ਰਾਜਪੁਰਾ, 20 ਜੁਲਾਈ (ਰਣਜੀਤ ਸਿੰਘ)-ਸ਼ੰਭੂ ਪੁਲਿਸ ਨੇ ਸ਼ਿਕਾਇਤ ਦੇ ਆਧਾਰ 'ਤੇ ਕਤਲ ਕਰਨ ਦੇ ਦੋਸ਼ 'ਚ ਕੇਸ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿਤੀ ਹੈ | ਜਾਣਕਾਰੀ ਮੁਤਾਬਿਕ ਪੁਲਿਸ ਨੂੰ ਅਲੀ ਪੁੱਤਰ ਜਾਗੂ ਵਾਸੀ ਪਿੰਡ ਮਨਸੂਰ ਜ਼ਿਲ੍ਹਾ ਗੁਰਦਾਸਪੁਰ ਹਾਲ ਆਬਾਦ ਨੇੜੇ ਇੰਡੀਅਨ ਪੈਟਰੋਲ ਪੰਪ ਡਾਹਰੀਆਂ ਨੇੜੇ ਸ਼ੰਭੂ ਨੇ ਸ਼ਿਕਾਇਤ ਦਰਜ ਕਰਵਾਈ ਕਿ ਉਸ ਦਾ ਭਰਾ ਰਹੀਮ ਉਮਰ ਕਰੀਬ 45 ਸਾਲ ਅਤੇ ਭਤੀਜੇ ਮੱਖਣ ਦੀਨ ਨਾਲ ਮੱਝਾਂ ਚਾਰਨ ਲਈ ਰਿਲਾਇੰਸ ਪੰਪ ਨੇੜੇ ਪਿੰਡ ਬਪਰੌਰ ਪਾਸ ਜਾ ਰਿਹਾ ਸੀ | ਸ਼ਿਕਾਇਤ ਮੁਤਾਬਿਕ ਉਸੇ ਸਮੇਂ ਚਾਰ ਕਾਰਾਂ ਅਤੇ ਇਕ ਮੋਟਰਸਾਈਕਲ 'ਤੇ ਸਵਾਰ ਹੋ ਕੇ ਹਮਲਾਵਰ ਹਥਿਆਰਾਂ ਸਮੇਤ ਆਏ ਅਤੇ ਉਨ੍ਹਾਂ ਨੇ ਮੁੱਦਈ ਦੇ ਭਰਾ 'ਤੇ ਹਮਲਾ ਕਰ ਦਿਤਾ | ਉਸ ਦਾ ਭਰਾ ਰਹੀਮ ਜਦੋਂ ਭੱਜਣ ਲੱਗਾ ਤਾਂ ਉਸ ਨੂੰ ਘੇਰ ਕੇ ਕਾਫੀ ਜ਼ਿਆਦਾ ਕੁੱਟਮਾਰ ਕੀਤੀ | ਜਦੋਂ ਮੁੱਦਈ ਤੇ ਉਸ ਦਾ ਭਤੀਜਾ ਛੁਡਾਉਣ ਗਏ ਤਾਂ ਹਮਲਾਵਰ ਮੁੱਦਈ ਹੋਰਾਂ ਦੇ ਵੀ ਪਿੱਛੇ ਪੈ ਗਏ ਅਤੇ ਉਨ੍ਹਾਂ ਨੇ ਭੱਜ ਕੇ ਜਾਨ ਬਚਾਈ | ਉਨ੍ਹਾਂ ਨੇ ਦੱਸਿਆ ਕਿ ਮੁੱਦਈ ਦੇ ਭਰਾ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ | ਇਸ ਪਿੱਛੇ ਵਜ੍ਹਾ ਪੁਰਾਣੀ ਰੰਜਿਸ਼ ਦੱਸੀ ਜਾ ਰਹੀ ਹੈ | ਇਸ ਸ਼ਿਕਾਇਤ ਦੇ ਆਧਾਰ 'ਤੇ ਪੁਲਿਸ ਨੇ ਸਰੀਫ, ਫਰਮਾਨੂੰ, ਅੰਮਜੂ, ਸ਼ੋਕੂ, ਜਾਤੂ, ਬਾਗਾ ਤੇ ਮੱਖਣ ਵਾਸੀਆਨ ਜੰਮੂ ਕਸ਼ਮੀਰ ਅਤੇ 11 ਨਾਮਾਲੂਮ ਮਰਦ ਅਤੇ ਤਿੰਨ ਨਾਮਾਲੂਮ ਔਰਤਾਂ ਦੇ ਖ਼ਿਲਾਫ਼ ਕੇਸ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿਤੀ ਹੈ |