ਅੰਮਿ੍ਤਸਰ, 20 ਜੁਲਾਈ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਵਜ਼ੀਰਸਤਾਨ ਜ਼ਿਲ੍ਹੇ ਦੇ ਲੱਧਾ ਤੇ ਸਰਵਕਾਈ ਪੁਲਿਸ ਸਟੇਸ਼ਨਾਂ ਦੇ 7 ਪੁਲਿਸ ਕਰਮਚਾਰੀ ਲਾਪਤਾ ਹੋ ਗਏ ਹਨ | ਜ਼ਿਲ੍ਹਾ ਪੁਲਿਸ ਅਧਿਕਾਰੀ (ਡੀ. ਪੀ. ਓ.) ਅਰਸ਼ਦ ਖ਼ਾਨ ਨੇ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਤਿੰਨਾਂ ਪੁਲਿਸ ਕਰਮਚਾਰੀਆਂ ਦੀ ਪਛਾਣ ਇਨਸਾਫ਼, ਆਬਿਦ ਅਤੇ ਇਸਮਾਈਲ ਵਜੋਂ ਹੋਈ ਹੈ | ਉਨ੍ਹਾਂ ਨੇ ਕਿਹਾ ਕਿ ਪੁਲਿਸ ਮੁਲਾਜ਼ਮ ਲੱਧਾ ਪੁਲਿਸ ਸਟੇਸ਼ਨ ਦੇ ਅਧਿਕਾਰ ਖੇਤਰ 'ਚ ਗਸ਼ਤ ਦੌਰਾਨ ਲਾਪਤਾ ਹੋ ਗਏ | ਇਸ ਤੋਂ ਇਲਾਵਾ ਸਬ-ਇੰਸਪੈਕਟਰ ਅਬਦੁਲ ਖਾਲਿਕ ਸਮੇਤ ਚਾਰ ਕਰਮਚਾਰੀ, ਕਾਂਸਟੇਬਲ ਇਰਫਾਨਉੱਲਾ, ਹਬੀਬੁੱਲਾ ਅਤੇ ਇਮਰਾਨ, ਸਰਵਕਾਈ ਪੁਲਿਸ ਸਟੇਸ਼ਨ ਦੇ ਅਧਿਕਾਰ ਖੇਤਰ 'ਚ ਆਉਣ ਵਾਲੇ ਤੰਗਾ ਚਗਮਲਾਈ ਖੇਤਰ ਤੋਂ ਲਾਪਤਾ ਹੋ ਗਏ | ਡੀ. ਪੀ. ਓ. ਅਰਸ਼ਦ ਖਾਨ ਨੇ ਕਿਹਾ ਕਿ ਲਾਪਤਾ ਕਰਮਚਾਰੀਆਂ ਅਤੇ ਅਧਿਕਾਰੀਆਂ ਦਾ ਪਤਾ ਲਗਾਉਣ ਲਈ ਖੋਜ ਮੁਹਿੰਮ ਚੱਲ ਰਹੀ ਹੈ, ਪਰ ਅਜੇ ਤੱਕ ਉਨ੍ਹਾਂ ਬਾਰੇ ਕੋਈ ਜਾਣਕਾਰੀ ਪ੍ਰਾਪਤ ਨਹੀਂ ਹੋ ਸਕੀ ਹੈ |
