ਪਿੰਡ ਤੇ ਪੰਜਾਬ ਦੀ ਹੋਂਦ ਬਚਾਉਣ ਦਾ ਦਿੱਤਾ ਹੋਕਾ- ਆਈ. ਡੀ. ਪੀ.
ਅਜੀਤ ਡੈਸਕ
07-11-2025
ਪਿੰਡ ਮਨਸੂਰਪੁਰ ਛੀਟਾਂਵਾਲਾ ਵਿਖੇ ਨਗਰ ਨਿਵਾਸੀਆਂ ਨਾਲ ਗੱਲਬਾਤ ਕਰਦਿਆਂ ਹਮੀਰ ਸਿੰਘ ਅਤੇ ਸੂਬਾ ਪ੍ਰਧਾਨ ਦਰਸ਼ਨ ਸਿੰਘ ਧਨੇਠਾ ਨੇ ਕਿਹਾ ਕਿ ਕੇਂਦਰ ਤੇ ਪੰਜਾਬ ਦੀਆਂ ਸਰਕਾਰਾਂ ਮਾਇਆਧਾਰੀਆਂ ਦੇ ਪ੍ਰਭਾਵ ਹੇਠ ਵਿਕਾਸ ਦੇ ਨਾਂਅ 'ਤੇੇ ਜੋ ਵਿਨਾਸ਼ ਵੱਲ ਵਾਹੋਦਾਹੀ ਦੌੜ ਲਗਾ ਰਹੀਆਂ ਹਨ, ਇਸ ਵਿਕਾਸ ਮਾਡਲ ਨੇ ਦੁਨੀਆਂ ਭਰ ਵਿਚ ਵਾਤਾਵਰਨ ਤੇ ਰੁਜ਼ਗਾਰ ਦਾ ਗੰਭੀਰ ਸੰਕਟ ਪੈਦਾ ਕਰ ਦਿੱਤਾ ਹੈ | ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਗਲ-ਗਲ ਤੱਕ ਭਿ੍ਸ਼ਟਾਚਾਰ ਵਿਚ ਗ੍ਰਸੀ ਦਿਖਾਈ ਦੇ ਰਹੀ ਹੈ ਤੇ ਕੱਟੜ ਇਮਾਨਦਾਰੀ ਵਾਲਿਆਂ ਨੇ ਹੁਣ ਪੰਜਾਬ ਦੀਆਂ ਸ਼ਾਮਲਾਟ ਜ਼ਮੀਨਾਂ, ਖੇਤੀਬਾੜੀ ਯੂਨੀਵਰਸਿਟੀ, ਮੰਡੀ ਬੋਰਡ, ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ (ਪਾਵਰਕਾਮ) ਅਤੇ ਬਾਗ਼ਬਾਨੀ ਆਦਿ ਵਿਭਾਗਾਂ ਦੀਆਂ ਜ਼ਮੀਨਾਂ ਵੇਚਣ ਦਾ ਫ਼ੈਸਲਾ ਕਰ ਲਿਆ | ਆਗੂਆਂ ਨੇ ਕਿਹਾ ਕਿ ਅਜਿਹੇ ਹਾਲਤਾਂ ਵਿਚ ਜੇਕਰ ਪਿੰਡਾਂ ਦੀਆਂ ਸ਼ਾਮਲਾਟ ਜ਼ਮੀਨਾਂ ਚਲੀਆਂ ਗਈਆਂ ਤਾਂ ਬਜ਼ੁਰਗਾਂ ਵਲੋਂ ਸਿਆਣਪ ਦਿਖਾਉਂਦਿਆਂ ਆਪਣੇ ਵਸ਼ਿੰਦਿਆਂ ਲਈ ਛੱਡੀ ਵਿਰਾਸਤ ਖ਼ਤਮ ਹੋ ਜਾਵੇਗੀ | ਪੰਚਾਇਤਾਂ ਦੀ ਆਮਦਨ ਨਹੀਂ ਰਹੇਗੀ ਤਾਂ ਪਹਿਲਾਂ ਹੀ ਗੰਦੇ ਪਾਣੀ ਦੇ ਨਿਕਾਸ ਤੇ ਗਲੀਆਂ ਨਾਲੀਆਂ 'ਚ ਉਲਝੇ ਪਿੰਡ ਨਰਕ ਬਣ ਜਾਣਗੇ | ਅੱਜ ਦੇ ਇਸ ਲੋਕ ਚੇਤਨਾ ਕਾਫ਼ਲੇ ਵਿਚ ਕੁਲਵਿੰਦਰ ਕੌਰ ਰਾਮਗੜ੍ਹ, ਪਰਮਿੰਦਰ ਕੌਰ ਵਿੱਕੀ, ਗੁਰਮੀਤ ਸਿੰਘ ਥੂਹੀ, ਕੇਵਲ ਸਿੰਘ ਕੋਟ, ਭਰਪੂਰ ਸਿੰਘ ਭਵਾਨੀਗੜ੍ਹ, ਤਾਰਾ ਸਿੰਘ ਫੱਗੂਵਾਲਾ, ਕਸ਼ਮੀਰਾ ਸਿੰਘ ਥੂਹੀ, ਫਲਜੀਤ ਸਿੰਘ ਸੰਗਰੂਰ ਨੇ ਸ਼ਮੂਲੀਅਤ ਕੀਤੀ |