ਨਗਰ ਕੌਂਸਲ ਨੇ ਧਰਨੇ ਤੋਂ ਪਹਿਲਾਂ ਰਾਤੋ-ਰਾਤ ਕੂੜੇ ਦੇ ਡੰਪ ਚੁੱਕੇ
ਅਜੀਤ ਡੈਸਕ
17-07-2025
ਜਗਰਾਉਂ, 16 ਜੁਲਾਈ (ਸ਼ਮਸ਼ੇਰ ਸਿੰਘ ਗਾਲਿਬ)-ਨਗਰ ਕੌਂਸਲ ਜਗਰਾਉਂ ਪਿਛਲੇ ਸਾਢੇ ਚਾਰ ਸਾਲਾਂ ਤੋਂ ਸ਼ਹਿਰ ਦੀਆਂ ਵੱਖ-ਵੱਖ ਸਮੱਸਿਆਵਾਂ ਕਰਕੇ ਵਿਵਾਦਾਂ 'ਚ ਘਿਰੀ ਹੋਈ ਹੈ | ਸਭ ਤੋਂ ਵੱਡੀ ਸਮੱਸਿਆ ਕੂੜੇ ਦੇ ਜਗ੍ਹਾ-ਜਗ੍ਹਾ ਲੱਗੇ ਢੇਰ ਸਨ, ਜਿਸ ਨਾਲ ਲੋਕਾਂ ਦਾ ਆਉਣਾ-ਜਾਣਾ ਮੁਸ਼ਕਿਲ ਹੋਇਆ ਪਿਆ ਸੀ | ਕੂੜੇ ਦੇ ਢੇਰਾਂ 'ਤੇ ਪਸ਼ੂ ਖਿਲਾਰਾ ਪਾਉਣ ਨਾਲ ਟੈ੍ਰਫ਼ਿਕ ਦੀ ਵੱਡੀ ਸਮੱਸਿਆ ਬਣੀ ਹੋਈ ਸੀ | ਕੁਝ ਦਿਨ ਪਹਿਲਾਂ ਨਗਰ ਕੌਂਸਲ ਦੇ ਟਰੱਕਾਂ ਰਾਹੀਂ ਕੂੜਾ ਚੁੱਕਿਆ ਸੀ, ਪਰ ਫਿਰ ਵੀ ਕਈ ਡੰਪ ਕੂੜੇ ਦੇ ਉਸੇ ਤਰ੍ਹਾਂ ਪਏ ਸਨ | 16 ਜੁਲਾਈ ਧਰਨੇ ਦੇ ਮੱਦੇਨਜ਼ਰ ਰਾਤੋ-ਰਾਤ ਹੀ ਨਗਰ ਕੌਂਸਲ ਨੇ ਕੂੜੇ ਦੇ ਡੰਪ ਚੁੱਕਾ ਦਿੱਤੇ | ਨਗਰ ਕੌਂਸਲ ਦੇ ਮੁਲਾਜ਼ਮ ਰਾਤ ਦੇ ਤਿੰਨ ਵਜੇ ਤੱਕ ਜੇ.ਸੀ.ਬੀ. ਮਸ਼ੀਨ ਨਾਲ ਟਰਾਲੀਆਂ ਭਰ ਕੇ ਕੂੜੇ ਨੂੰ ਡੰਪ ਤੋਂ ਚੁੱਕ ਦੂਰ ਦੁਰਾਡੇ ਸੁੱਟਿਆ ਗਿਆ |
