ਚੰਡੀਗੜ੍ਹ / ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ

ਚੰਡੀਗੜ੍ਹ ਯੂਨੀਵਰਸਿਟੀ ਵਿਖੇ ਐਡਵਾਂਸ ਮਟੀਰੀਅਲ ਵਿਗਿਆਨ ਦੇ ਵਿਸ਼ੇ 'ਤੇ ਕਰਵਾਈ 'ਚਾਰਮ-2025' ਨਾਮਕ ਅੰਤਰਰਾਸ਼ਟਰੀ ਕਾਨਫ਼ਰੰਸ <br/>

ਕਾਨਫ਼ਰੰਸ 'ਚ ਭਾਗ ਲੈਣ ਵਾਲੇ ਉੱਘੇ ਖੋਜਕਾਰਾਂ, ਸਿੱਖਿਆ ਸ਼ਾਸਤਰੀਆਂ ਤੇ ਉਦਯੋਗਿਕ ਤੇ ਨੀਤੀਗਤ ਭਾਈਵਾਲਾਂ ਨਾਲ ਤਸਵੀਰ ਸਾਂਝੀ ਕਰਵਾਉਂਦੇ ਹੋਏ ਪ੍ਰਬੰਧਕ ਤੇ ਵਿਦਿਆਰਥੀ | ਅਜੀਤ ਤਸਵੀਰ <br/> 21-11-2025

ਐੱਸ. ਏ. ਐੱਸ. ਨਗਰ, 20 ਨਵੰਬਰ (ਤਰਵਿੰਦਰ ਸਿੰਘ ਬੈਨੀਪਾਲ)-ਜਿਹੜੇ ਲੋਕ ਖੋਜ ਕਰਨਾ ਚਾਹੁੰਦੇ ਹਨ, ਉਨ੍ਹਾਂ ਦੇ ਲਈ ਅੱਜ ਕੇਂਦਰ ਸਰਕਾਰ ਨੇ ਕਈ ਨਵੇਂ ਮੌਕੇ ਪੈਦਾ ਕੀਤੇ ਹਨ | ਭਾਵੇਂ ਉਹ ਆਪਣਾ ਸਟਾਰਅੱਪ ਸ਼ੁਰੂ ਕਰਨ ਤੇ ਖੋਜ ਕਰਨ ਲਈ ਆਰਥਿਕ ਮਦਦ ਕਿਉਂ ਨਾ ਹੋਵੇ | ਨੌਜਵਾਨਾਂ ਨੂੰ ਹੁਣ ਪਹਿਲਾਂ ਦੇ ਮੁਕਾਬਲੇ ਜ਼ਿਆਦਾ ਸਮਰਥਨ ਮਿਲ ਰਿਹਾ ਹੈ | ਖ਼ਾਸ ਕਰਕੇ ਉਨ੍ਹਾਂ ਨੌਜਵਾਨਾਂ ਨੂੰ ਜਿਹੜੇ ਕਿ ਆਪਣੀ ਖੋਜ ਨਾਲ ਸਮਾਜ ਦੇ ਵਿਕਾਸ 'ਚ ਵਿਸ਼ੇਸ਼ ਯੋਗਦਾਨ ਪਾਉਣਾ ਚਾਹੁੰਦੇ ਹਨ | ਇਹ ਪ੍ਰਗਟਾਵਾ ਇੰਡੀਆ ਐਸੋਸੀਏਸ਼ਨ ਆਫ਼ ਕਲਟੀਵੇਸ਼ਨ ਆਫ਼ ਸਾਇੰਸ ਕਲਕੱਤਾ ਦੇ ਡਾਇਰੈਕਟਰ ਕਾਲੋਬਾਰਨ ਮੈਤੀ ਨੇ ਚੰਡੀਗੜ੍ਹ ਯੂਨੀਵਰਸਿਟੀ ਵਿਖੇ ਐਡਵਾਂਸ ਮਟੀਰੀਅਲ ਵਿਗਿਆਨ ਵਿਸ਼ੇ 'ਤੇ ਕਰਵਾਈ 'ਚਾਰਮ-2025' ਨਾਮਕ ਅੰਤਰਰਾਸ਼ਟਰੀ ਕਾਨਫ਼ਰੰਸ ਨੂੰ ਸੰਬੋਧਨ ਕਰਨ ਮੌਕੇ ਕੀਤਾ | ਕਾਨਫ਼ਰੰਸ 'ਚ ਕੌਮੀ ਅਤੇ ਕੌਮਾਂਤਰੀ ਪੱਧਰ ਦੇ ਉੱਘੇ ਖੋਜਕਾਰਾਂ, ਸਿੱਖਿਆ ਸ਼ਾਸਤਰੀਆਂ ਅਤੇ ਉਦਯੋਗਿਕ ਤੇ ਨੀਤੀਗਤ ਭਾਈਵਾਲਾਂ ਨੇ ਸ਼ਿਰਕਤ ਕੀਤੀ | ਇਸ ਮੌਕੇ ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਪ੍ਰੋ. (ਡਾ.) ਰਵੀਰਾਜਾ ਐਨ. ਸੀਤਾਰਾਮ ਅਤੇ ਚਾਂਸਲਰ ਦੇ ਅਕਾਦਮਿਕ ਸਲਾਹਕਾਰ ਪ੍ਰੋ. (ਡਾ.) ਅਰੁਣ ਕੇ. ਗਰੋਵਰ ਵੀ ਹਾਜ਼ਰ ਸਨ | ਤਿੰਨ ਦਿਨਾਂ ਤੱਕ ਚੱਲੀ ਕਾਨਫ਼ਰੰਸ ਲਈ ਕੁੱਲ 350 ਖੋਜ ਪੱਤਰ ਪ੍ਰਾਪਤ ਹੋਏ, ਜਿਨ੍ਹਾਂ 'ਚ 105 ਉੱਨਤ ਸਮੱਗਰੀ ਅਤੇ ਏ. ਆਈ. ਇੰਟੀਗ੍ਰੇਸ਼ਨ ਸਮੇਤ ਹੋਰਨਾਂ ਵਿਸ਼ਿਆਂ 'ਤੇ ਆਧਾਰਿਤ ਸਨ | ਇਨ੍ਹਾਂ ਖੋਜ ਪੱਤਰਾਂ ਨੂੰ ਅਮਰੀਕਾ, ਮਲੇਸ਼ੀਆ, ਇੰਗਲੈਂਡ, ਇਟਲੀ, ਕੈਨੇਡਾ ਤੇ ਦੁਬਈ ਸਮਤੇ ਆਈ. ਆਈ. ਟੀ., ਐਨ. ਆਈ. ਟੀ., ਆਈ. ਆਈ. ਐਸ. ਈ. ਆਰ., ਸੀ. ਐਸ. ਆਈ. ਆਰ. ਵਰਗੇ ਵਕਾਰੀ ਸਿੱਖਿਆ ਅਦਾਰਿਆਂ ਤੋਂ ਆਏ ਪ੍ਰਸਿੱਧ ਖੋਜਕਾਰਾਂ, ਸਿੱਖਿਆ ਸ਼ਾਸਤਰੀਆਂ ਅਤੇ ਵਿਗਿਆਨੀਆਂ ਵਲੋਂ ਪੇਸ਼ ਕੀਤਾ ਗਿਆ | ਇਲੈਕਟ੍ਰੋਨਿਕਸ ਅਤੇ ਸੂਚਨਾ ਤਕਨਾਲੋਜੀ ਮੰਤਰਾਲੇ ਵਲੋਂ ਮਨਜ਼ੂਰੀ ਮਿਲਣ ਉਪਰੰਤ ਕਰਵਾਈ ਗਈ ਇਸ ਕਾਨਫ਼ਰੰਸ ਦੇ ਮੁੱਖ ਮਹਿਮਾਨ ਪ੍ਰੋ. ਕਾਲੋਬਾਰਨ ਮੈਤੀ ਨੇ ਘੱਟ ਲਾਗਤ ਤੇ ਉੱਚ ਪ੍ਰਭਾਵ ਵਾਲੇ ਪ੍ਰਯੋਗਾਂ 'ਤੇ ਜ਼ੋਰ ਦਿੰਦਿਆਂ ਕਿਹਾ ਕਿ ਭਾਰਤ ਨੂੰ ਹਾਲੇ ਵਿਗਿਆਨ ਦੇ ਵਿਸ਼ੇ 'ਚ ਸਿਰਫ਼ ਇਕ ਨੋਬਲ ਪੁਰਸਕਾਰ ਮਿਲਿਆ ਹੈ, ਜਿਸ ਨੂੰ ਮਹਾਨ ਵਿਗਿਆਨੀ ਸੀ. ਵੀ. ਰਮਨ ਨੇ ਜਿੱਤਿਆ ਸੀ, ਪਰ ਇਸ ਤੋਂ ਬਾਅਦ ਵੀ ਭਾਰਤ 'ਚ ਇਸ ਵਿਸ਼ੇ 'ਤੇ ਕਈ ਕੰਮ ਹੋਏ ਹਨ, ਭਾਵੇਂ ਕਿ ਸਾਡੇ ਕੋਲ ਸ੍ਰੋਤ ਸੀਮਤ ਰਹੇ ਅਤੇ ਸਮਰਥਨ ਵੀ ਜ਼ਿਆਦਾ ਨਹੀਂ ਮਿਲਿਆ | ਇਸ ਮੌਕੇ ਇੰਸਟੀਚਿਊਟ ਆਫ਼ ਨੈਨੋ ਸਾਇੰਸ ਐਂਡ ਟੈਕਨਾਲੋਜੀ ਦੇ ਡਾਇਰੈਕਟਰ ਅਤੇ ਵਿਗਿਆਨੀ ਪ੍ਰੋ. (ਡਾ.) ਆਕਾਸ਼ ਦੀਪ ਵਲੋਂ ਕਾਨਫ਼ਰੰਸ ਦੇ ਵਿਸ਼ੇ ਸੰਬੰਧੀ ਅਹਿਮ ਵਿਚਾਰ ਰੱਖੇ ਗਏ |

ਪਿਛਲੀ ਖ਼ਬਰ ਸੀ. ਜੀ. ਸੀ. ਲਾਂਡਰਾਂ ਦੇ ਵਿਦਿਆਰਥੀ ਸਾਗਰ ਸਿਨੋਟੀਆ ਨੂੰ ਕੌਮੀ ਕਾਨਫ਼ਰੰਸ 'ਚ ਮਿਲੀ ਵਿਸ਼ੇਸ਼ ਮਾਨਤਾ <br/> ਅਗਲੀ ਖ਼ਬਰ ਕਿਸਾਨ ਆਗੂਆਂ ਨੇ ਕੁਰਾਲੀ ਤੇ ਆਸ-ਪਾਸ ਦੇ ਪਿੰਡਾਂ ਨੂੰ ਜ਼ਿਲ੍ਹਾ ਰੋਪੜ 'ਚ ਸ਼ਾਮਿਲ ਕੀਤੇ ਜਾਣ ਦੀ ਕਥਿਤ ਤਜਵੀਜ਼ ਨੂੰ...