ਬੱਸ 'ਚੋਂ ਡਿੱਗਣ ਨਾਲ ਔਰਤ ਦੀ ਮੌਤ, ਬੱਚੀ ਗੰਭੀਰ ਜ਼ਖਮੀ

ਸ਼ੇਰਪੁਰ (ਸੰਗਰੂਰ), 15 ਜਨਵਰੀ (ਮੇਘ ਰਾਜ ਜੋਸ਼ੀ)-ਬਰਨਾਲਾ ਤੋਂ ਚੰਡੀਗੜ੍ਹ ਜਾ ਰਹੀ ਪੀ.ਆਰ.ਟੀ.ਸੀ. ਦੀ ਬੱਸ ਵਿਚੋਂ ਘਨੌਰੀ ਕਲਾਂ ਨੇੜੇ ਦੋ ਮਾਵਾਂ-ਧੀਆਂ ਬੱਸ ਵਿਚੋਂ ਡਿੱਗਣ ਕਰਕੇ ਮਾਂ ਦੀ ਮੌਤ ਅਤੇ ਧੀ ਗੰਭੀਰ ਜ਼ਖਮੀ ਹੋਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ। ਜਾਣਕਾਰੀ ਅਨੁਸਾਰ ਦੋਵੇਂ ਮਾਵਾਂ ਧੀਆਂ ਪਿੰਡ ਸੰਘੇੜਾ ਤੋਂ ਸਵੇਰੇ ਬੱਸ ਵਿਚ ਸਵਾਰ ਹੋ ਕੇ ਨਾਭਾ ਜਾਣ ਲਈ ਰਵਾਨਾ ਹੋਈਆਂ ਸਨ। ਪਿੰਡ ਕਾਤਰੋਂ ਤੇ ਘਨੌਰੀ ਵਿਚਕਾਰ ਪੈਂਦੇ ਪਿੰਡ ਚਾਂਗਲੀ ਮੋੜ ਉਤੇ ਅਚਾਨਕ ਇਹ ਘਟਨਾ ਵਾਪਰ ਗਈ, ਜਿਸ ਵਿਚ ਸੀਮਾ ਉਰਫ ਨੀਨਾ (30) ਪਤਨੀ ਰਵੀ ਕੁਮਾਰ ਵਾਸੀ ਸੰਘੇੜਾ (ਬਰਨਾਲਾ) ਦੀ ਮੌਕੇ ਉਤੇ ਹੀ ਮੌਤ ਹੋ ਗਈ ਤੇ ਧੀ (7) ਗੰਭੀਰ ਰੂਪ ਵਿਚ ਜ਼ਖਮੀ ਹੋ ਗਈ। ਦੋਵਾਂ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਧੂਰੀ ਵਿਖੇ ਲਿਜਾਇਆ ਗਿਆ ਜਿਥੇ ਡਾਕਟਰਾਂ ਨੇ ਸੀਮਾ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਲੋਕਾਂ ਅਨੁਸਾਰ ਮਾਂ ਆਪਣੀ ਕੁੜੀ ਨੂੰ ਬੱਸ ਦੀ ਪਿਛਲੀ ਬਾਰੀ ਵਿਚੋਂ ਉਲਟੀ ਕਰਵਾ ਰਹੀ ਸੀ, ਜਿਸ ਕਰਕੇ ਅਚਾਨਕ ਇਹ ਘਟਨਾ ਵਾਪਰੀ।