ਨਿਊਯਾਰਕ, 27 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਅਮਰੀਕੀ ਇਮੀਗ੍ਰੇਸ਼ਨ ਵਿਭਾਗ ਨੇ ਐਨ.ਐਫ਼.ਐਲ. ਟੀਮ ਇੰਡਿਆਨਾਪੋਲਿਸ ਕੋਲਟਸ ਦੇ ਸਾਬਕਾ ਖਿਡਾਰੀ ਡੈਨਿਯਲ ਓਗਾਮਾ ਅਡੋਂਗੋ ਨੂੰ ਦੇਸ਼ ਵਿੱਚੋਂ ਕੱਢ ਦਿੱਤਾ ਹੈ। ਕੀਨੀਆ ਨਾਲ ਸਬੰਧਤ 37 ਸਾਲਾ ਅਡੋਂਗੋ ਨੇ 2013 ਤੋਂ 2015 ਦਰਮਿਆਨ ਕੋਲਟਸ ਵੱਲੋਂ ਲਾਈਨਬੈਕਰ ਵਜੋਂ ਖੇਡਿਆ ਸੀ। ‘ਆਈਸ’ ਮੁਤਾਬਕ ਅਡੋਂਗੋ ਪਿਛਲੇ ਨੌਂ ਸਾਲਾਂ ਦੌਰਾਨ ਇੰਡਿਆਨਾ ਵਿੱਚ ਕਈ ਵਾਰ ਪੁਲਿਸ ਕਾਰਵਾਈ ਦਾ ਸਾਹਮਣਾ ਕਰ ਚੁੱਕਾ ਸੀ। ਸਾਲ 2020 ਵਿੱਚ ਜਾਇਦਾਦ ਨੂੰ ਨੁਕਸਾਨ ਪਹੁੰਚਾਉਣ ਦੇ ਇੱਕ ਮਾਮਲੇ ਵਿੱਚ ਉਸ ਨੂੰ ਦੋਸ਼ੀ ਕਰਾਰ ਦਿੰਦਿਆਂ ਕਰੀਬ ਇੱਕ ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। ਏਜੰਸੀ ਦਾ ਕਹਿਣਾ ਹੈ ਕਿ ਅਡੋਂਗੋ ਦੇ ਵੀਜ਼ੇ ਦੀ ਮਿਆਦ 2026 ਵਿੱਚ ਖ਼ਤਮ ਹੋ ਗਈ ਸੀ, ਜਿਸ ਤੋਂ ਬਾਅਦ ਉਸ ਕੋਲ ਅਮਰੀਕਾ ਵਿੱਚ ਰਹਿਣ ਦਾ ਕਾਨੂੰਨੀ ਦਰਜਾ ਨਹੀਂ ਸੀ। ਉਸ ਦੇ ਪੁਰਾਣੇ ਮਾਮਲਿਆਂ ਅਤੇ ਇਮੀਗ੍ਰੇਸ਼ਨ ਸਥਿਤੀ ਨੂੰ ਦੇਖਦਿਆਂ ਡਿਪੋਰਟ ਕਰਨ ਦੀ ਕਾਰਵਾਈ ਕੀਤੀ ਗਈ। ਇਸ ਮਾਮਲੇ ਬਾਰੇ ਅਡੋਂਗੋ ਜਾਂ ਉਸ ਦੇ ਵਕੀਲ ਵੱਲੋਂ ਅਜੇ ਤੱਕ ਕੋਈ ਬਿਆਨ ਸਾਹਮਣੇ ਨਹੀਂ ਆਇਆ।
