ਫਿਲੌਰ, 21 ਜਨਵਰੀ (ਵਿਪਨ ਗੈਰੀ)- ਸੂਬੇ ਅੰਦਰ ਅਮਨ ਸ਼ਾਂਤੀ ਕਾਇਮ ਰੱਖਣ ਲਈ ਭਗੌੜੇ ਅਤੇ ਗੈਂਗਸਟਰਾਂ ਖ਼ਿਲਾਫ਼ ਪੰਜਾਬ ਪੁਲਿਸ ਨੇ ਆਪਣਾ ਇੱਕ ਨਵਾਂ ਐਕਸ਼ਨ ਅਪ੍ਰੇਸ਼ਨ ਪਰਹਾਰ ਸ਼ੁਰੂ ਕਰ ਦਿੱਤਾ ਹੈ ਜੋ ਸੂਬੇ ਅੰਦਰ ਹਰ ਤਰ੍ਹਾਂ ਦੇ ਕ੍ਰਾਈਮ ਨੂੰ ਨੱਥ ਪਾਉਣ ਵਿਚ ਸਹਾਈ ਹੋਵੇਗਾ ਜਿਸ ਸੰਬੰਧੀ ਅੱਜ ਫਿਲੌਰ ਪੁੱਜੇ ਐੱਸ.ਐੱਸ.ਪੀ. ਜਲੰਧਰ ਦਿਹਾਤੀ ਹਰਵਿੰਦਰ ਸਿੰਘ ਵਿਰਕ ਨੇ ਦੱਸਿਆ ਕਿ ਡੀ.ਐਸ.ਪੀ. ਫਿਲੌਰ ਭਰਤ ਮਸੀਹ ਨੇ ਸਮੇਤ ਪੁਲਿਸ ਫੋਰਸ ਫਿਲੌਰ ਸਬ-ਡਵੀਜ਼ਨ ਦੇ ਵੱਖ-ਵੱਖ ਇਲਾਕਿਆਂ ਅੰਦਰ ਰੇਡਾਂ ਕੀਤੀਆਂ ਹਨ | ਇਸ ਅਪ੍ਰੇਸ਼ਨ ਦੌਰਾਨ ਕੁਲ 94 ਲੋੜੀਂਦੇ ਦੋਸ਼ੀਆਂ 'ਤੇ ਰੇਡ ਕੀਤੀ ਗਈ ਇਹਨਾਂ ਵਿਚੋਂ 28 ਵਿਅਕਤੀ ਜੋ ਮੁਕੱਦਮਿਆਂ ਵਿਚ ਲੋੜੀਂਦੇ ਸਨ, 02 ਲਿਸਟਿਡ ਗੈਂਗਸਟਰਾਂ ਨੂੰ ਗਿ੍ਫ਼ਤਾਰ ਕੀਤਾ ਗਿਆ ਤੇ ਇੱਕ ਨੂੰ ਡਿਟੇਨ ਕੀਤਾ ਗਿਆ | ਇਸ ਤੋਂ ਇਲਾਵਾ ਐੱਸ. ਐੱਸ. ਪੀ. ਨੇ ਦੱਸਿਆ ਕਿ ਯੁੱਧ ਨਸ਼ਿਆਂ ਵਿਰੁੱਧ ਚਲਾਈ ਮੁਹਿੰਮ ਤਹਿਤ ਸਾਲ 2025 ਵਿਚ ਕੁੱਲ 474 ਮੁਕੱਦਮੇ ਦਰਜ ਕੀਤੇ ਗਏ ਤੇ 689 ਨਸ਼ਾ ਵੇਚਣ ਤੇ ਪੀਣ ਵਾਲਿਆਂ ਨੂੰ ਗਿ੍ਫ਼ਤਾਰ ਕੀਤਾ ਗਿਆ ਜਿਨ੍ਹਾਂ ਪਾਸੋਂ 1 ਕਿੱਲੋ 603 ਗ੍ਰਾਮ ਹੈਰੋਇਨ, 207 ਕਿੱਲੋ ਡੋਡੇ, 03 ਕਿੱਲੋ 390 ਗ੍ਰਾਮ ਗਾਂਜਾ, 30055 ਨਸ਼ੀਲੀਆਂ ਗੋਲੀਆ ਸਮੇਤ 921 ਕੈਪਸੂਲ ਬਰਾਮਦ ਕੀਤੇ ਸਨ |
