ | ਕਿਸਾਨਾਂ ਦੇ ਰੋਹ ਨੂੰ ਦੇਖਦਿਆਂ ਅਧਿਕਾਰੀਆਂ ਵਲੋਂ ਆਗੂਆਂ ਪਾਸ ਪਹੁੰਚ ਕੀਤੀ ਗਈ ਅਤੇ 10 ਦਿਨਾਂ ਦਾ ਸਮਾਂ ਲਿਆ ਗਿਆ | ਇਸ ਮੌਕੇ ਬਲਾਕ ਪ੍ਰਧਾਨ ਬਲਜੀਤ ਸਿੰਘ ਭੈਣੀਬਾਘਾ, ਕਾਲਾ ਸਿੰਘ ਭੀਖੀ, ਸਿਕੰਦਰ ਸਿੰਘ ਖ਼ਿਆਲਾ, ਗੁਰਪ੍ਰੀਤ ਸਿੰਘ ਅਨੂਪਗੜ੍ਹ, ਅਵਤਾਰ ਸਿੰਘ ਅਤਲਾ ਆਦਿ ਹਾਜ਼ਰ ਸਨ |
