ਜਪਾਨ ਦਾ ਜੰਗੀ ਸਿਖਲਾਈ ਜਹਾਜ਼ ‘ਕਾਸ਼ੀਮਾ’ ਵੈਨਕੂਵਰ ਪਹੁੰਚੇਗਾ-ਲੋਕਾਂ ਨੂੰ ਮੁਫ਼ਤ ਵੇਖਣ ਦਾ ਮਿਲੇਗਾ ਮੌਕਾ

ਵੈਨਕੂਵਰ, 12 ਸਤੰਬਰ (ਮਲਕੀਤ ਸਿੰਘ)-ਜਪਾਨ ਸਮੁੰਦਰੀ ਸਵੈ-ਰੱਖਿਆ ਬਲ ਦਾ ਪ੍ਰਮੁੱਖ ਸਮੁੰਦਰੀ ਸਿਖਲਾਈ ਜਹਾਜ਼ ‘ਜੇ. ਐੱਸ.

ਅ

ਅਜੀਤ ਡੈਸਕ 13-09-2026

ਵੈਨਕੂਵਰ, 12 ਸਤੰਬਰ (ਮਲਕੀਤ ਸਿੰਘ)-ਜਪਾਨ ਸਮੁੰਦਰੀ ਸਵੈ-ਰੱਖਿਆ ਬਲ ਦਾ ਪ੍ਰਮੁੱਖ ਸਮੁੰਦਰੀ ਸਿਖਲਾਈ ਜਹਾਜ਼ ‘ਜੇ.ਐੱਸ. ਕਾਸ਼ੀਮਾ’ ਅਗਲੇ ਹਫ਼ਤੇ ਵੈਨਕੂਵਰ ਪਹੁੰਚ ਰਿਹਾ ਹੈ ਅਤੇ ਆਮ ਲੋਕਾਂ ਨੂੰ ਮੁਫ਼ਤ ਇਸ ਵਿਸ਼ੇਸ਼ ਜਹਾਜ਼ ਉੱਤੇ ਚੜ੍ਹ ਕੇ ਵੇਖਣ ਦਾ ਮੌਕਾ ਮਿਲੇਗਾ। ਜਪਾਨ ਦੇ ਵੈਨਕੂਵਰ ਸਥਿਤ ਕੌਂਸਲੇਟ ਅਨੁਸਾਰ ਜਹਾਜ਼ ਨੂੰ ਬੁੱਧਵਾਰ, 16 ਸਤੰਬਰ ਨੂੰ ਸਿਰਫ਼ ਇੱਕ ਦਿਨ ਲਈ ਜਨਤਾ ਵਾਸਤੇ ਖੋਲ੍ਹਿਆ ਜਾਵੇਗਾ। ਜੇ.ਐੱਸ. ਕਾਸ਼ੀਮਾ ਉੱਤਰੀ ਵੈਨਕੂਵਰ ਦੇ ਬਰਾਰਡ ਡਰਾਈ ਡੌਕ ਪੀਅਰ, ਦਿ ਸ਼ਿਪਯਾਰਡਜ਼ ਇਲਾਕੇ ਨੇੜੇ ਖੜ੍ਹਾ ਹੋਵੇਗਾ। ਲੋਕ ਸਵੇਰੇ 10 ਵਜੇ ਤੋਂ ਦੁਪਹਿਰ 2 ਵਜੇ ਤੱਕ ਜਹਾਜ਼ ਦਾ ਦੌਰਾ ਕਰ ਸਕਣਗੇ, ਜਦਕਿ ਆਖ਼ਰੀ ਦਾਖ਼ਲਾ ਦੁਪਹਿਰ 1:30 ਵਜੇ ਹੋਵੇਗਾ। ਦਾਖ਼ਲਾ ਪੂਰੀ ਤਰ੍ਹਾਂ ਮੁਫ਼ਤ ਹੈ ਅਤੇ ਕਿਸੇ ਅਗਾਊਂ ਟਿਕਟ ਜਾਂ ਰਜਿਸਟ੍ਰੇਸ਼ਨ ਦੀ ਲੋੜ ਨਹੀਂ। ਪਹਿਲਾਂ ਪਹੁੰਚਣ ਵਾਲਿਆਂ ਨੂੰ ਪਹਿਲ ਦੇ ਆਧਾਰ ‘ਤੇ ਦਾਖ਼ਲਾ ਦਿੱਤਾ ਜਾਵੇਗਾ।ਬਾਲਗਾਂ ਨੂੰ ਜਹਾਜ਼ ਉੱਤੇ ਚੜ੍ਹਨ ਲਈ ਤਸਵੀਰ ਵਾਲਾ ਪਛਾਣ ਪੱਤਰ ਦਿਖਾਉਣਾ ਪਵੇਗਾ। ਬੱਚਿਆਂ ਨਾਲ ਅਜਿਹਾ ਪਛਾਣ ਪੱਤਰ ਰੱਖਣ ਵਾਲਾ ਬਾਲਗ ਹੋਣਾ ਲਾਜ਼ਮੀ ਹੈ। ਚਾਰ ਘੰਟਿਆਂ ਲਈ ਹੀ ਜਨਤਕ ਦੌਰਾ ਹੋਣ ਕਾਰਨ ਉੱਥੇ ਭੀੜ ਅਤੇ ਕਤਾਰਾਂ ਲੱਗਣ ਦੀ ਸੰਭਾਵਨਾ ਹੈ। ਕਾਸ਼ੀਮਾ ਨੂੰ 1994 ਵਿੱਚ ਸਮੁੰਦਰ ਵਿੱਚ ਉਤਾਰਿਆ ਗਿਆ ਸੀ ਅਤੇ ਇਸ ਨੂੰ ਜਪਾਨ ਦੇ ਸਮੁੰਦਰੀ ਅਧਿਕਾਰੀਆਂ ਦੀ ਸਿਖਲਾਈ ਲਈ ਤਿਆਰ ਕੀਤਾ ਗਿਆ ਸੀ। ਜਪਾਨ ਦੇ ਰੱਖਿਆ ਮੰਤਰਾਲੇ ਅਨੁਸਾਰ ਇਹ ਜਹਾਜ਼ 2026 ਦੇ ਵਿਦੇਸ਼ੀ ਸਿਖਲਾਈ ਸਮੁੰਦਰੀ ਦੌਰੇ ਦਾ ਹਿੱਸਾ ਹੈ। ਇਹ ਦੌਰਾ 16 ਮਈ ਤੋਂ 24 ਅਕਤੂਬਰ ਤੱਕ 161 ਦਿਨ ਚੱਲੇਗਾ ਅਤੇ ਲਗਭਗ 54,340 ਕਿਲੋਮੀਟਰ ਦਾ ਸਮੁੰਦਰੀ ਸਫ਼ਰ ਤੈਅ ਕਰੇਗਾ। ਇਸ ਦੌਰੇ ਵਿੱਚ ਕਾਸ਼ੀਮਾ ਦੇ ਨਾਲ ਜੇ.ਐੱਸ. ਯਾਮਾਗਿਰੀ ਵੀ ਸ਼ਾਮਲ ਹੈ ਅਤੇ ਕੁੱਲ ਲਗਭਗ 530 ਜਵਾਨ ਤੇ ਸਿਖਿਆਰਥੀ ਅਧਿਕਾਰੀ ਹਿੱਸਾ ਲੈ ਰਹੇ ਹਨ। ਕੈਨੇਡਾ ਵਿੱਚ ਦੌਰੇ ਦੇ ਪੜਾਵਾਂ ਵਿੱਚ ਹੈਲੀਫੈਕਸ ਅਤੇ ਵੈਨਕੂਵਰ ਸ਼ਾਮਿਲ ਹਨ।

ਪਿਛਲੀ ਖ਼ਬਰ ਕੈਨੇਡਾ - ਅਮਰੀਕਾ ਸਰਹੱਦ ਪੀਸ ਆਰਚ ’ ਤੇ 9/11 ਦੇ ਸ਼ਹੀਦਾਂ ਨੂੰ ਦਿੱਤੀ ਸ਼ਰਧਾਂਜਲੀ ਅਗਲੀ ਖ਼ਬਰ ਲੀਪਜ਼ਿਗ ਹਵਾਈ ਅੱਡੇ ’ਤੇ ਨਾਕਾਮ ਡਰੋਨ ਹਮਲੇ ਦੀ ਸਾਜ਼ਿਸ਼ ਬੇਨਕਾਬ