ਨੂਰਮਹਿਲ ਨਗਰ ਕੌਂਸਲ ਖਿਲਾਫ ਬਸਪਾ ਵਲੋਂ ਧਰਨਾ

6 days ago

ਜੰਡਿਆਲਾ ਮੰਜਕੀ, 4 ਅਪ੍ਰੈਲ (ਸੁਰਜੀਤ ਸਿੰਘ ਜੰਡਿਆਲਾ)-ਨੂਰਮਹਿਲ ਨਗਰ ਕੌਂਸਲ ਦੀ ਮਾੜੀ ਕਾਰਗੁਜ਼ਾਰੀ ਖਿਲਾਫ ਕੌਂਸਲ ਦਫਤਰ ਦੇ ਸਾਹਮਣੇ ਬਸਪਾ ਵਲੋਂ ਧਰਨਾ ਪ੍ਰਦਰਸ਼ਨ ਅਤੇ ਟ੍ਰੈਫਿਕ ਜਾਮ ਕੀਤਾ ਗਿਆ। ਬਸਪਾ ਦੇ ਸੂਬਾ ਜਨਰਲ ਸਕੱਤਰ ਗੁਰਮੇਲ ਚੁੰਬਰ, ਦੇਵ ਰਾਜ ਸੁੰਮਨ ਪ੍ਰਧਾਨ ਵਿਧਾਨ ਸਭਾ ਹਲਕਾ ਨਕੋਦਰ, ਕੁਲਦੀਪ ਦੀਪਾ ਸ਼ਹਿਰੀ ਪ੍ਰਧਾਨ, ਵਲੈਤੀ ਰਾਮ ਕੌਂਸਲਰ, ਸੁਮਨ ਕੁਮਾਰੀ ਕੌਂਸਲਰ, ਜਗਦੀਸ਼ ਸ਼ੇਰਪੁਰੀ ਪ੍ਰਧਾਨ ਜ਼ਿਲ੍ਹਾ ਜਲੰਧਰ ਦਿਹਾਤੀ, ਮਲਕੀਤ ਰਾਮ ਚੁੰਬਰ, ਰਾਮ ਦਾਸ ਸਰਪੰਚ, ਕਸ਼ਮੀਰੀ ਲਾਲ ਆਦਿ ਨੇ ਦੱਸਿਆ ਕਿ ਮੁਹੱਲਾ ਕੋਟਲਾ ਵਿਚ ਪਾਣੀ ਦੀ ਮੋਟਰ ਨੂੰ ਖਰਾਬ ਹੋਇਆਂ ਇਕ ਮਹੀਨੇ ਤੋਂ ਵੱਧ ਸਮਾਂ ਹੋ ਚੁੱਕਾ ਹੈ, ਇਸ ਸਬੰਧੀ ਨਗਰ ਕੌਂਸਲ ਪ੍ਰਧਾਨ ਬੀਬੀ ਹਰਦੀਪ ਕੌਰ ਜੌਹਲ ਅਤੇ ਕਾਰਜ ਸਾਧਕ ਅਫਸਰ ਨੂੰ ਵਾਰ-ਵਾਰ ਕਹਿਣ ਦੇ ਬਾਵਜੂਦ ਇਸ ਦਾ ਕੋਈ ਹੱਲ ਨਹੀਂ ਹੋਇਆ। ਲੋਕ ਪਾਣੀ ਨੂੰ ਤਰਸ ਰਹੇ ਹਨ। ਸ਼ਹਿਰ ਵਿਚ ਸੀਵਰੇਜ, ਸਟਰੀਟ ਲਾਈਟਾਂ, ਸਫਾਈ ਦਾ ਬਹੁਤ ਬੁਰਾ ਹਾਲ ਹੈ। ਸ਼ਹਿਰ ਵਾਸੀਆਂ ਦਾ ਦਫਤਰ ਵਿਚ ਕੰਮ ਨਹੀਂ ਹੋ ਰਿਹਾ। ਉਨ੍ਹਾਂ ਕਿਹਾ ਕਿ ਅੱਕੇ ਹੋਏ ਲੋਕਾਂ ਦਾ ਸਬਰ ਦਾ ਪਿਆਲਾ ਅੱਜ ਭਰ ਗਿਆ ਹੈ ਤਾਂ ਲੋਕਾਂ ਨੂੰ ਸੜਕਾਂ ਉਤੇ ਉਤਰਨ ਲਈ ਮਜਬੂਰ ਹੋਣਾ ਪਿਆ। ਇਸ ਮੌਕੇ ਰਾਜਾ ਸਿੱਧਮ, ਕਮਲਜੀਤ ਬਸਰਾ, ਕੁਲਦੀਪ ਕੁਮਾਰ ਸਰਪੰਚ, ਦਲਵੀਰ ਕਿਦੋਂ, ਸੁਰਿੰਦਰ ਸਮਰਾ, ਸੁਰਿੰਦਰ ਪਾਲ ਸੁੰਨੜ ਕਲਾਂ, ਰਾਜ ਕੁਮਾਰ ਕੋਟਲਾ, ਜਗਦੀਸ਼ ਦੀਸ਼ਾ, ਨਛੱਤਰ ਸਿੰਘ, ਅਵਤਾਰ ਕੋਟਲਾ, ਮਨਪ੍ਰੀਤ ਕੋਟਲਾ, ਮੰਗਤ ਸਿੰਘ ਮੰਟੀ, ਬਾਗੂ ਰਾਮ ਸਿੱਧਮ, ਹਰਜੀਤ ਸਿੰਘ ਅਤੇ ਭਾਰੀ ਗਿਣਤੀ ਵਿਚ ਬਸਪਾ ਵਰਕਰ ਹਾਜ਼ਰ ਸਨ।