ਨਵੀਂ ਦਿੱਲੀ, 2 ਫਰਵਰੀ (ਮਿਸਰਦੀਪ ਭਾਟੀਆ)-ਕੌਮੀ ਰਾਜਧਾਨੀ ਦਿੱਲੀ ਵਿਚ ਸੋਮਵਾਰ ਸਵੇਰ ਤੋਂ ਹੀ ਸੰਘਣੀ ਧੁੰਦ ਛਾਈ ਰਹੀ ਅਤੇ ਔਸਤ ਹਵਾ ਗੁਣਵੱਤਾ ਸੂਚਕ ਅੰਕ 'ਦਰਮਿਆਨੀ ਸ਼੍ਰੇਣੀ' ਵਿਚ ਦਰਜ ਕੀਤਾ ਗਿਆ | ਭਾਰਤੀ ਮੌਸਮ ਵਿਭਾਗ ਅਨੁਸਾਰ ਸਵੇਰੇ ਪਾਲਮ ਅਤੇ ਸਫ਼ਦਰਜੰਗ ਦੋਵਾਂ ਥਾਵਾਂ 'ਤੇ ਦਿੱਖਣ ਦੀ ਹੱਦ 100 ਮੀਟਰ ਤੱਕ ਡਿਗ ਗਈ | ਦਿੱਲੀ ਵਿਚ ਏ.ਕਿਊ.ਆਈ. 188 ਰਿਹਾ, ਜਦਕਿ 21 ਕੇਂਦਰਾਂ 'ਤੇ ਹਵਾ ਦੀ ਗੁਣਵੱਤਾ 'ਦਰਮਿਆਨੀ ਸ਼੍ਰੇਣੀ' ਵਿਚ ਅਤੇ 16 ਕੇਂਦਰਾਂ 'ਤੇ 'ਮਾੜੀ ਸ਼੍ਰੇਣੀ' ਵਿਚ ਦਰਜ ਕੀਤੀ ਗਈ | ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ ਦੇ ਸਮੀਰ ਐਪ ਅਨੁਸਾਰ 3 ਨਿਗਰਾਨੀ ਸਟੇਸ਼ਨਾਂ ਦਾ ਏ.ਕਿਊ.ਆਈ. ਡੇਟਾ ਤੁਰੰਤ ਉਪਲੱਬਧ ਨਹੀਂ ਹੈ, ਜਦਕਿ ਲੋਧੀ ਰੋਡ ਕੇਂਦਰ ਵਿਚ ਏ.ਕਿਊ.ਆਈ. 116 ਦਰਜ ਕੀਤਾ ਗਿਆ ਜੋ ਸਾਰਿਆਂ ਵਿਚੋਂ ਸਭ ਤੋਂ ਘੱਟ ਹੈ | ਹਵਾ ਦੀ ਗੁਣਵੱਤਾ ਪੂਰਵ ਪ੍ਰਾਪਤੀ ਪ੍ਰਣਾਲੀ ਅਨੁਸਾਰ ਦਿੱਲੀ ਦੀ ਹਵਾ ਦੀ ਗੁਣਵੱਤਾ ਅਗਲੇ ਦੋ ਦਿਨਾਂ ਲਈ 'ਮਾੜੀ ਸ਼੍ਰੇਣੀ' ਵਿਚ ਰਹਿਣ ਦੀ ਸੰਭਾਵਨਾ ਹੈ | ਭਾਰਤੀ ਮੌਸਮ ਵਿਭਾਗ ਨੇ ਕਿਹਾ ਹੈ ਕਿ ਸਫ਼ਦਰਜੰਗ ਵਿਚ ਘੱਟੋ-ਘੱਟ ਤਾਪਮਾਨ 10.4 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਜੋ ਆਮ ਨਾਲੋਂ ਥੋੜ੍ਹਾ ਵਧ ਹੈ, ਜਦੋਂਕਿ ਪਾਲਮ ਵਿਚ ਘੱਟੋ ਘੱਟ ਤਾਪਮਾਨ 10.7 ਡਿਗਰੀ ਸੈਲਸੀਅਸ ਸੀ ਜੋ ਆਮ ਨਾਲੋਂ ਥੋੜ੍ਹਾ ਵੱਧ ਹੈ | ਰਾਸ਼ਟਰੀ ਰਾਜਧਾਨੀ ਦਿੱਲੀ ਵਿਚ ਵੱਧ ਤੋਂ ਵੱਧ ਤਾਪਮਾਨ 17 ਡਿਗਰੀ ਸੈਲਸੀਅਸ ਅਤੇ ਘੱਟੋ ਘੱਟ 10 ਡਿਗਰੀ ਸੈਲਸੀਅਸ ਦੇ ਆਸਪਾਸ ਰਹਿਣ ਦੀ ਸੰਭਾਵਨਾ ਹੈ |
