ਰੱਖਿਆ ਮੰਤਰਾਲੇ ਵਲੋਂ ਰਾਡਾਰ ਖਰੀਦਣ ਲਈ 770 ਕਰੋੜ ਦਾ ਸਮਝੌਤਾ

ਨਵੀਂ ਦਿੱਲੀ, 21 ਅਕਤੂਬਰ (ਏਜੰਸੀ)-ਰੱਖਿਆ ਮੰਤਰਾਲੇ ਨੇ ਦੱਸਿਆ ਕਿ ਸਰਕਾਰ ਨੇ ‘ਭਾਰਤ ਇਲੈਕਟ੍ਰਾਨਿਕਸ ਲਿਮਟਿਡ’ (ਬੀ.ਈ.ਐਲ.) ਨਾਲ ਫੌਜ ਲਈ ਸੁਧਾਰੇ ਗਏ ਘੱਟ ਉਚਾਈ ਵਾਲੇ ਹਲਕੇ ਰਾਡਾਰ’ ਖਰੀਦਣ ਲਈ ਲਗਪਗ 770 ਕਰੋੜ ਰੁਪਏ ਦਾ ਸਮਝੌਤਾ ਕੀਤਾ ਹੈ। ਮੰਤਰਾਲੇ ਨੇ ਇਸ ਗੱਲ ’ਤੇ ਜ਼ੋਰ ਦਿੱਤਾ ਕਿ ਇਹ ਖਰੀਦ ਹਵਾਈ ਰੱਖਿਆ ਪ੍ਰਣਾਲੀਆਂ ਦੇ ਸਵਦੇਸ਼ੀਕਰਨ ਵੱਲ ਇਕ ਮਹੱਤਵਪੂਰਨ ਕਦਮ ਹੈ। ਇਹ ਰਾਡਾਰ ਪ੍ਰਣਾਲੀ ਲੜਾਕੂ ਜਹਾਜ਼ਾਂ ਦੇ ਆਕਾਰ ਦੇ ਟੀਚਿਆਂ ਅਤੇ ਛੋਟੇ ਜਾਂ ਬਹੁਤ ਛੋਟੇ ਡਰੋਨਾਂ ਦਾ ਪਤਾ ਲਗਾਉਣ ਅਤੇ ਉਨ੍ਹਾਂ ਦਾ ਪਿੱਛਾ ਕਰਨ ਦੇ ਸਮਰੱਥ ਹੈ। ਇਸ ਤੋਂ ਇਲਾਵਾ ਇਸ ’ਚ ਹਵਾਈ ਟੀਚਿਆਂ ਨੂੰ ਉਨ੍ਹਾਂ ਦੀ ਮਹੱਤਤਾ ਦੇ ਆਧਾਰ ’ਤੇ ਤਰਜੀਹ ਦੇਣ ਦੀ ਸਮਰੱਥਾ ਵੀ ਹੈ। ਮੰਤਰਾਲੇ ਨੇ ਕਿਹਾ ਕਿ ਇਸ ਨਾਲ ਭਾਰਤੀ ਫੌਜ ‘ਅਨਮੈਨਡ ਏਰੀਅਲ ਸਿਸਟਮ’ ਭਾਵ ਬਿਨਾਂ ਪਾਇਲਟ ਵਾਲੇ ਹਵਾਈ ਪ੍ਰਣਾਲੀਆਂ ਦੇ ਖਤਰੇ ਦਾ ਸਫਲਤਾਪੂਰਵਕ ਮੁਕਾਬਲਾ ਕਰ ਸਕੇਗੀ। ਇਹ ਸਮਝੌਤਾ ਦਿੱਲੀ ਵਿਚ ਰੱਖਿਆ ਸਕੱਤਰ ਰਾਜੇਸ਼ ਕੁਮਾਰ ਸਿੰਘ ਦੀ ਮੌਜੂਦਗੀ ਵਿਚ ਕੀਤਾ ਗਿਆ।