ਹੁਸ਼ਿਆਰਪੁਰ,20 ਨਵੰਬਰ (ਬਲਜਿੰਦਰਪਾਲ ਸਿੰਘ)-ਸੇਂਟ ਸੋਲਜਰ ਇੰਸਟੀਚਿਊਟ ਆਫ਼ ਬਿਜ਼ਨਸ ਮੈਨੇਜਮੈਂਟ ਐਂਡ ਟੈਕਨਾਲੋਜੀ, ਚੱਬੇਵਾਲ ਦੇ ਬੀ.ਐਸ.ਸੀ ਫ਼ੈਸ਼ਨ ਡਿਜ਼ਾਈਨਿੰਗ ਦੇ ਵਿਦਿਆਰਥੀਆਂ ਨੂੰ ਉਦਯੋਗਿਕ ਟੂਰ 'ਤੇ ਲਿਜਾਇਆ ਗਿਆ | ਟੂਰ ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਕੱਪੜਾ ਨਿਰਮਾਣ ਉਦਯੋਗ ਦੇ ਕੰਮਕਾਜ ਦਾ ਵਿਹਾਰਕ ਅਨੁਭਵ ਪ੍ਰਦਾਨ ਕਰਨਾ ਅਤੇ ਫ਼ੈਸ਼ਨ ਖੇਤਰ ਵਿਚ ਵਰਤੀਆਂ ਜਾਂਦੀਆਂ ਉਤਪਾਦਨ ਤਕਨੀਕਾਂ ਬਾਰੇ ਜਾਣਕਾਰੀ ਦੇਣਾ ਸੀ | ਟੂਰ ਦੌਰਾਨ, ਵਿਦਿਆਰਥੀਆਂ ਦਾ ਸਵਾਗਤ ਕੰਪਨੀ ਮਾਲਕ ਮਹਿੰਦਰ ਸਿੰਘ ਜਸਵਾਲ ਤੇ ਮੈਨੇਜਰ ਮਨੀਸ਼ ਕੁਮਾਰ ਵੱਲੋਂ ਕੀਤਾ ਗਿਆ | ਉਨ੍ਹਾਂ ਦੱਸਿਆ ਕਿ 1996 'ਚ ਸਥਾਪਿਤ ਕੰਪਨੀ ਨੇ ਉੱਚ-ਗੁਣਵੱਤਾ ਵਾਲੇ ਪੈਂਟ ਤਿਆਰ ਕਰਨ 'ਚ ਨਾਮਣਾ ਖੱਟਿਆ ਹੈ, ਖ਼ਾਸ ਕਰਕੇ ਯੂਨਾਈਟਿਡ ਕਿੰਗਡਮ (ਯੂ.ਕੇ.) ਨੂੰ ਨਿਰਯਾਤ ਕੀਤੇ ਜਾਣ ਵਾਲੇ ਪੈਂਟ | ਵਿਦਿਆਰਥੀਆਂ ਨੇ ਪੈਂਟ ਨਿਰਮਾਣ ਦੇ ਵੱਖ-ਵੱਖ ਪੜਾਵਾਂ ਜਿਵੇਂ ਕਿ ਡਿਜ਼ਾਈਨਿੰਗ, ਕਟਿੰਗ, ਸਿਲਾਈ, ਧੋਣਾ, ਫਿਨਿਸ਼ਿੰਗ ਤੇ ਪੈਕੇਜਿੰਗ ਦੀਆਂ ਪੇਚੀਦਗੀਆਂ ਨੂੰ ਸਮਝਿਆ | ਉਨ੍ਹਾਂ ਨੂੰ ਆਧੁਨਿਕ ਤਕਨਾਲੋਜੀ, ਗੁਣਵੱਤਾ ਨਿਯੰਤਰਣ ਪ੍ਰਕਿਰਿਆ ਅਤੇ ਨਿਰਯਾਤ ਮਿਆਰਾਂ ਤੋਂ ਵੀ ਜਾਣੂ ਕਰਵਾਇਆ ਗਿਆ | ਟੂਰ ਕੋਆਰਡੀਨੇਟਰ ਤੇ ਸੁਪਰਵਾਈਜ਼ਰ ਦੇਵਿਕਾ ਤੇ ਕੁਲਦੀਪ ਕੌਰ ਨੇ ਕੰਪਨੀ ਮੈਨੇਜਮੈਂਟ ਦਾ ਉਨ੍ਹਾਂ ਦੇ ਸਹਿਯੋਗ ਲਈ ਧੰਨਵਾਦ ਕੀਤਾ | ਪਿ੍ੰਸੀਪਲ ਡਾ. ਇੰਦਰਪਾਲ ਸਿੰਘ ਨੇ ਵਿਦਿਆਰਥੀਆਂ ਤੇ ਫੈਕਲਟੀ ਦੇ ਅਣਥੱਕ ਯਤਨਾਂ ਦੀ ਸ਼ਲਾਘਾ ਕੀਤੀ ਅਤੇ ਨਵੀਨਤਾ ਅਤੇ ਸਮਰਪਣ ਦੁਆਰਾ ਇੱਕ ਬਿਹਤਰ ਭਵਿੱਖ ਤੇ ਫੈਸ਼ਨ ਉਦਯੋਗ 'ਚ ਨੌਜਵਾਨਾਂ ਦੀ ਭੂਮਿਕਾ 'ਤੇ ਜ਼ੋਰ ਦਿੱਤਾ |
