ਮਲੋਟ, 20 ਜੁਲਾਈ (ਪਾਟਿਲ)-ਡੀ. ਏ. ਵੀ. ਐਡਵਰਡ ਗੰਜ ਸੀਨੀਅਰ ਸੈਕੰਡਰੀ ਪਬਲਿਕ ਸਕੂਲ ਮਲੋਟ ਨੇ ਸਕੂਲ ਦੀ ਪਿ੍ੰਸੀਪਲ ਸੰਧਿਆ ਬਠਲਾ ਦੀ ਅਗਵਾਈ ਹੇਠ ਤੀਜ ਤਿਉਹਾਰ ਮੌਕੇ ਇਕ ਪ੍ਰੋਗਰਾਮ ਕਰਵਾਇਆ | ਪਿ੍ੰਸੀਪਲ ਸੰਧਿਆ ਬਠਲਾ ਨੇ ਆਪਣੇ ਸੰਦੇਸ਼ 'ਚ ਕਿਹਾ ਕਿ ਸਾਡੇ ਦੇਸ਼ ਵਿਚ ਕੁਦਰਤ ਅਤੇ ਮਹਾਂਪੁਰਖਾਂ ਨਾਲ ਸੰਬੰਧਿਤ ਕਈ ਤਿਉਹਾਰ ਮਨਾਏ ਜਾਂਦੇ ਹਨ | ਉਨ੍ਹਾਂ ਤਿਉਹਾਰਾਂ 'ਚੋਂ ਤੀਜ ਤਿਉਹਾਰ ਵੀ ਮਹੱਤਵਪੂਰਨ ਹੈ | ਹਰਿਆਲੀ ਤੀਜ ਤਿਉਹਾਰ ਸਾਉਣ ਮਹੀਨੇ ਦੇ ਸ਼ੁਕਲ ਪੱਖ ਦੀ ਤੀਜੀ ਤਰੀਕ ਨੂੰ ਮਨਾਇਆ ਜਾਂਦਾ ਹੈ | ਇਹ ਤਿਉਹਾਰ ਔਰਤਾਂ ਦਾ ਤਿਉਹਾਰ ਹੈ | ਸਾਉਣ ਦੇ ਮਹੀਨੇ ਵਿਚ, ਜਦੋਂ ਸਾਰੀ ਕੁਦਰਤ ਹਰੇ ਰੰਗ ਦੀ ਸ਼ਾਲ ਨਾਲ ਢੱਕੀ ਹੁੰਦੀ ਹੈ, ਉਸ ਮੌਕੇ ਔਰਤਾਂ ਦੇ ਦਿਲ ਮੋਰ ਵਾਂਗ ਨੱਚਣ ਲੱਗ ਪੈਂਦੇ ਹਨ | ਰੁੱਖਾਂ ਦੀਆਂ ਟਾਹਣੀਆਂ 'ਤੇ ਝੂਲੇ ਲਟਕਾਏ ਜਾਂਦੇ ਹਨ | ਚਾਰੇ ਪਾਸੇ ਹਰਿਆਲੀ ਹੋਣ ਕਾਰਨ, ਇਸ ਨੂੰ ਹਰਿਆਲੀ ਤੀਜ ਕਿਹਾ ਜਾਂਦਾ ਹੈ | ਇਸ ਮੌਕੇ ਔਰਤਾਂ ਝੂਲਦੀਆਂ ਹਨ, ਲੋਕ ਗੀਤ ਗਾਉਂਦੀਆਂ ਹਨ ਤੇ ਆਨੰਦ ਮਾਣਦੀਆਂ ਹਨ | ਇਸ ਮੌਕੇ ਵਿਦਿਆਰਥਣ ਜੈਦੀਪ ਕੌਰ ਨੂੰ ਕੁੜੀਆਂ 'ਚ ਤੀਜ ਦਾ ਖਿਤਾਬ ਮਿਲਿਆ | ਤੀਜ ਦੇ ਮੌਕੇ ਸਕੂਲ ਦੇ ਵਿਦਿਆਰਥੀਆਂ ਤੇ ਅਧਿਆਪਕਾਂ ਨੇ ਗੀਤਾਂ, ਨਾਚ ਅਤੇ ਸੰਗੀਤ ਰਾਹੀਂ ਤੀਜ ਦਾ ਤਿਉਹਾਰ ਮਨਾਇਆ | ਇਸ ਮੌਕੇ ਸਕੂਲ ਦਾ ਸਮੁੱਚਾ ਸਟਾਫ਼ ਤੇ ਵਿਦਿਆਰਥੀ ਮੌਜੂਦ ਸਨ |
