ਪਠਾਨਕੋਟ, 16 ਜੁਲਾਈ (ਸੰਧੂ)-ਸ਼ਹਿਰ ਵਿਚ ਸਥਿਤ ਅਨੰਦਪੁਰ ਲਾਇਬ੍ਰੇਰੀ, ਜਿਸ ਨੂੰ ਕਦੇ ਗਿਆਨ ਦਾ ਮੰਦਿਰ ਕਿਹਾ ਜਾਂਦਾ ਸੀ, ਹੁਣ ਨਸ਼ੇੜੀਆਂ ਦਾ ਅੱਡਾ ਬਣ ਗਈ ਹੈ | ਸ਼ਾਮ 6 ਵਜੇ ਤੋਂ ਰਾਤ 11 ਵਜੇ ਤੱਕ ਇਹ ਕੰਪਲੈਕਸ ਸ਼ਰਾਬ ਅਤੇ ਦੁਰਵਿਵਹਾਰ ਦਾ ਕੇਂਦਰ ਬਣ ਜਾਂਦਾ ਹੈ | ਜਿਸ ਨਾਲ ਨੇੜਲੇ ਨਿਵਾਸੀਆਂ ਦਾ ਜੀਵਨ ਮੁਸ਼ਕਿਲ ਹੋ ਜਾਂਦਾ ਹੈ | ਸਥਾਨਿਕ ਲੋਕਾਂ ਦਾ ਕਹਿਣਾ ਹੈ ਕਿ ਹਰ ਸ਼ਾਮ, ਸਮਾਜ ਵਿਰੋਧੀ ਅਨਸਰ ਲਾਇਬ੍ਰੇਰੀ ਦੇ ਵਿਹੜੇ ਵਿਚ ਇਕੱਠੇ ਹੋਣੇ ਸ਼ੁਰੂ ਹੋ ਜਾਂਦੇ ਹਨ | ਇਹ ਲੋਕ ਖੁੱਲ੍ਹੇਆਮ ਸ਼ਰਾਬ ਪੀਂਦੇ ਹਨ ਅਤੇ ਨਸ਼ੇ ਵਿਚ ਇਕ ਦੂਜੇ ਨੂੰ ਗਾਲ੍ਹਾਂ ਕੱਢਦੇ ਹਨ | ਰਾਤ ਦੀ ਚੁੱਪ ਵਿਚ ਇਹ ਆਵਾਜ਼ਾਂ ਇੰਨ੍ਹੀਆਂ ਉੱਚੀਆਂ ਹੁੰਦੀਆਂ ਹਨ ਕਿ ਨੇੜਲੇ ਘਰਾਂ ਵਿਚ ਰਹਿਣ ਵਾਲੇ ਲੋਕ ਠੀਕ ਤਰ੍ਹਾਂ ਸੌਂ ਨਹੀਂ ਪਾਉਂਦੇ | ਅÏਰਤਾਂ ਅਤੇ ਬੱਚਿਆਂ ਲਈ ਇਸ ਸਮੇਂ ਘਰੋਂ ਬਾਹਰ ਨਿਕਲਣਾ ਵੀ ਮੁਸ਼ਕਿਲ ਹੋ ਗਿਆ ਹੈ | ਸਵੇਰ ਹੁੰਦੇ ਹੀ ਲਾਇਬ੍ਰੇਰੀ ਦਾ ਬਰਾਂਡਾ ਇਨ੍ਹਾਂ ਨਸ਼ੇੜੀਆਂ ਦੁਆਰਾ ਫੈਲਾਈ ਗਈ ਗੰਦਗੀ ਦਾ ਗਵਾਹ ਬਣ ਜਾਂਦਾ ਹੈ | ਖ਼ਾਲੀ ਸ਼ਰਾਬ ਦੀਆਂ ਬੋਤਲਾਂ, ਪਲਾਸਟਿਕ ਦੇ ਗਲਾਸ, ਸਨੈਕ ਰੈਪਰ ਅਤੇ ਸਿਗਰਟ ਦੇ ਬੱਟ ਹਰ ਪਾਸੇ ਖਿੱਲਰੇ ਹੋਏ ਹੁੰਦੇ ਹਨ | ਸਵੇਰੇ ਅਖ਼ਬਾਰ ਪੜ੍ਹਨ ਅਤੇ ਸੈਰ ਕਰਨ ਆਉਣ ਵਾਲੇ ਲੋਕ ਇਸ ਨੂੰ ਦੇਖ ਕੇ ਬਹੁਤ ਪ੍ਰੇਸ਼ਾਨ ਹਨ | ਲਾਇਬ੍ਰੇਰੀ ਦਾ ਸ਼ਾਂਤਮਈ ਅਤੇ ਵਿੱਦਿਅਕ ਮਾਹੌਲ ਪੂਰੀ ਤਰ੍ਹਾਂ ਪ੍ਰਦੂਸ਼ਿਤ ਹੋ ਚੁੱਕਾ ਹੈ | ਇਕ ਮੁਹੱਲਾ ਨਿਵਾਸੀ ਨੇ ਆਪਣੀ ਪਹਿਚਾਣ ਗੁਪਤ ਰੱਖਣ ਦੀ ਸ਼ਰਤ 'ਤੇ ਕਿਹਾ ਕਿ ਇਹ ਸਥਿਤੀ ਕਾਫ਼ੀ ਸਮੇਂ ਤੋਂ ਚੱਲ ਰਹੀ ਹੈ | ਅਸੀਂ ਇਨ੍ਹਾਂ ਲੋਕਾਂ ਨੂੰ ਕਈ ਵਾਰ ਰੋਕਣ ਦੀ ਕੋਸ਼ਿਸ਼ ਕੀਤੀ, ਪਰ ਉਹ ਸੁਣਨ ਲਈ ਤਿਆਰ ਨਹੀਂ ਹਨ | ਜਦੋਂ ਪੁਲਿਸ ਨੂੰ ਬੁਲਾਇਆ ਜਾਂਦਾ ਹੈ, ਤਾਂ ਇਹ ਕੁਝ ਸਮੇਂ ਲਈ ਚਲੇ ਜਾਂਦੇ ਹਨ, ਪਰ ਜਿਵੇਂ ਹੀ ਪੁਲਿਸ ਜਾਂਦੀ ਹੈ, ਉਹ ਦੁਬਾਰਾ ਵਾਪਸ ਆ ਜਾਂਦੇ ਹਨ | ਸਥਾਨਿਕ ਨਿਵਾਸੀਆਂ ਨੇ ਇਸ ਗੰਭੀਰ ਸਮੱਸਿਆ 'ਤੇ ਪੁਲਿਸ ਅਤੇ ਨਗਰ ਨਿਗਮ ਪ੍ਰਸ਼ਾਸਨ ਤੋਂ ਤੁਰੰਤ ਕਾਰਵਾਈ ਦੀ ਮੰਗ ਕੀਤੀ ਹੈ | ਉਨ੍ਹਾਂ ਦਾ ਕਹਿਣਾ ਹੈ ਕਿ ਜੇਕਰ ਜਲਦੀ ਹੀ ਕੋਈ ਠੋਸ ਕਦਮ ਨਾ ਚੁੱਕੇ ਗਏ ਤਾਂ ਇਹ ਸਥਿਤੀ ਹੋਰ ਵੀ ਬਦਤਰ ਹੋ ਜਾਵੇਗੀ | ਲੋਕਾਂ ਨੇ ਪ੍ਰਸ਼ਾਸਨ ਨੂੰ ਲਾਇਬ੍ਰੇਰੀ ਕੰਪਲੈਕਸ ਵਿਚ ਨਿਯਮਿਤ ਗਸ਼ਤ ਵਧਾਉਣ ਅਤੇ ਨਸ਼ਿਆਂ ਦਾ ਸੇਵਨ ਕਰਨ ਵਾਲਿਆਂ ਵਿਰੁੱਧ ਸਖ਼ਤ ਕਾਨੂੰਨੀ ਕਾਰਵਾਈ ਕਰਨ ਦੀ ਅਪੀਲ ਕੀਤੀ ਹੈ, ਤਾਂ ਜੋ ਲਾਇਬ੍ਰੇਰੀ ਦੀ ਗੁਆਚੀ ਸ਼ਾਨ ਮੁੜ ਪ੍ਰਾਪਤ ਹੋ ਸਕੇ ਅਤੇ ਸਥਾਨਿਕ ਲੋਕ ਸ਼ਾਂਤੀ ਨਾਲ ਰਹਿ ਸਕਣ | ਇਸ ਮਾਮਲੇ ਵਿਚ ਪੁਲਿਸ ਅਤੇ ਨਗਰ ਨਿਗਮ ਪ੍ਰਸ਼ਾਸਨ ਦੀ ਚੁੱਪੀ ਕਾਰਨ ਲੋਕਾਂ ਵਿਚ ਡੂੰਘਾ ਗੁੱਸਾ ਹੈ |
